YEHISKIEL 27
27
Tido Kuan Sur
1Kebala Tuhan negku, 2“O lemulun, do' menani aceh tido kuan Sur, 3ieh ineh bawang luk tangeb abpa' rayeh idi luk pepua' dengan amung lemulun luk tudo tangeb abpa' rayeh. Kudeng ini bala Tuhan Allah:
‘O Sur, iko medita' niat ratnan iko metaga.
4Ruma'mu ineh luun abpa' rayeh.
Lun luk mudut namu nganau' namu kudeng kapal luk do' ayu.
5Amung bangarmu inau'deh ratnan kayuh tongor,
idi kayuh tumuh rat Lebanon mangun ku dirimu.
6Ideh nengalap kayuh luk meraben rat Basan ku buému.
Ideh nenganau' apinmu ratnan kayuh tongor rat Siprus.
idi nengayung ineh ku gading.
7Kibung luk ku nganau' kapal nalan
inau' ratnan kibung pu luk tibaruh rat Masir,
pad megala' rat mado.
Apomu inau' ratnan kibung luk meluun do',
idi luk sia' merirem rat pulau Elisa.
8Lunmu luk mué ineh rat Sidon idi Arwad;
idi lunmu luk mileh nengimet kapal.
9Lun ngakem kayuh luk luun kapal,
ieh ineh lun mileh rat Gebal.
Lun ngimet kapal rat anid kapal luun abpa' rayeh,
iné' pepua' bang amung-amung kadaimu.’
10“Lun pebunu' rat Parsi, Lidia idi Libia, inan bang bawehmu. Ideh nengekito utap idi tupideh bang ruma' bawehmu. Idi teh ideh luk nengacing ubur kuanmu. 11Lun pebunu' rat Arwad nematar libungmu, idi lun rat Gamad nematar pudutmu luk medita'. Ideh nengekito utapdeh luun aladmu. Idi teh ideh luk nenganau' namu metaga.
12“Iko pepua' déi' Tarsis, idi nengalap pirak, belawan, semara' luk mebuda', idi semara' luk mitem ku libal binawehmu luk mula' ineh. 13Iko pepua' déi' Grika, Tubal, idi Misek idi nengalap demulun idi tekaling ku libal binawehmu. 14Iko nengalap kuda ku ngeruid keréta, kuda luk nguit lemulun, idi aya' luk seupa kuda idi seupa keladai rat Bait Togarma ku libal binawehmu. 15Lun Dedan pepua' namu, idi lun rat bang bawang luk tangeb abpa' rayeh nemaré gading idi kayuh luk mitem ku libal binawehmu. 16Lun Aram nemelih binaweh luk pisuenmu. Ideh nemaré batu luk bata' uduh, kibung luk sia' merirem, kibung luk tibaruh, kibung pu, batu luk meraga rat bang abpa' rayeh, idi batu luk mesia' ku libal binawehmu. 17Lun Yahuda idi lun Israil nemaré padé, duru', umau saitun, idi umau luk do' buen ku libal binawehmu. 18-19Damsik nemelih binaweh luk pisuenmu idi nemaré abpa' anggur rat Helbon idi buluh dumba rat Sahar ku libalneh. Ideh nemaré belawan luk tinuno idi umau luk do' buen ku libal sebuang binawehmu. 20Lun Dedan nemaré kibung luk ku tapin keted kuda ku libal binawehmu. 21Lun Arab idi lun rayeh bawang Kedar nemaré anak dumba, dumba, idi amék ku libal binawehmu. 22Lun luk pepua' rat Siba idi Rama nemaré umau luk do' buen, batu luk meraga, idi amas ku libal binawehmu. 23Bawang Haran, Kani, Eden, lun luk pepua' rat Siba, bawang Asur, idi Kilmad pepua' namu. 24Ideh nemasui ayung luk do', kibung luk sia' merirem, idi kibung luk tibaruh, ugam luk do' taga, idi abet idi kalat luk do'. 25#Lin 18.11–19 Binawehmu ineh inuit maya' kapal luk meluun rayeh.
“Iko mepad kudeng kapal déi' luun abpa' rayeh,
luk mepanu' ku binaweh luk meberat.
26Kareb lunmu luk mué nguit namu maya' abpa' rayeh,
iko mekarem mado rat ku tangeb,
ngaceku bui rat pa busat aco.
27Amung binaweh idi lun luk ngimet kapal,
lun ngakem kayuh idi lun luk pepua',
amung lun pebunu' luk bang kapal—
neturem bang abpa' rayeh kareb kapalmu nekarem.
28Arod lun luk ngimet kapal luk nened
pedingeren déi' tangeb abpa'.
29“Nekini amung kapal pangeh tican.
Idi amung lun luk ngimet kapal pangeh numak luun tangeb.
30Ideh temido namu dengan abuh luun uluhdeh
idi luun bururdeh teh.
31Ideh ngiki uluhdeh idi nacung,
idi ideh nangi' ku dat niatdeh namu.
32Ideh menani aceh tido kuanmu,
‘Idéké miak uen maad dengan Sur,
luk ungeng bang abpa' rayeh?
33Kareb binawehmu inuit maya' abpa' rayeh,
iko nemaré petap kuan anid pupu.
Raca' nangun ku lun do'
ku binawehmu luk mula'.
34Nekini iko nekarem bang abpa' rayeh.
Iko neturem bang ribaruh.
Binawehmu idi amung lun tebarinmu,
netutu' maya' namu bang abpa' rayeh.’
35“Amung lun luk tudo tangeb abpa' rayeh megagap ku ukummu. Raca'deh pana' matot pad kiungdeh mebudi. 36Iko metutu' ruked-ruked, idi amung lun luk pepua' pelaba tot, ngaceku kian ideh mekaneh ukummu lek.”
Currently Selected:
YEHISKIEL 27: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
