YEHISKIEL 3
3
1Kebala Allah, “O lemulun, do' iko kuman surat ini, idi amé' pebala nelun Israil.”
2Idi ui nengukab tangku, idi Ieh nemaré surat ineh kenenku. 3#Lin 10.9–10 KebalaNeh, “O lemulun, kuman surat ini luk barénKu namu. Ngebor batekmu ku ineh.” Ui nekuman ineh, idi ieh mén mepad kudeng duru' tebikan.
4Idi kebala Allah, “O lemulun, amé' nelun Israil, idi mada' nedeh ratnan luk belénKu namu. 5Na Ui ngecuk namu amé' nan pupu luk mikat buri'. Ui ngecuk namu amé' nelun Israil. 6Kudeng Ui ngecuk namu amé' inan pupu luk rayeh luk mikat buri' luk na kali'mu, ideh pian ninger balamu. 7Iamo' lun Israil na pian ninger balamu. BalaKu pana' ideh na ninger. Amung-amungdeh metueh niat na maya' bala. 8Nekini Ui miak nganau' namu metueh niat idi mekuu' mepad kudeng ideh. 9Ui miak nganau' namu meluun tueh ratnan batu, idi mepad tueh kudeng batu luk meraga. Aleg iko matot inan lemulun luk sikal metueh.”
10Kebala Allah, “O lemulun, ninger do'-do' idi ngerawé amung-amung luk belénKu namu. 11Idi amé' inan pupumu luk tiban idi mada' nedeh ratnan luk belénKu nedeh, kudeng ideh ninger balaKu, kian na lek.”
12Idi Roh Allah nengikit negku, idi ui neninger aceh arod pa ketedku luk mepad rayeh kudeng uni ruyuh tana', kebalaneh, “Ngubur rayeh Tuhan luk déi' dita'!” 13Ui neninger uni ilad pung ineh mebabpet déi' arang gawa', idi teh uni roda ineh pana' mepad rayeh kudeng uni ruyuh tana'. 14Kareb Roh Allah nengikit idi nenguit negku, idi ui dat niat idi museh, idi lalud Tuhan neketukan luunku. 15Ui iné' su luk inan lun luk tiban tudo déi' Tel Abib, luk déi' tangeb Abpa' Kibar, idi ui netudo déi' tudu' aco kinioneh dengan pelaba awa.
Allah Ngecuk Ni Yehiskiel Mangun Ku Lun Luk Matar Bawang
(Yeh 33.1–9)
16Pangeh tudu' aco, idi Tuhan nepebala negku. 17KebalaNeh, “O lemulun, Ui nganau' namu mangun ku lun luk matar bawang kuan pupu Israil. Do' iko mada' balaKu nedeh. 18Kudeng Ui mala seburur lemulun luk dat miak maté, idi kudeng iko na ngecuk neneh ngisu' kekamenneh pad ieh mulun, ieh miak maté bang sala'neh, idi iko luk mabeh aténeh pa kiungKu. 19Kudeng iko mada' lemulun luk dat, idi na ieh ugka' nganau' luk dat, ieh miak maté bang sala'neh, iamo' Ui ngulun namu.
20“Kudeng lemulun luk do' ngimun nganau' luk dat, idi Ui tumen abpung kuanneh, kali' rungen ieh maté kudeng iko na mada' neneh. Ieh miak maté ngaceku sala'neh, idi Ui na ngerawé kekamen luk do' luk inau'neh atun. Idi iko mabeh aténeh pa kiungKu. 21Kudeng iko mebpeng lemulun luk do' na nganau' sala, pad ieh ninger balamu idi na nganau' sala', ieh miak mulun, idi iko pana' uenKu ngulun.”
Yehiskiel Na Miak Peburi'
22Idi lalud Tuhan neketukan luunku, idi ui neninger balaNeh negku, “Tumui iko idi amé' luun raked. Idi Ui miak pebala namu déi'.”
23Id ui iné luun raked, idi su ineh ui nenier rayeh Tuhan, mepad kudeng luk sinierku déi' tangeb Abpa' Kibar. Idi ui netekeradung luun tana', 24iamo' Roh Allah nesemuet bang negku idi nenui negku. Idi kebala Tuhan negku, “Do' iko muli', semuet bang ruma'mu idi ngitek tanga' ruma'mu ineh. 25O lemulun, iko miak batin ku kalat, pad iko na miak mepai. 26Ui miak ngaté urat dila'mu, pad iko na miak mada' lemulun ini luk sikal metueh. 27Idi kareb Ui pebala namu teh idi iko miak peburi', iko miak pebala nedeh, ‘Kudeng ini bala Tuhan.’ Sebuang miak ninger balamu, idi sebuang na ninger, ngaceku ideh ineh aceh pupu luk sikal metueh.”
Currently Selected:
YEHISKIEL 3: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
