DANIEL 3
3
Nebukadnesar Ngecuk Amung-Amung Lemulun Sembayang Inan Akang Amas
1Raca' Nebukadnesar nengecuk nganau' aceh akang amas, kidita'neh iwa' ngepulu' kaki idi pipangneh iwa' kaki. Idi ieh nengerareng neneh luun Raked Dura bang bawang Babil. 2Idi raca' nengecuk amung-amung lun rayehneh mepamung — ieh ineh amung lun luk inul raca', pengulu-pengulu, idi lun luk pa liang pengulu, lun luk mileh ngedengan raca, lun luk ngimet usin, lun luk mutut ukum, idi lun luk pa liangdeh, idi teh amung-amung lun rayeh bang anid-anid babpat bawang. Ideh titeng ngerayeh aco ngaceku akang luk inau' Nebukadnesar. 3Amung lun rayeh luk nepamung ngerayeh aco ineh netuped pa atun akang ineh. 4Idi seburur lun luk nated bala raca' nengitang, kebalaneh, “O muyuh luk rat anid-anid bawang idi pupu, idi teh luk manid-manid buri'! 5Idi kareb muyuh ninger uni serupit, suling, giula', idi gita, idi amung-amung luk muni pana', idi do' muyuh tekeradung idi sembayang inan akang amas luk inau' Raca' Nebukadnesar. 6Idé-idé luk na tekeradung sembayang miak petacu talan bang tetel apui.” 7Idi kareb ideh neninger amung-amung luk muni ineh, idi lemulun rat anid-anid bawang, pupu, idi teh luk manid-manid buri' netekeradung sembayang inan akang amas luk inau' Raca' Nebukadnesar.
Teluh Burur Lun Yahudi Inadu'
8Idi tuda'-tuda' burur lun Babil pian ngadu' nelun Yahudi. 9Idi kebaldeh ni Raca' Nebukadnesar, “Do' raca' mipu ulun! 10Iko pangeh nengecuk amung-amung lemulun tekeradung sembayang inan akang amas kareb ideh ninger amung-amung luk muni ineh. 11Idi idé-idé luk na tekeradung sembayang neneh miak talan bang tetel apui. 12Inan tuda'-tuda' burur lun Yahudi luk icukmu ngimet bawang Babil — ieh ineh Sadrak, Misak, idi Abednego. Ideh ngelaba bala raca'. Na ideh sembayang inan akangmu, idi na ideh tekeradung pa kiung akangmu ineh.”
13Idi raca' petacu megateh niat idi nengecuk nediteluh amé' matun neneh. 14Idi kebalaneh nediteluh, “Sadrak, Misak, idi Abednego, matuké meteluh ara' sembayang inan allahku idi na tekeradung pa kiung akang luk inau'ku ineh? 15Ngaceku ineh, kareb meteluh ninger uni serupit, suling, giula', gita, idi amung-amung luk muni ineh, do' meteluh tekeradung sembayang inan akang ineh. Kudeng na, muyuh miak talan bang tetel apui. Inanké allah luk miak ngulun nemeteluh?”
16Idi Sadrak, Misak, idi Abednego nengor bala raca', kebala diteluh, “O raca', na ulekneh kai ngor balamu. 17Kudeng Allah luk inan kai sembayang miak ngulun nekai ratnan tetel apui, idi ratnan laludmu, kali' rungen Ieh miak nganau' luk kudeng ineh. 18Iamo' kudeng Ieh na ngulun nekai, O raca', kali' rungen kai na miak sembayang inan allahmu, idi kai na miak tekeradung pa kiung akang amas luk inau'mu ineh.”
Lun Yahudi Ineh Tila' bang Apui
19Idi Nebukadnesar pelaba useh nediteluh, pad kiungneh mesia' ku gatehneh. Ieh nengecuk nelun dukenneh ngelau' tetel ineh tudu' kua' kilau'neh. 20Idi ieh nengecuk nelun pebunu'neh luk meluun tueh ngabet nediteluh idi nala' nediteluh bang tetel apui. 21Idi ideh nengabet nediteluh luk inayung ku kuyu' idi kuyu' boyor, idi teh sigar. Idi ideh nenala' nediteluh bang tetel apui. 22Idi ngaceku ukum raca' pelaba berat, idi apui ineh pelaba lau', pad lun luk nenated nediteluh amé bang tetel ineh neseb ku apui ineh. 23Idi Sadrak, Misak, idi Abednego luk inabet ineh nebpeh luun uned apui ineh.
24Idi Nebukadnesar negagap. Idi ieh nengitun nelun mileh ineh. “Naké tau nengabet teluh burur lemulun idi nenala' nediteluh bang tetel apui?”
Idi kebaladeh, “Matu, O raca'.”
25Idi kebala raca', “Ngudehké ui nier apat burur lemulun nalan bang apui ineh? Na ideh inabet idi na ideh neseb — idi luk keapat ineh mepad kudeng aceh allah ayuneh.”
Lun Yahudi Ineh Pinuit Idi Kinikit
26Nebukadnesar iné matun tanga' tetel apui ineh idi nengitang, kebalaneh, “Sadrak! Misak! Abednego! Demulun Allah luk Meluun Rayeh! Remuat meteluh!” Idi diteluh petacu neremuat. 27Idi amung lun luk inul raca', pengulu-pengulu, lun luk pa liang pengulu, idi lun mileh luk ngedengan raca' nepamung pian nier mediteluh luk na neseb ku apui. Abpuk diteluh pana' nateh netegeruit ku apui ineh, ayung diteluh pana' nateh neseb, idi na buen rabpun luun diteluh.
28Kebala raca', “Ngubur Allah Sadrak, Misak, idi Abednego. Ieh nengecuk melaikatNeh ngulun nelun luk merapet idi sembayang Neneh. Diteluh nengelaba ukumku idi na matot maté, ngaceku na diteluh pian tekeradung sembayang inan allah baken ratnan Allahdeh sebuleng.
29“Idi nekini ui maré aceh ukum: Kudeng idé-idé ratnan anid-anid bawang, pupu, idi luk ratnan manid-manid buri' ngedat Allah Sadrak, Misak, idi Abednego, ieh miak uen natek, idi ruma'neh miak uen ngusag. Na luk idi allah baken luk miak ngulun kudeng ini.”
30Idi raca' nemaré kuan Sadrak, Misak, idi Abednego kekamen luk meluun rayeh bang bawang Babil.
Currently Selected:
DANIEL 3: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
