EPESUS 3

Kekamen Paulus Kuan Lun Pupu Baken

1Idi ini punneh ui ini, luk kiling ngaceku Keristus Yésus kuan muyuh lun pupu baken, sembayang pa kiung Allah. 2Kali' rungen muyuh pangen neninger ratnan kekamen luk biré Allah kuanku maya' katuNeh, pad ui ngacing luk do' kuan muyuh. 3Allah nengegala' luk inalumNeh ineh kuanku dengan dalan bala luk linio, mepad kudeng luk pangeh inayudku kuan muyuh atun dengan sesuut bala. 4Idi kudeng muyuh maca' ineh, miak muyuh kali' luk nekali'ku ratnan luk inalum Keristus. 5Idi mon luk inalum ineh nateh bida' kuan lemulun, mepad kudeng luk pangeh ginala' Roh nekini kuan rasul-rasul idi nabi-nabi luk meligan. 6#Kol 1.26–27 Ini luk inalum ineh: dengan dalan Bala luk Do' ineh lun pupu baken ngalap babpat perian Allah pad-pad dengan lun Yahudi. Ideh mangun ku babpat sebuleng burur, idi ngalap babpat bang jani' Allah luk pijani'Neh bang Keristus Yésus.

7Ui pangeh inau' ku lun luk mada' Bala luk Do' maya' katu Allah luk biréNeh negku ngaceku tueh laludNeh ineh. 8Idi kuanku ini luk pelaba dat rat arang amung-amung lun manu, katu ineh pangeh biré pad ui miak mada' Bala luk Do' kuan lun pupu baken ratnan do' Keristus luk na kekipedneh, 9idi ngegala' kuan amung lemulun kudeng apeh pian Allah luk inalum miak uen ngacing. Allah luk nemudut luk amung-amung pangeh nenapung ineh tuda'-tuda' io, 10pad bang kareb ini tuda'-tuda' ileh Allah miak badén sidang kuan amung-amung luk ngimet idi lalud luk déi' surga. 11Allah nenganau' ini maya' pinianNeh luk meruked luk inau'Neh lutep bang Keristus Yésus Tuhan tau. 12Bang Keristus ineh, idi ngaceku anu tau Neneh, tau mekuu' amé' matun Allah dengan merapet. 13Ngaceku ineh ui mutuh pad muyuh na metalang niat ngerawé derehku kuan muyuh luk mangun ku peruan kuan muyuh.

Awa Keristus

14Idi ini punneh ui tekeradung pa kiung Taman ineh. 15Rat Neneh anid-anid pupu déi' surga idi bang tana' pana' inan ngadan. 16Idi ui mutuh pad Ieh maré kuan muyuh ratnan rayehNeh luk mela, lalud ratnan RohNeh luk nganau' nemuyuh metueh bang niat muyuh, 17pad Keristus tudo bang niat muyuh ngaceku anu. Ui mutuh pad muyuh inan uat idi diri bang awa, 18pad muyuh dengan amung lun manu miak kali' tuda' kirayehneh, kikadangneh, kidita'neh, idi kidalemneh, awa Keristus. 19Matu, do' muyuh kali' awa Keristus — sagan pana' awaNeh ineh na miak kali' kidalemneh — pad muyuh miak uen manu' ku amung-amung peruan Allah dengan elaNeh.

20Idi kuan Allah luk melalud nganau' dengan ela-ela anun-anun luk pituen tau idi luk teruayen tau pana', maya' laludNeh luk ngakem bang netau: 21idi rayeh kuan Allah bang sidang idi bang Keristus Yésus, pad macing amung-amung inul, ruked-ruked peh. Amin.

Currently Selected:

EPESUS 3: BLD

Highlight

Copy

Compare