IBERANI 4

Ratnan Semuet Bang Luk Inan Ucu' Luk Pijani' Allah

1Allah pangeh nenecan aceh pejani' kuan tau ratnan semuet bang luk inan ucu' denganNeh. Do' tau matot pad seburur rat arang muyuh na ketecan déi' liang. 2Ngaceku Bala luk Do' pangeh bida' kuan tau, mepad kudeng ideh ineh teh; iamo' bada' luk pindenger ineh na miak ngacing peruan kuandeh, ngaceku na ieh dinengan ratnan anu kuan lemulun luk ninger ineh. 3#Nani 95.11 Ngaceku tau luk pangeh manu ini semuet bang luk inanNeh ucu' maya' kudeng luk panegh bilaNeh,

“Mepad kudeng Ui pangeh nepebulung dengan usehKu:

‘Idi na tu-tu ideh miak semuet bang luk inanKu ucu'!’ ”

Ieh nepebala kudeng ineh sagan pana' amung-amung kekamen ineh pangeh inau' temina' rat pun-pun tana'. 4#Pud 2.2 Ngaceku inan aceh ayat luk pangeh bilaNeh ratnan aco luk ketudu' mepad kudeng ini, “Idi Allah nucu' bang aco luk ketudu' ratnan amung-amung kekamenNeh.” 5#Nani 95.11 Sekua' teh Ieh nepebala kudeng ini, “Idi na tu-tu ideh ineh miak semuet bang luk inanKu ucu'.” 6Lemulun luk neninger Bala luk Do' atun na miak semuet bang su luk inan Allah ucu', ngaceku ideh na manu. Kudeng pieh kudeng ineh, inan lun baken luk miak semuet bang su luk inanNeh ucu'. 7#Nani 95.7 Ini pangeh ginala', ngaceku Allah nengeletep aceh aco luk baken luk titen, “Aco Sini.” Allah nepebala ratnan ineh tuda'-tuda' lak muci ratnan ineh bang Nani Ubur Daud, bang ayat luk bila atun ineh,

“Bang aco sini, kudeng muyuh ninger bala Allah,

aleg muyuh ngetueh niat muyuh.”

8 # Bad 31.7; Yus 22.4 Kudeng Yusak pangeh nenguit nedeh semuet bang luk inandeh ucu' dengan Allah, kali' rungen Allah na neneten aco luk baken muci ratnan ineh. 9Kudeng pieh kudeng ineh, kali' rungen pangeh litep aceh kareb luk inan ucu' kuan pupu Allah. 10#Pud 2.2 Ngaceku lemulun luk pangeh nesemuet bang luk inan Allah ucu' ineh, ieh pangeh nucu' ratnan kekamenneh sebuleng, mepad kudeng luk inau' Allah. 11Ngaceku ineh, do' tau ngekél burur tau semuet bang luk inan Allah ucu' ineh, pad seburur pana' na miak mebpeh, mepad kudeng ideh luk nengelaba ukum.

12Bala Allah ineh mulun idi melalud, idi meluun tadem ratnan pelapet luk tadem pekop, idi kuman medalem pad matad ulun idi roh, idi buku tulang idi isud, idi miak ngukum amung-amung terawé idi pian niat tau. 13Na luk idi anun-anun luk uen ngelinged kuan Allah. Iamo' amung-amung pudut megala' idi mukab pa kiungNeh. Idi tau maré or kuanNeh ratnan kekamen tau.

Yésus Imam Luk Meluun Rayeh

14Ngaceku ineh, do' tau ngimet amo anu ineh. Ngaceku tau inan Imam Rayeh luk pangeh nengelaba langit, ieh ineh Yésus, Anak Allah. 15Ngaceku na luk idi Imam Rayeh kuan tau luk na méi' inan amung-amung laya' tau, iamo' luk pangeh nengalap tutun bang luk amung-amung mepad kudeng tau, idi teh Ieh na mesala'. 16Ngaceku ineh do' tau amé' matun kerusi katu Allah dengan niat luk mekuu', pad tau ngalap éi' idi katu luk ngedengan netau bang kareb luk petulu.

Currently Selected:

IBERANI 4: BLD

Highlight

Copy

Compare