HOSIA 9
9
Hosia Ngegala' Ukum Luk Macing Kuan Lun Israil
1O Lun Israil, ugka' nganau' aco rayeh mepad kudeng lun luk na manu. Muyuh pangeh neteketed ratnan Allah idi na lutep maya' Neneh. Aput-aput tana' muyuh pangeh nemasui burur muyuh kuan Baal, mepad kudeng decur luk mesawa', idi muyuh pian ku padé luk ku tabpar sét! 2Iamo' na mio teh muyuh na ngalap petap padé idi umau saitun, idi teh na luk idi abpa' anggur. 3Lun Israil na miak tudo bang bawang Tuhan, iamo' na miak na muyuh lemubed amé' déi' Masir, idi kuman akan lun Asur luk na tabpen. 4Bang bawang pupu baken lun Israil na miak maré baré abpa' anggur kuan Tuhan, idi nguit baré luk sabpen kuanNeh. Akandeh miak ngelutak amung-amung lun luk kuman ineh, mepad kudeng akan kareb irau lun luk maté. Akan ineh ku ngebor batekdeh sebuleng, idi na miak iten amé' bang Ruma' Allah. 5Idi anunké luk miak ruendeh kareb aco irau luk litep Tuhan? 6Kareb susa' ineh macing idi lun Israil uen ngatad, lun Masir miak ngamung nedeh, pad nanem nedeh déi' Mempis! Binawehdeh idi ruma'deh miak uen ngelinged ku uduh idi tabpa'.
7 #
Luk 21.22
Aco luk inan ngukum pangeh nacing, pad lun Israil miak mekaneh ukum luk petulu. Israil miak kali' kareb amung ineh mangun! Kebala muyuh, “Nabi ineh mebacé. Lemulun luk kikem Roh ini meruden.” Muyuh megateh negku ngaceku sala' muyuh pelaba rayeh. 8Allah nengecuk negku luk mangun ku seburur lun nabi, pad ui mada' pupuNeh Israil. Iamo' iapeh-iapeh pana' ulekku, muyuh nutun tumen abpung kuanku mepad kudeng kuan suit. Bang bawang Allah lun mula' mangun ku bunu' nabi. 9#Ngu 19.1–30 Amung kekamendeh pelaba dat, mepad kudeng déi' Gibia. Allah ngerawé sala'deh idi sikal ngukum nedeh.
Sala' Israil Idi Bua'-Bua'neh
10 #
Iap 25.1–5
Kebala Tuhan, “Kareb Ui pun-pun kali' Israil, ieh mepad kudeng bua' anggur luk mulun mo'-mo' déi' su luk ali-ali. Kareb Ui pun-pun kali' tepun muyuh, ideh mepad kudeng bua' gita' luk pun melak. Iamo' kareb ideh iné' Baal Pior, ideh nengimun sembayang inan Baal, idi Ui megateh nedeh mepad kudeng Ui megateh ku akang luk inandeh mawa. 11Ubur Israil miak buro mepad kudeng suit luk temulud, pad na anak luk uendeh nenganak, idi na decur mali'. 12Idi sagan tu pana' inan anak, Ui miak ngalap nedeh, pad seburur pana' nateh luk ketecan. Kareb Ui necan pupu ini, susa' luk pelaba rayeh miak macing nedeh.”
13O Tuhan, ui miak nier ineh nekini. Lun Israil nima' anakdeh kamen, pad ideh pitayen bunu'deh.
14O Tuhan, anunké luk pituenku kuan pupu ini? Do' maré nedeh nakan luk na ngeruat anak, idi iti' luk na rata!
Ukum Tuhan Kuan Israil
15Kebala Tuhan, “Amung kekamendeh luk dat nengimun déi' Gilgal. Su ineh Ui nengimun megateh nedeh. Ngaceku amung kekamendeh luk dat, Ui miak ngusu nedeh rat bang bawangKu. Idi Ui na miak mawa nedeh peh; amung lun luk ngimet nedeh sikal metueh rat Negku. 16Lun Israil mepad kudeng aceh tibu luk inan uat luk tekering, pad na kebua'. Na ideh miak inan anak. Iamo' sagan tu pana' inan anak, Ui miak ngaté anak luk inandeh mawa ineh.”
Nabi Pebala Ratnan Israil
17Allahku miak ngarung pupuNeh, ngaceku ideh na neninger balaNeh. Ideh miak mangun ku sakai arang lun pupu baken.
Currently Selected:
HOSIA 9: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
