YEHISKIEL 33
33
Allah Ngeletep Ni Yehiskiel Mangun Ku Lun Luk Matar
(Yeh 3.16–21)
1Kebala Tuhan negku, 2“O lemulun, mada' pupumu ratnan luk mangun kareb Ui ngacing bunu' kuan aceh bawang. Lun luk bang bawang ineh mili' rat arangdeh seburur lun luk matar. 3Kareb ieh nier bunu' macing ieh nateg tawak pad mada' nelun mula'. 4Kudeng seburur ninger uni tawak iamo' na maya' ineh, idi bunu' macing idi ngaté neneh, idi ieh mabeh sala' aténeh sebuleng. 5Ieh maté ngaceku sala'neh sebuleng, ngaceku ieh na nemaya' uni tawak ineh. Kudeng ieh pangeh nemaya', ieh miak mulun. 6Iamo' kudeng lun luk matar ineh nier bunu' macing idi na nateg tawak, bunu' ineh miak amé' ngaté lun luk mesala' ineh. Idi lun luk matar ineh mabeh sala' atédeh pa kiungKu.
7“O lemulun, Ui ngikit namu mangun ku lun luk matar kuan amung pupu Israil. Iko ngalap balaKu, idi ngacing bada'Ku nedeh. 8Kudeng Ui mala seburur lemulun luk dat miak maté, iamo' iko na mada' neneh pad ieh misu', pelé ieh mulun, kali' rungen ieh maté dengan na uren, iamo' iko mabeh sala' aténeh pa kiungKu. 9Kudeng iko mada' lemulun luk dat, iamo' ieh na uleg ratnan sala'neh, ieh miak maté denga na uren, iamo' iko miak mulun.”
Lemulun Luk Nganau' Sala' Miak Maté
10Kebala Tuhan negku, “O lemulun, mada' nelun Israil ratnan luk megéi' beléndeh, kebaladeh, ‘Kai meberat niat ngerawé sala' idi kekamen kai luk dat. Kai iuk-iuk melaya'. Kudeng apehké kai miak mulun?’ 11Mada' nedeh, Ui ini Tuhan Allah luk mulun na sikal nier lun luk mesala' maté. Ui pian nier neneh uleg ratnan sala' idi mulun. O Israil, ugka' nganau' kekamen luk dat. Ngudehké iko sikal maté?
12“O lemulun, mada' nelun Israil, kudeng lemulun luk matu nganau' sala', kekamenneh luk do' luk inau'neh atun na miak ngulun neneh. Kudeng lemulun luk dat ugka' nganau' luk dat, ieh na miak kumin, idi kudeng lemulun luk matu ngimun nganau' sala', ieh na miak mulun teh. 13Kudeng Ui pejani' maré ulun kuan lemulun luk matu, iamo' ieh merapet ku kekamenneh luk do' luk inau'neh atun, idi ieh nganau' sala', Ui na ngerawé kekamenneh luk do' ineh. Ieh miak maté ngaceku sala'neh. 14Kudeng Ui mala kuan lemulun luk dat, Iko miak maté, idi ieh uleg ratnan sala' idi nganau' luk matu, 15ieh ineh ieh ngelubed duduk luk ilapneh ku libal luk kinabit, idi ieh maré lemubed luk pinoneh — kudeng ieh uleg ratnan sala', pad ieh maya' ukum luk maré ulun, na ieh maté, iamo' ieh mulun. 16Ui maré do' ratnan sala' luk pangeh kikemneh. Ieh miak mulun ngaceku ieh nenganau' luk matu.
17“Idi pupumu pebala luk inau'Ku na matu! Setuneh kekamendeh luk na matu. 18Kareb lemulun luk matu ugka' nganau' luk do' idi nganau' luk dat, ieh miak maté ku ineh. 19Kareb lemulun luk dat ugka' nganau' sala' idi nganau' luk matu, ieh ngalap ulun. 20Israil, iko pebala, Ui na nganau' luk matu, iamo' Ui ngukum namu maya' kekamenmu.”
Bala Ratnan Tabpa Yerusalim
21 #
2 Rac 25.3–10; Yer 39.2–8; 52.4–14 Limeh aco, bulan pulu' bang lak luk kepulu' dueh muci ratnan kai tiban, seburur lemulun luk neburo rat Yerusalim iné' mada' negku ratnan tabpa bawang ineh. 22Idi nalem kareb nateh ieh nacing, ui nekali' lalud Tuhan idi denganku. Kenebpa kareb lemulun ineh nacing, Tuhan nemaré negku peburi' baruh teh.
Sala' Lun Mula'
23Kebala Tuhan negku, 24“O lemulun, lun luk tudo bang bawang Israil luk inusag pebala, ‘Ibrahim ineh seburur lemulun mo', idi aput bawang ini biré neneh, iamo' kai ini mula', kali' rungen tana' ini kai kuan.’
25“Mada' nedeh, kudeng ini bala Tuhan Allah: Muyuh kuman dara' perapu dengan uang. Muyuh sembayang inan akang idi ngaté lemulun. Kudeng apehké muyuh ngerawé tana' ini muyuh kuan? 26Muyuh merapet ku pelapet muyuh. Iamo' kekamen muyuh pelaba dat. Amung-amung muyuh pasét. Kudeng apehké muyuh ngerawé tana' ini muyuh kuan?
27“Mada' nedeh, Ui ini Tuhan Allah luk mulun, idi kali' rungen lemulun ineh luk tudo bang bawang luk inusag miak pitayen. Ideh luk tudo punang arur miak kenen pung luk mesangit. Ideh luk sigapung luun pegkung idi bang lubang batu miak maté ku ét. 28Ui nganau' bawang ineh mangun ku su luk ali-ali. Tuehdeh luk inandeh medita' niat miak mabud. Pegkung Israil mangun dat ali, pad seburur pana' nateh luk nalan su ineh. 29Kareb Ui ngukum pupu ineh ngaceku sala'deh, pad bawangdeh mangun ku su luk ali-ali, idi ideh miak kali' Ui ini Tuhan.”
Luk Mangun Muci Ratnan Bada' Nabi
30Kebala Tuhan, “O lemulun, pupumu megéi' pebala ratnan iko, kareb ideh papu' iring libung bawang idi munung tanga' ruma'deh. Kebaladeh, ‘Do' tau amé' ninger bala Tuhan.’ 31Idi pupuKu mepamung pian ninger balamu, iamo' na ideh maya' luk belénmu nedeh. Ideh ngubur balamu, iamo' ideh pian ngalap usin mo'. 32Sirendeh iko mepad kudeng aceh lun luk menani ratnan awa tana' ini idi luk nateg gita. Ideh ninger amung balamu, iamo' na ideh maya'. 33Iamo' kareb amung balamu mangun — idi amung ineh na miak na mangun — idi ideh miak kali' seburur nabi idi arangdeh.”
Currently Selected:
YEHISKIEL 33: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
