DANIEL 1
1
Bada' Ratnan Daniel Idi lun Rurumneh
(Dan 1.1—6.28)
Anak Adi' Pupu Israil Déi' Ruma' Raca' Nebukadnesar
1Bang lak luk keteluh kareb imet Yoyakim raca' Yahuda, idi Nebukadnesar raca' Babil nengerieng Yerusalim idi nengelibut bawang ineh. #2 Rac 24.1; 2 In 36.5–7 2Tuhan nenima' Nebukadnesar nengakem Raca' Yoyakim idi ngalap sebuang binaweh rat bang Ruma' Allah. Ieh nenguit nelun luk tiban amé' ruma' akangneh déi' Babil, idi ieh nenganug binaweh ineh bang su luk inan nganug luk meraga.
3Idi raca' ineh nengecuk ni Aspenas, lun rayeh lun luk dukenneh mili' rat arang lun Israil luk tiban ineh, tuda'-tuda' anak adi' deléi luk inul raca' idi luk inul lun do', 4ieh ineh tuda'-tuda' luk metaga idi luk na anun-anun luk dat luun bururdeh, luk mileh, idi luk petap sekola', luk saget mileh, pad ideh miak ngakem bang ruma' raca'. Idi Aspenas miak mada' nedeh maca' idi ngayud buri lun Babil. #2 Rac 20.17–18; 24.10–16; 2 In 36.10; Yes 39.7–8 5Idi raca' nengecuk maré nedeh akan idi abpa' anggur ratnan téng raca' anid-anid aco. Pangeh ideh sibada' bang teluh lak ideh miak tuped pa kiung raca'. 6Arang lemulun luk pinili' ineh, Daniel, Hanania, Misail, idi Asaria, amungdeh inul Yahuda. 7Lun rayeh lun duken raca' nemaré nedeh ngadan baruh, ieh ineh Beltesasar, Sadrak, Misak, idi Abednego.
8Iamo' Daniel na pian uen ngelutak ku akan idi abpa' anggur rat bang ruma' raca'. Ieh nemutuh Aspenas, lun rayeh lun luk duken ineh, ngedengan neneh. 9Idi Allah nenganau' Aspenas méi' kuan Daniel. 10Iamo' kebala Aspenas ni Daniel, “Ui matot inan raca'. Ieh nemaré ukum ratnan luk kenen idi luk rupen muyuh. Kudeng muyuh na do' ulun mepad kudeng anak-anak adi' luk baken ineh, ui pitayenneh lek.”
11Idi Daniel iné' matun lun matar luk litep Aspenas matar neneh idi teluh burur lun baken ineh. 12“Nutun nekai kinio pulu' aco,” kebala Daniel. “Maré nekai kikid irin idi abpa' talang. 13Maad nekai dengan anak adi' luk kuman ratnan téng raca' idi nganau' anun-anun luk petulu dengan ayu kai.”
14Idi ieh nenima' nedeh nutun akan ineh kinio pulu' aco. 15Pangeh ineh idi ideh do' ulun idi meluun tueh rat nelun baken luk nekuman ratnan téng raca'. 16Ngaceku ineh lun matar ineh na nemaré akan raca' teh iamo' kikid irin mo' sebuleng.
17Allah nemaré inan apat anak adi' ineh ileh ratnan amung-amung surat idi teh terawé luk medalem. Idi Ieh nemaré ni Daniel ileh ngelio luk sinier idi nupi pana'.
18Idi abud teluh lak luk litep raca', idi Aspenas nenguit amung anak adi' ineh amé' matun Nebukadnesar. 19Idi raca' nepebala nedeh, idi ieh nekali' Daniel, Hanania, Misail, idi Asaria meluun do' ratnan anak adi' luk baken. Idi ideh mangun ku lun duken raca'. 20Kareb raca' nengitun nedeh ratnan anun-anun luk medalem idi luk mikat uen mutut, ieh kali' nedeh pulu' kua' ileh ratnan lun luk mileh mangun idi luk mileh nier bang aput imetneh. 21Idi Daniel nengakem su ineh pad macing Kores mangun ku raca' Babil.
Currently Selected:
DANIEL 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
