PUDUT 38
38
Yahuda Idi Tamar
1Kareb ineh teh Yahuda nenecan kinanak-kinanakneh idi iné' tudo dengan Hira, seburur lun Adulam. 2Idi su ineh, Yahuda nepapu' seburur anak decur lun Kanaani, ngadanneh Sua. Idi ieh nengaweh neneh, 3idi decur ineh mali' idi nenganak aceh anak deléi luk titenneh Er. 4Idi ieh mali' baruh teh, idi nenganak aceh anak deléi luk titenneh Onan. 5Idi ieh mali' baruh teh, idi nenganak aceh anak deléi luk titenneh Sela. Idi Yahuda tudo déi' Kesib kareb awanneh nenganak Sela ineh.
6Idi Yahuda nengalap aceh decur kuan Er, anakneh luk atun ineh, idi ngadan decur ineh Tamar. 7Iamo' Er ineh dat pa kiung Tuhan. Ngaceku ineh Tuhan nengaté neneh. 8Idi kebala Yahuda ni Onan, “Do' iko amé' pamung dengan awan kinanakmu, idi ngaweh neneh ku libal kinanakmu, pad kinanakmu inan inul.” 9Iamo' Onan nekali' ratnan inul luk kudeng ineh baken kuan dieh; ngaceku ineh kareb ieh nepamung dengan awan kinanakneh, na ieh nepamung dengan awan kinanakneh, na ieh sikal nganau' inul neneh, ngaceku inul ineh maya' ngadan kinanakneh. 10Idi amung luk inau'neh ineh dat pa kiung Tuhan. Ngaceku ineh Tuhan negaté neneh teh. 11Idi kebala Yahuda ni Tamar ibanneh ineh, “Do' iko tudo dengan na ngaweh bang ruma' tamanmu, pad macing anakku Sela ineh rayeh”—ngaceku Yahuda matot Sela pana' maté, kudeng dueh kinanakneh ineh. Idi Tamar nuli'.
12Muci ratnan ineh, idi anak Sua, luk awan Yahuda ineh, naté. Idi kareb Yahuda pangeh netemido neneh, idi ieh iné' matun nelun luk muting buluh dumbaneh déi' bawang Timna dengan Hira lun Adulam luk rurumneh ineh. 13Idi kebala lun ni Tamar, “Ibanmu amé' déi' Timna sikal muting buluh dumbaneh.” 14Idi decur ineh nengelengu ayungneh luk tinula'. Idi ieh nengayung idi nengebpu kiungneh. Idi ieh netudo munung tanga' bawang Enaim, luk muneng ku dalan amé' déi' Timna. Ngaceku ieh nekali' Sela ineh pangeh rayeh, idi nateh ieh biré ku awanneh.
15Kareb Yahuda nenier neneh, idi ieh nengerawé neneh seburur decur luk mesawa', ngaceku ieh nengebpu kiungneh. 16Idi Yahuda neguta dalan su luk inan decur ineh, idi kebalaneh, “Do', anun luk pianmu?” Idi na ieh kali' decur ineh ibanneh.
Idi kebala decur ineh, “Anunké luk barénmu negku?”
17Kebala Yahuda, “Ui miak maré aceh anak amék kuanmu.”
Idi kebala decur ineh, “Do' iko maré aceh taan pad macing iko maré neneh.”
18Idi Yahuda nengitun neneh, “Anunké taan luk barénku namu?”
Idi kebala decur ineh, “Do' maré susing etumu dengan abetneh idi rukud luk bang paladmu ineh.” Idi ieh nemaré amung ineh neneh. Idi ieh nepamung neneh. Pangeh ineh Tamar mali'. 19Idi ieh nengelengu ebpu kiungneh, idi nengayung ku ayungneh luk tinula'.
20Idi Yahuda nemaré anak amék ineh iten lun rurumneh, Hira. Idi ieh nengecuk neneh nguli' taanneh ineh ratnan decur ineh, iamo' na Hira nekali' neneh. 21Idi kebalaneh nelun bang bawang Enaim, “Iapehké decur luk mesawa' luk tudo dei' iring dalan ineh?”
Idi kebaladeh, “Tungé' na luk idi decur luk mesawa'.”
22Idi ieh nelemubed iné' ni Yahuda, kebalaneh, “Na ui nepapu' neneh, idi teh kebala lun bang bawang ineh negku, ‘Na luk idi decur luk mesawa' tungé'.’ ”
23Idi kebala Yahuda, “Nima' neneh ngimet binaweh ineh kuanneh, pad ideh na situnga netau. Ui nenutun maré amék ini kuanneh, iamo' na iko nepapu' neneh.”
24Pangeh teluh bulan, idi lun nemada' ni Yahuda, kebaladeh, “Tamar, ibanmu ineh pangeh pasét, idi nekini ieh kebatek.”
Idi kebala Yahuda, “Do' nguit neneh remuat idi ngeseb neneh.”
25Kareb ieh inuitdeh, idi decur ineh nengecuk seburur matun ibanneh, kebalaneh, “Ui kebatek ratnan lemulun luk kuan binaweh ini. Siruh, idéké luk kuan susing etu ineh dengan abetneh idi rukud ini?”
26Idi Yahuda nengamo, kebalaneh, “Decur ini meluun siri rat negku, ngaceku na ui maré neneh ku awan anakku Sela.” Idi na Yahuda pamung rudap neneh peh.
27Kareb Tamar malé nenganak, megala' ieh anak rapid. 28Idi kareb ieh nenganak, sebuleng anak nengulang ticu'neh, idi decur luk mileh ngimet lun nenganak nengakem ticu'neh, idi ieh nengabet aceh gitian luk mesia', kebalaneh, “Ini luk neremuat atun.” 29Iamo' anak ineh nenginat ticu'neh lemubed, idi kinanakneh nebpeh. Idi kebala decur luk mileh ngimut lun nenganak ineh, “Metueh tu iko pad iko neremuat!” Ngaceku ineh ideh neneten ngadanneh Paris. 30Pangeh ineh kinanakneh neremuat luk inabet ku gitian mesia' luun ticu'neh. Idi ngadanneh titen Sera.
Currently Selected:
PUDUT 38: BLD
Highlight
Share
Compare
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
