YEREMIA 34
34
Bala Kuan Sedekia
1 #
2 Rac 25.1–11; 2 In 36.17–21 Tuhan nepebala ni Yeremia kareb Nebukadnesar, raca' Babil ngerieng Yerusalim idi bawang luk libut-libut Yerusalim, dengan bawehneh idi baweh amung pupu luk pa liang imetneh. 2Tuhan Allah lun Israil nengecuk ni Yeremia pebala ni Sedekia raca' Yahuda, “Ui ini Tuhan maré bawang ini bang palad raca' Babil, idi ieh miak sabpenneh. 3Iko na miak buro rat neneh. Iko miak kamen idi tebanenneh. Medueh miak pesier idi pegayam. Idi iko miak amé' Babil. 4O Raca' Sedekia, ninger balaKu. Ui sikal mada' ratnan lawému! Na iko miak pitayen bang bunu'. 5Iko miak maté dengan do'. Idi mepad kudeng lemulun nengeseb umau luk do' buen kareb ideh nenanem tepunmu luk mangun ku raca' atun rat namu, kudeng ineh teh ideh miak ngeseb umau luk do' buen kuanmu. Ideh miak temido namu, ketidodeh, ‘Raca' tau pangeh naté!’ Ui ini Tuhan pangeh nepebala.”
6Idi Nabi Yeremia nemada' amung bala ini kuan Raca' Sedekia déi' Yerusalim, 7kareb baweh raca' Babil uned ngerieng bawang ineh idi bawang Lakis idi bawang Aseka, ieh ineh dueh bawang Yahuda luk ketecan luk linibung teh.
Saluk Lun Yerusalim Ratnan Demulundeh
8Tuhan nepebala ni Yeremia muci ratnan Raca' Sedekia nepejani' dengan lun Yerusalim, miak muit demulundeh. 9Ideh nepejani' muit demulundeh luk lun Iberani, do' deléi idi decur teh, pad seburur pana' na miak ngimet nelun Yahudi mangun ku demulun. 10Idi amung lemulun idi lun rayehdeh nemaya' jani' ineh, pad ideh miak muit demulundeh, idi na ngalap nedeh baruh teh. 11Idi ideh nemuit demulundeh, iamo' muci ideh nengisu' terawédeh, idi nengalap nedeh lemubed, mangun ku demulun baruh teh.
12-13Pangeh ineh kebala Tuhan, Allah lun Israil ni Yeremia, “Ui nenganau' aceh jani' dengan tepun muyuh, kareb Ui nemuit nedeh rat bang palad lun Masir luk nenganau' nedeh mangun ku demulun. KebalaKu, 14#Pur 21.2; Bad 15.12 ‘Kareb lak luk ketudu', do' muyuh muit demulun muyuh luk lun Iberani luk pangeh bilih muyuh, idi luk pangeh nengakem anem lak.’ Iamo' tepun muyuh na sikal ninger idi maya' balaKu. 15Iamo' nekini pangeh tuda'-tuda' aco muyuh nengisu' terawé muyuh pad muyuh nenganau' luk petulu dengan pinianKu. Amung muyuh nengamo miak muit demulun muyuh luk lun Iberani, idi muyuh nenganau' aceh jani' pa kiungKu, bang Ruma' luk pinudut dengan ngadanKu. 16Iamo' muyuh nengisu' terawé muyuh teh idi nengedat Negku. Amung muyuh nengalap lemubed demulun luk pangeh pinuit muyuh maya' piandeh, idi muyuh nenganau' nedeh mangun ku demulun baruh teh. 17Ngaceku ineh, Ui ini Tuhan pebala, ‘Muyuh na nemaya' balaKu. Muyuh na nemuit demulun muyuh luk lun Iberani. Ngaceku ineh Ui maré puit nemuyuh, pad muyuh maté bang bunu', ét, idi lau. Ui miak nganau' amung bawang bang tana' ini megagap ku luk ruenKu nemuyuh. 18-19Lun rayeh Yahuda idi Yerusalim, dengan lun rayeh ruma' raca', imam-imam, idi lun mula' bang bawang ini, nenganau' aceh jani' Negku, kareb ideh nenalan arang dueh babpat sapi' luk inupadeh ineh. Iamo' ideh nengelaba jani' luk inau'deh pa kiungKu, idi na nemaya' bala jani' ineh. Idi Ui miak nganau' kuan pupu ini mepad kudeng luk inau'deh kuan sapi' ineh. 20Ui miak maré nedeh bang palad bunu'deh, ieh ineh kuan lemulun luk pian ngaté nedeh, pad butungdeh miak kenen suit idi pung luk meliput. 21Ui miak maré ni Sedekia, raca' Yahuda idi amung lun rayehneh bang palad bunu' luk sikal ngaté nedeh. Ui miak maré nedeh kuan baweh raca' Babil luk pangeh nugka' ngerieng nemuyuh. 22Ui miak ngecuk nedeh pad ideh lemubed amé' bawang ini. Ideh miak ngerieng bawang ini, pad ideh ngalap idi ngeseb neneh. Ui miak nganau' amung bawang Yahuda mepad kudeng su luk ali-ali luk na lemulun. Ui ini Tuhan pangeh nepebala.’ ”
Currently Selected:
YEREMIA 34: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
