YEHISKIEL 9
9
Yehiskiel Nier Yerusalim Uen Ngukum
1Idi ui neninger Allah ngitang, kebalaNeh, “Amé' tungé' amung muyuh luk ngukum bawang ini, idi nguit repapeh muyuh.” 2Petacu anem burur lemulun nacing munung tanga' luk déi' liang, ieh ineh tanga' luk pa tinueh busat aco. Idi anid bururdeh inan repapeh luk ku ngaté bang paladdeh. Idi seburur lemulun luk ngayung ku kibung pu nemaya' nedeh, idi inan luk ku ngayud bang paladneh. Idi amungdeh iné' tuped muneng ku bubpun luk ratnan tekaling.
3Idi rayeh Allah lun Israil luk merasat numak ratnan pung luk inan ilad ineh idi nemubuh iné' munung tanga' Ruma' Allah. Idi Tuhan nenawar lemulun luk ngayung ku kibung pu, kebalaNeh, 4#Lin 7.3; 9.4; 14.1 “Do' amé' nalan aput bawang Yerusalim, idi nganau' aceh tanu' luun madu' amung lemulun luk mesusa' niat ngaceku amung kekamen luk dat luk ruen lun bang bawang ineh.”
5Idi ui neninger bala Allah kuan lun baken ineh, “Maya' neneh nalan aput bawang idi ngaté lemulun. Aleg méi' inan seburur lemulun pana'. 6Ngaté lemulun luk mengered, anak adi' deléi idi decur pana', tinan-tinan idi anak-anak. Iamo' aleg ngurat lemulun luk inan tanu' luun madu'neh. Ngimun ieni bang ruma'ku.” Idi ideh nengimun ngaté lun rayeh luk tuped pa atun Ruma' Allah.
7Kebala Allah nedeh, “ngelutak Ruma' Allah. Manu' natad ineh ku butung. Kai muyuh!” Idi ideh nengimun ngaté lemulun bang bawang ineh.
8Kareb ideh ngaté lemulun, ui sebuleng luk idi. Ui netekeradung luun tana' idi nengitang, kebalaku, “O Tuhan Allah, miakké Iko ngaté amung-amung lun Israil luk ketecan ngaceku usehMu nan bawang Yerusalim?”
9Idi Allah nengor balaku, “Lun Israil idi lun Yahuda pelaba sala' ngaceku kekamendeh luk dat. Ideh nengaté lemulun aput tana' idi nemanu' Yerusalim ku kekamendeh luk dat. Kebaladeh, ‘Tuhan pangeh nenecan bawang tau. Idi teh Tuhan na nier netau.’ 10Ui na muit seburur pana' idi na Ui nganau' kuandeh mepad kudeng ideh nenganau' kuan lun baken.”
11Idi lemulun luk ngayung ku kibung pu ineh nepebala inan Tuhan, “Ui pangeh nemaya' balaMu.”
Currently Selected:
YEHISKIEL 9: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
