HOSIA 4
4
Adu' Tuhan Nelun Israil
1Tuhan ngesala' nelun luk tudo bang bawang ini. O Israil, ninger balaNeh. Ini adu'Neh: “Lemulun bang bawang ini na lutep maya' jani'deh, idi na mawa. Ideh na ngamo Negku ini Allahdeh. 2Lemulun pejani', idi ideh na maya' jani'deh. Ideh mebalih, ngaté lemulun, mano, idi pasét. Kekamendeh luk dat amé'-amé' rayeh. 3Idi tana' mangun metugeh, idi amung-amung luk mulun su ineh miak maté. Amung pung, suit, idi lawid pana' miak maté.”
Adu' Tuhan Nelun Imam
4Kebala Tuhan, “Aleg ngadu' idi periteteng nelun mula', ngaceku adu'Ku ini nelun imam. 5Tebaco kedangan kekamen muyuh na ulekneh idi lun nabi pana' na meluun do' rat nemuyuh. Ui miak ngusag Israil luk tinanmu. 6PupuKu uen ngusag ngaceku ideh na manu Negku. Muyuh imam pana' na manu Negku, idi ara' ku bada'Ku. Ngaceku ineh Ui na pian ku muyuh idi anak muyuh mangun ku imamKu.
7“Iuk-iuk mula' sala'deh pa kiungKu. Ui miak ngisu' dita'deh mangun ku igu'. 8Ideh mangun ku lun do' ratnan baré ngaceku sala' pupuKu, idi mawang niat kareb ideh mula' sala'. 9Lun mula' idi imam-imam pana' miak pad-pad kumin. Ui miak ngukum nedeh idi ngua' kekamendeh luk dat. 10Kareb ideh kuman babpat deh ratnan baré-baré, na ideh miak mebor ku ineh. Ideh pasét na allah baken, iamo' na anakdeh, ngaceku ideh neteketed rat Negku idi nemaya' allah baken.”
Tuhan Ngesala' Sembayang Lemulun Luk Na Manu
11“Abpa' anggur nganau' pupuKu mebacé! 12Ideh mutuh luk linio ratnan ulung kayuh! Ulung kayuh ineh mangun ku gurudeh! Ideh nenecan Negku; mepad kudeng seburur decur luk mangun ku decur luk mesawa', ideh nemaré bururdeh kuan allah baken. 13Ideh maré baré luun buduk pegkung, idi ideh ngeseb umau luk do' buen liang kayuh luk medita' luun surud-surud, ngaceku do' lungung!
“Ngaceku ineh, anak muyuh mangun ku decur luk mesawa' idi iban decur muyuh pana' pasét teh. 14Iamo' na Ui ngukum nedeh ku kekamen ineh, ngaceku muyuh deléi pana' pasét idi maré baré dengan decur luk mesawa' déi ruma' Baal. Kebala balé', ‘Pupu luk na mileh uen ngusag.’
15“Sagan tu pana' pupu Israil na lutep maya' Negku, aleg lun Yahuda mesala' bang luk kudeng ineh. Aleg amé' sembayang déi' Gilgal idi Baitel, idi aleg pejani' su ineh bang ngadan Tuhan luk mulun. 16Lun Israil metueh niat mepad kudeng kerubau. Kudeng apehké Ui miak maman nedeh mepad kudeng anak dumba déi' bang laman? 17-18Lun Israil ucet ngerawé akang. Ideh perurum nelun mabuk. Ideh na ugka' pasét idi meluun teh ideh pian ku igu', baken ubur ngaceku do'. 19Ideh tigio aceh roh luk malid nedeh mepad kudeng barui, idi allah-allah luk inandeh sembayang na miak ngedengan nedeh.
Currently Selected:
HOSIA 4: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
