EPESUS 6

Anak-Anak Idi Taman Tinan

1 # Kol 3.20 O anak-anak, maya' bala taman-tinan muyuh bang Tuhan, ngaceku ineh luk matu. 2“Ngedita' taman idi tinanmu” (idi ineh ukum luk pun-pun dengan sebuleng pejani'), 3#Pur 20.12; Bad 5.16 “pad mangun ku luk do' kuan muyuh, idi muyuh mulun mio bang tana' ini.”

4 # Kol 3.21 O taman-tinan, aleg nganau' anak muyuh mét niat, iamo' ngasa' nedeh idi mada' nedeh dengan bada' luk petulu pa kiung Tuhan.

Demulun Idi Tuandeh

5O demulun, do' muyuh maya' ukum lun luk kuan nemuyuh dengan matot idi megegker, idi dengan niat luk do' mepad kudeng muyuh maya' Keristus. 6Aleg dengan siayu mepad kudeng sikal ngawang niat lemulun, iamo' mepad kudeng demulun Keristus luk maya' pian Allah dengan amung niatdeh. 7Idi do' muyuh ngakem dengan niat luk geregan mepad kudeng kuan Tuhan idi baken kuan lemulun. 8#Kol 3.22–25 Ngerawé do'-do'! Anid-anid burur, do' demulun idi lun luk baken demulun, miak ngalap tabpar ratnan Tuhan, maya' kekamen luk do' luk ruenneh.

9 # Kol 4.1; Bad 10.17; Kol 3.25 O lun luk kuan demulun ineh, do' muyuh nganau' kudeng ineh teh kuandeh, idi ugka' ratnan rangat buri' muyuh, idi ngerawé do'-do', Lun luk kuan nedeh idi luk kuan nemuyuh pana' idi déi' surga, idi Ieh na mili' ayu lemulun.

Ayung Allah Luk Meriput

10Idi kekipedneh, do' muyuh mangun metueh bang Tuhan idi dengan tueh laludNeh ineh. 11Idi do' ngayung ku amung ayung Allah, pad muyuh tuman ratnan amung-amung saluk Iblis. 12Ngaceku tau baken pekakem dengan lemulun, iamo' dengan amung-amung tueh, lalud, idi raca' luk ngimet luk medacem, idi amung-amung lalud ada' luk dat déi' arang gawa'. 13Ngaceku ineh do' muyuh ngayung ku amung ayung Allah, pad muyuh tuman kareb aco luk dat, idi tuped meraben kareb muyuh pangeh nenganau' luk amung-amung.

14 # Yes 11.5; 59.17 Ngaceku ineh do' muyuh tuped meraben, idi awa' muyuh betin ratnan luk matu, idi ngayng ku kuyu' belawan luk matu, 15#Yes 52.7 idi kél muyuh mada' Bala luk Do' luk nguit pedo' mangun ku kasut muyuh. 16Idi megéi ngayung ku utap, ieh ineh manu, idi dengan ineh miak muyuh ngilep amung-amung ileb apui luk ratnan Luk Dat ineh. 17#Yes 59.17 Idi do' muyuh ngalap tupi ulun, idi pelapet Roh, ieh ineh bala Allah. 18Nganau' amung ineh dengan sembayang idi putuh. Megéi' sembayang dengan Roh. Ngaceku ineh, do' lutep idi aleg metalang niat. Megéi' sembayang kuan lun manu. 19Idi mutuh kuanku pad bala Allah barén negku kareb ui temina' mada', pelé ui mekuu' mada' luk inalum ratnan Bala luk Do' ineh. 20Ngaceku Bala luk Do' ui mangun ku lun duken, sagan pana' ui kiling. Mutuh kuanku pad ui mekuu' mada' ratnan Bala luk Do', maya kudeng luk petulu belénku peh.

Tabi' Luk Kekiped

21 # Kek 20.4; 2 Tim 4.12 Tikikus, kinanak luk inan tau mawa idi luk lutep bang kekamen Tuhan, miak mada' nemuyuh ratnan ui, pad muyuh kali' kudeng apeh ulunku. 22#Kol 4.7–8 Ineh punneh ui ngecuk neneh amé' nemuyuh, pad mada' nemuyuh ratnan kudeng apeh ulun kai amung, pelé muyuh bukenneh.

23Do' Allah Taman idi Tuhan Yésus Keristus maré awang idi awa dengan anu kuan amung-amung kinanak. 24Idi do' katu Allah ngedengan amung-amung lemulun luk mawa inan Tuhan tau Yésus Keristus dengan awa luk na miak maté.

Currently Selected:

EPESUS 6: BLD

Highlight

Copy

Compare