GALATIA 2

Paulus Dengan Rasul-Rasul Luk Baken

1 # Kek 11.30; 15.2 Pulu' apat lak muci ratnan ineh, ui numak teh iné' déi' Yerusalim dengan Barnabas. Idi ui nenguit ni Titus denganku. 2Ui iné' déi' maya' bala luk linio Allah kuanku. Idi ui nemada' nelun rayehdeh setau'-setau' ratnan Bala luk Do' luk bida'ku arang lun pupu baken ineh, pad kekamenku luk nekini idi luk nepangeh na mo'-mo' peh. 3Sagan pana' Titus, lun denganku ineh, pupu lun Grika, nateh ieh sinaad ruen nunat, 4sagan pana' tuda'-tuda' lemulun siayu mangun ku kinanak pangeh semuet dengan lulem, pad nier puit kai, luk kai nengalap bang Keristus Yésus. Ideh sikal nguit nekai mangun ku demulun. 5Idi sekua' pana' na kai nengebeneh burur kai kuandeh, pad kai miak ngasa' Bala luk Do' luk matu ineh kuan muyuh.

6 # Bad 10.17 Iamo' ratnan lemulun luk pangeh titen lun rayeh — idi ngadandeh na inan ulek kuanku; ngaceku Allah na mili' ayu lemulun — mepad kudeng luk bilaku, na ideh nemada' luk mebaruh kuanku. 7Iamo' setuneh ideh nengamo idi Allah pangeh negeletep negku mada' Bala luk Do' kuan lun pupu baken, mepad kudeng Ieh nengeletep Pétrus mada' Bala luk Do' kuan lun Yahudi. 8Allah luk nemaré tueh kuan Pétrus pad ieh mangun ku rasul kuan lun Yahudi, Ieh teh nemaré tueh kuanku mangun ku rasul kuan lun pupu baken. 9Kareb ideh pangeh nenier katu luk pangeh biré kuanku ini, idi Yakub, Pétrus, idi Yahya, luk ayuneh mangun ku lun nguyut, nepetabi' nekai dueh Barnabas, mangun ku aceh tanu' perurum, pad kai ini amé' mada' nelun pupu baken, iamo' ideh amé' mada' nelun Yahudi. 10Iamo' ideh pian nekai ngerawé nelun masi' arangdeh, idi ini luk ui geregan tu-tu nganau'.

Paulus Ngayud Ni Pétrus Déi' Antiokia

11Iamo' kareb Pétrus nacing déi' Antiokia, idi ui nengayud neneh pa kiung lun mula', ngaceku megala' lawéneh sala'. 12Kareb nateh lun luk icuk Yakub nacing, ieh pangeh nekuman dengan lun pupu baken; iamo' kareb ideh nacing, idi ieh neburo idi nenecan nedeh ngaceku matot nelun luk metueh mada' ratnan sunat ineh. 13Idi lun Yahudi luk baken pana' pad-pad nesiayu dengan Pétrus pad Barnabas pana' rinaruh ratnan lawédeh ineh. 14Kareb ui nenier idi kekamen lemulun ineh na petulu dengan luk matu ratnan Bala luk Do', idi ui nemala kuan Pétrus pa kiung lun mula', “Kudeng iko seburur lun Yahudi mulun maya' ayu lun pupu baken, idi baken maya' ayu lun Yahudi, kudeng apehké iko ngesaad lun pupu baken ini mulun maya' ayu lun Yahudi?”

Lun Yahudi Idi Lun Pupu Baken Uen Ngulun Ngaceku Anu

15Kali' rungen tau tinganak lun Yahudi idi baken tinganak lun pupu baken luk mesala'. 16#Nani 143.2; Rum 3.20; Rum 3.22 Iamo' kai kali' idi lemulun ruen matu ngaceku manu inan Yésus Keristus, baken ngaceku maya' Ukum. Kai pana' pangeh manu inan Keristus Yésus, pad kai ruen matu ngaceku anu kai nan Keristus, baken ngaceku maya' Ukum. Ngaceku seburur pana' nateh luk ruen matu ngaceku maya' Ukum. 17Kudeng kai metueh nakap dalan sikal ruen matu bang Keristus, idi kai ini pana' siren kudeng lun mesala' mepad kudeng lun pupu baken, inanké Keristus lawa sala'? Na tu-tu! 18Kudeng ui lemubed maya' aceh dalan luk pangeh ticanku, idi megala' ui lun mesala'. 19Ngaceku ratnan Ukum ui ini naté nepuit ratnan Ukum, pad ui miak mulun kuan Allah. 20Ui pangeh sinalib dengan Keristus. Idi ulunku ini baken ui teh, iamo' Keristus luk mulun bang negku. Ulunku luk nekini, ieh ineh ulun ratnan anu inan Anak Allah luk pangeh mawa negku idi luk nemaré bururNeh ngaceku ui. 21Na ui ngarung katu Allah. Kudeng luk matu ineh nacing dengan dalan Ukum Musa, idi Keristus pangeh naté mo'-mo'.

Currently Selected:

GALATIA 2: BLD

Highlight

Copy

Compare