HOSIA 13
13
Ukum Israil Luk Kekiped
1Mon kareb pupu Epraim nepebala, lun baken matot. Amung pupu Israil luk baken matot. Amung pupu Israil luk baken nengedita' Epraim. Iamo' lun Epraim mesala' ngaceku sembayang inan Baal, pad ideh miak pitayen. 2Ideh na ugka' nganau' sala'; ideh nganau' akang belawan luk inandeh sembayang. Ideh nganau' akang ratnan pirakdeh, ratnan terawé lemulun, idi luk ruen ticu' lemulun. Kebaladeh, “Do' maré baré kuandeh!” Kudeng apehké lemulun pian muen akang ineh, ieh ineh akang dengan ayu sapi' deléi! 3Idi denak-denak lemulun ini na idi, mepad kudeng laput luk pa pekak, idi mepad kudeng ipup luk buro kareb mét idang. Ideh mepad kudeng lipang padé luk mepalid ku bui rat su luk inan rumik, idi mepad kudeng rabpun kareb ngelak.
4Kebala Tuhan, “Ui ini Tuhan Allah muyuh luk nenguit nemuyuh remuat rat bang bawang Masir. Kareb ineh muyuh na ngiti Allah baken rat Negku. Ui ini sebuleng Lun Nengulun nemuyuh. 5#Bad 8.11–17 Ui nengasa' nemuyuh déi' su luk ali-ali kareb merikan. 6Iamo' kareb muyuh nesemuet bang bawang luk do', idi muyuh mebor pad muyuh medita' niat idi mekelupan Negku. 7Ngaceku ineh Ui miak ngeramit nemuyuh mepad kudeng balang. Mepad kudeng kuir Ui miak ngabang nemuyuh. 8Ui ngurak nemuyuh mepad kudeng beruang tineh luk nepatad ratnan anakneh idi ngerarak nemuyuh. Mepad kudeng balang Ui miak petacu kuman nemuyuh, idi ngerarak nemuyuh mepad kudeng pung luk meliput.
9“O lun Israil Ui miak ngaté nemuyuh! Idéké luk miak ngedengan nemuyuh? 10#1 Sem 8.5–6 Muyuh nemutuh aceh raca' idi lun luk ngimet. Iamo' kudeng apehké ideh miak ngulun pupu ini? 11#1 Sem 10.17–24; 1 Sem 15.26 Dengan usehKu Ui nemaré raca'-raca' kuan muyuh, idi teh dengan gatehKu Ui nengalap nedeh rat nemuyuh.
12“Kekamen Israil luk dat idi sala'neh pangeh inayud, idi amung-amung surat pangeh dinug. 13Israil miak ngalap ulun sen, iamo' na ieh pian. Ieh mebacé mepad kudeng anak luk malé mebpeh rat bang nakan tinanneh, iamo' na ieh remuat! 14#1 Kor 15.55 Ui na pian muit pupu ini ratnan su luk inan até, idi ngulun nedeh ratnan lalud até ineh. O até, do' amé' nedeh dengan galihmu! O su luk inan até, do' amé' nedeh dengan usagmu! Na Ui méi' inan pupu ini. 15Sagan tu pana' Israil temubu' mepad kudeng uduh, Ui miak maré bui luk melau' rat pa busat aco, pad arur idi bued abpa'deh mekeket, idi amung-amung luk meraga miak uenneh ngusag. 16Israil na miak na ngeranih bua'-bua' sala'neh, ngaceku ieh sikal metueh ratnan Allah. Amung anak itinneh miak maté bang bunu'; anak luk isuut pana' miak bebaten bunu' Israil luun tana', idi teh decur luk mali' miak teraden.”
Currently Selected:
HOSIA 13: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
