IBERANI 1

Bala Allah Lemaba AnakNeh

1Bang kareb luk mon Allah megéi' pebala kuan tepun tau maya' tuda-tuda' dalan dengan dila' nabi-nabi. 2Iamo' kekipedneh Ieh nepebala kuan tau lemaba AnakNeh luk inau'Neh lutep pad miak ngalap luk amung-amung, idi rat Neneh teh pangeh inau' amung-amung luk pinudut. 3Ieh merasat ku rasat rayeh Allah; Ieh mepad ayu dengan ulun Allah. Ieh ngimet luk amung-amung dengan balaNeh luk melalud. Kareb Ieh pangeh nengiu' amung-amung sala', idi Ieh netudo pa tinueh Luk Meluun Rayeh déi' dita'.

Anak Ineh Meluun Ligan Ratnan Melaikat

4Anak ineh inau' meluun rayeh ratnan melaikat mepad kudeng ngadan luk biré Allah Neneh meluun rayeh ratnan ngadandeh. 5#Nani 2.7; 2 Sem 7.14; 1 In 17.13 Ngaceku Allah na nepebala nan melaikat-melaikatNeh,

“Iko ini AnakKu;

Aco sini Ui nenganak Namu.”

Idi teh, Allah na nepebala inan seburur melaikat,

“Ui ini mangun ku TamanNeh,

idi Ieh pana' mangun ku AnakKu.”

6 # Bad 32.43 Idi teh kareb Anak buleng ineh inuitNeh iné' bang tana', idi Ieh nepebala,

“Do' melaikat-melaikat Allah

tekeradung sembayang Neneh.”

7 # Nani 104.4 Idi ratnan melaikat-melaikat ineh, Ieh nepebala,

“Ieh mudut melaikat-melaikatNeh mangun ku bui,

idi lun dukenNeh ku budung apui.”

8 # Nani 45.6–7 Iamo' ratnan AnakNeh Allah nepebala,

“KerusiMu O Allah, inan ruked-ruked,

idi rukud luk matu, ieh ineh rukud ImetMu.

9Iko mawa ku luk matu, idi megateh ku luk dat;

ineh punneh Iko panegh inumau Allah TuhanMu,

ku umau awang meluun ratnan amung-amung lun denganMu.”

10 # Nani 102.25–27 Idi teh, kebalaNeh,

“Iko ini, O Tuhan nengerareng tana' ini rat pun-pun,

idi langit ineh pana' inau' ticu'Mu.

11Amung-amung ineh miak musag, iamo' Iko luk meruked;

amung-amungneh ineh miak melu, mepad kudeng kibung.

12Mepad kudeng tarub Iko miak ngelulun neneh,

idi mepad kudeng aceh kibung amung-amung ineh miak misu'.

Iamo' Iko luk na misu',

idi Iko na miak mengered.”

13 # Nani 110.1 Melaikat sapehké luk inanNeh nepebala,

“Tudo Iko pa tinuehKu,

pad Ui ngebeneh bunu'-bunu'Mu

mangun ku tapin kukudMu?”

14Idéké melaikat-melaikat ineh? Bakenké amung-amung ini roh luk ngakem kuan Allah, luk icukNeh ngedengan lemulun luk ngalap ulun luk meruked, pad ideh miak ngasa' nedeh?

Currently Selected:

IBERANI 1: BLD

Highlight

Copy

Compare