YEREMIA 36
36
Baruk Maca' Surat Bang Ruma' Allah
1 #
2 Rac 24.1; 2 In 36.5–7; Dan 1.1–2 Bang lak luk keapat kareb Raca' Yoyakim, anak Yosia ngimet Yahuda, idi kebala Tuhan ni Yeremia, 2“Ngalap geretas idi ngayud luunneh amung-amung luk bilaKu namu ratnan Israil, Yahuda, idi amung pupu baken. Idi teh ngayud amung-amung luk bilaKu namu rat pun-pun Ui nepebala namu, ieh ineh rat kareb imet Raca' Yosia macing aco sini. 3Kian, kareb lun Yahuda ninger ratnan amung-amung susa' luk ruenKu ngacing nedeh, idi ideh miak teketed ratnan kekamendeh luk dat lek. Idi Ui miak maré do' ratnan datdeh idi sala'deh.”
4Idi Yeremia nenawar ni Baruk Neria idi nengecuk neneh ngayud amung-amung luk bila Tuhan ni Yeremia. Idi Baruk nengayud amung ineh luun geretas. 5Idi kebala Yeremia ni Baruk, “Ui na simén semuet bang Ruma' Allah. 6Do' iko amé' déi' ku libalku kareb aco lemulun mawa' na kuman, idi maca' surat ineh dengan rayeh arod, pad ideh miak ninger amung-amung luk bila Tuhan negku, idi luk bida'ku namu. Do' maca' surat ineh pad amung-amung lemulun miak ninger balamu, meluun teh lun Yahuda luk nacing rat bawang-bawangdeh. 7Kian, ideh miak sembayang inan Tuhan idi teketed ratnan kekamendeh luk dat lek, ngaceku Tuhan pangeh nemada' pupu ini dengan usehNeh luk pelaba bura'.” 8Idi Baruk nemaca' bala Tuhan bang Ruma' Allah maya' kudeng luk bila Yeremia neneh.
9Bang bulan iwa', lak luk kelimeh kareb Raca' Yoyakim ngimet Yahuda, ideh nenganau' aco luk inan mawa' na kuman pa kiung Tuhan. Idi amung lun Yerusalim idi lemulun luk nacing rat bawang-bawang Yahuda nemaya' aco ineh. 10Idi Baruk nemaca' amung bala Yeremia luk bang surat ineh, pad ieh pedingeren amung lemulun bang ruma' sembayang, ieh ineh bang takep Gemaria Sapan, luk lun rayeh raca'. Idi takepneh ineh luun parung, ieh ineh munung Tanga' Baruk bang Ruma' Allah.
Surat Ineh Bica' Kuan Lun Rayeh
11Mikaya, anak Gemaria Sapan, neninger Baruk maca' bala Tuhan bang surat ineh. 12Idi ieh iné' ruma' raca', idi nesemuet bang takep lun rayeh raca', su luk inan amung lun rayeh uned pegayam. Idi lun rayeh luk pegayam, ieh ineh Elisama, lun rayeh raca', Delaya Semaya, Elnatan Akbor, Gemaria Sapan, Sedekia Hanania, idi teh amung lun rayeh luk baken. 13Idi Mikaya nemada' nedeh ratnan amung bala luk bica' Baruk nelun mula'. 14Idi amung lun rayeh ineh nengecuk Yehudi Netania luk mupun Selemia Kusi amé' mada' ni Baruk pad ieh nguit surat luk bica'neh kuan lun mula' ineh. Idi Baruk nenguit surat ineh idi nemaya' nedeh. 15“Tudo iko,” kebaladeh, “idi maca' surat ineh kuan kai.” Idi Baruk nemaca' surat ineh kuandeh. 16Idi kareb ieh pangeh nemaca' amung ineh, idi ideh pesier ngaceku ideh megagap. Idi kebaladeh ni Baruk, “Do' kai mada' bala ini kuan raca'.” 17Idi kebaladeh neneh, “Do' mada' nekai kudeng apeh iko nengayud ini? Yeremiaké luk nengecuk namu?”
18Idi Baruk nengor baladeh, kebalaneh, “Yeremia nemada' amung bala ini kuanku, idi ui nengayud ineh luun geretas ku dawat.”
19Idi kebaladeh neneh, “Do' medueh Yeremia amé' sigapung. Idi aleg nima' seburur pana' kali' su inan medueh.”
Raca' Ngeseb Surat Ineh
20Lun rayeh nenganau' surat ineh bang takep Elisama, lun rayeh raca', idi ideh iné' pa kiung raca' idi nemada' amung bala ineh neneh. 21Idi raca' nengecuk Yehudi amé' ngalap surat ineh. Idi ieh nenguit surat ineh rat takep Elisama idi nemaca' ineh kuan raca' idi kuan amung lun rayeh luk tuped iringneh. 22Idi kareb ineh meteneb idi raca' singidu bang ruma' luk inanneh tudo kareb meteneb. 23Idi kareb Yehudi pangeh nemaca' teluh apat babpat, raca' ineh nengirit babpat luk bica'neh ineh, idi nenala' ineh bang apui. Ieh nenganau' kudeng ineh pad amung surat ineh nabud iseb. 24Iamo' raca' idi lun rayehneh luk neninger bala surat ineh na matot idi na uren. 25Sagan tu pana' Elnatan, Delaya, idi Gemaria nemutuh raca' na ngeseb surat ineh, na ieh neninger baladeh. 26Idi ieh nengecuk Yeramil, seburur anak raca', idi Seraya Asriel, idi Selemia Abdil amé' ngakem Nabi Yeremia idi Baruk lun luk ngayud ineh. Iamo' Tuhan pangeh nengapung nedidueh.
Yeremia Ngayud Aceh Surat Teh
27Kareb raca' pangeh nengeseb surat luk bida' Yeremia ni Baruk, idi kebala Tuhan ni Yeremia, 28“Do' iko ngalap aceh geretas teh idi ngayud luun ineh amung bala luk inayud bang surat luk iseb Raca' Yoyakim.” 29Idi Tuhan nengecuk neneh mada' Raca' Yoyakim, kebalaNeh, “Iko pangeh nengeseb surat ineh, idi iko pangeh nengitun Yeremia anun punneh ieh nengayud ratnan raca' Babil luk miak macing idi ngusag bawang ini idi ngaté lemulun idi pung pana'. 30Ngaceku ineh, Ui ini Tuhan pebala namu, O Raca' Yoyakim. Seburur pana' ratnan inulmu nateh miak mangun ku raca'. Butungmu miak talan, pad ieh melau' kareb macang, idi meteneb kareb medacem. 31Ui miak ngukum namu idi inulmu dengan amung lun rayehmu, ngaceku amung-amung sala' muyuh. Iko idi lun Yahuda idi Yerusalim na neninger bada'Ku. Ngaceku ineh Ui miak ngacing kuan muyuh amung susa' luk pangeh bida'Ku.”
32Idi Yeremia nengalap aceh geretas teh idi nemaré ineh kuan Baruk, lun luk ngayud ineh. Idi ieh nengayud amung-amung luk bida' Yeremia. Ieh nengayud amung bala luk pangeh inayud bang surat luk iseb Raca' Yoyakim. Idi Yeremia nengecuk neneh ngayud tuda'-tuda' bala luk kudeng ineh teh.
Currently Selected:
YEREMIA 36: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
