GALATIA 4

1Idi teh seruked lemulun luk ngalap babpat ineh anak teh, sesuut pana' na ieh baken ratnan demulun, sagan pana' ieh luk kuan amung-amung. 2Iamo' ieh pa liang taman luk nengasa' neneh idi lun luk nengimet neneh pad macing kareb luk litep tamanneh. 3Kudeng ineh teh tau ini, kareb tau anak-anak, tau mangun ku demulun pa liang roh-roh luk ngimet tana'. 4Iamo' pangeh karebneh meriput Allah nengecuk AnakNeh luk tinganak ratnan seburur decur idi luk inau' mebeneh pa liang Ukum lun Yahudi, 5pad Ieh nguli' amung-amung lemulun luk inau' mebeneh pa liang Ukum ineh, pelé tau mangun ku anak Allah.

6Ngaceku muyuh mangunku anak-anak, idi Allah pangeh nengecuk Roh AnakNeh semuet bang niat tau luk nawar, “Ama', O Ama'!” 7#Rum 8.15–17 Ngaceku ineh na iko mangun ku demulun teh, iamo' mangun ku anak; idi ngaceku iko mangun ku anakNeh, kali' rungen iko mangun ku lemulun luk ngalap babpat Allah pana'.

Rapang Paulus Ngaceku Lun Galatia Neraruh

8Iamo' atun muyuh na miti Allah, idi muyuh mangun ku demulun kuan akang luk baken allah luk matu. 9Iamo' nekini, ngaceku muyuh miti Allah, meluun teh ngackeu muyuh initi Allah, ngudehké muyuh teketed idi lemubed kuan roh-roh tana' ini luk metueh ngimet, luk melaya' idi masi', pad muyuh mangun ku demulundeh sekua' teh? 10Muyuh ngerawé aco, bulan, kareb luk rayeh, idi lak teh. 11Ui merapang ku muyuh! Kian kél idi erurku ngaceku muyuh mo'-mo' lek.

12O kinanak-kinanakku, ui mutuh nemuyuh mangun kudeng ui ini. Ngaceku ui pana' mepad kudeng muyuh. Idi sesuut pana' na muyuh nganau' sala' kuanku. 13Muyuh kali' punneh ui nemada' Bala luk Do' kuan muyuh mon. Ngaceku ui mét. 14Iamo' na muyuh nengedat idi nenala' negku, sagan pana' étku mangun ku aceh tutun kuan muyuh. Iamo' muyuh nenganak negku mepad kudeng nganak melaikat Allah. Muyuh nenganak negku mepad kudeng nganak Keristus pana'. 15Atun muyuh mawang niat. Anun luk nangun? Uni kali' idi kudeng miak, muyuh pian nakul ilung mateh muyuh idi maré kuanku. 16Pangehké ui mangun ku bunu' muyuh ngaceku mada' luk matu kuan muyuh?

17Lun baken ineh mekél nakap nemuyuh, iamo' baken maya' pinian luk do'; iamo' ideh sikal ngetatau nemuyuh pad muyuh teketed maya' nedeh. 18Idi kél ineh megéi do' kudeng inan terawé luk do', idi baken kareb ui idi dengan muyuh mo'. 19O anak-anakku, ngaceku muyuh ui mabeh luk mét mepad kudeng nenganak teh, pad Keristus ruen bang nemuyuh. 20Ui geregan kudeng ui idi dengan muyuh nekini pad ui miak ngisu' terawéku pa kiung muyuh, ngaceku ui merapang ratnan ulun muyuh.

Pinginud Hagar Idi Sara

21Nima' negku ngitun nemuyuh luk sikal mangun ku demulun Ukum: naké muyuh ninger bala Ukum ineh? 22#Pud 16.15; 21.2 Kebalaneh, Ibrahim ineh nenginul dueh anak deléi, sebuleng ratnan demulun decur, idi sebuleng ratnan decur luk lun do'. 23Iamo' anak luk ratnan demulun decur ineh pangeh tinganak ratnan ulun lemulun; iamo' anak luk ratnan decur luk lun do' pangeh tinganak ngaceku ratnan pejani'. 24Ini mangun ku aceh luk pinginud, ngaceku dueh decur ini mangun ku dueh pejani', sebuleng rat Pegkung Sinai luk nenganak anak-anak luk mangun ku demulun, ieh ineh Hagar. 25Idi Hagar ineh pinginud Pegkung Sinai déi' bawang Arab, idi pinginud Yerusalim luk nekini, ieh ineh aceh demulun dengan anak-anakneh. 26Iamo' Yerusalim luk déi' dita', ieh ineh luk lun do', idi tinan tau. 27#Yes 54.1 Ngaceku pangeh inayud,

“Do' iko mawang niat, O decur luk na anak!

Do' iko mawang niat idi ngitang, O decur luk na nekali' mét nenganak!

Ngaceku decur luk tican ineh meluun ula' anakneh

ratnan decur luk inan awan.”

28Iamo' muyuh ini, O kinanak-kinanakku, anak-anak Allah, maya' jani'Neh mepad kudeng Isak. 29#Pud 21.9 Kareb ineh anak uk tinganak kudeng luk pekalai nengedereh anak luk tinganak maya' lalud Roh Allah. Kudeng ineh teh nekini. 30#Pud 21.10 Iamo' kudeng apehké bala Surat Allah? Kebalaneh, “Nala' demulun luk decur ineh dengan anakneh, ngaceku anak demulun luk decur ineh na miak ngalap babpat pad-pad dengan anak decur luk lun do' ineh.” 31Ngaceku ineh, O kinanak-kinanakku, tau ini baken anak demulun decur ineh, iamo' anak decur luk lun do' ineh.

Currently Selected:

GALATIA 4: BLD

Highlight

Copy

Compare