KEKAMEN RASUL-RASUL 27

Paulus Maya' Kapal Amé' Run

1Kareb pangeh pinutut ratnan kai maya' kapal amé' déi' Italia, idi nemaré ni Paulus idi tuda'-tuda' lun baken luk tinutup, amé' matun seburur lun rayeh lun pebunu', ngadanneh Yulius, ratnan “Baweh Raca' Rum.” 2Kai numak bang aceh kapal luk rat déi' Adramitium, luk temina' nalan maya' iring tana' Asia, idi kai nenalan. Idi inan selemulun luk nemaya' nekai, ieh ineh Aristarkus, lun Makedonia rat bawang Tesalonika. 3Kenebpa kai nacing déi' Sidon. Idi Yulius méi' ni Paulus, idi nenima' neneh amé' nier lun rurumneh, pad ideh maré luk pianneh. 4Kai nenalan rat déi', idi nemaya' iring pulau Siprus, ngaceku inan bui rat pa atun kai. 5Kai neguta abpa' Kilikia idi Pampilia, idi nacing déi' Mira, ieh ineh tana' Likia. 6Idi déi' lun rayeh lun pebunu' nekali aceh kapal rat Iskandria luk nalan amé' Italia, idi kai tinawarneh umak bang kapal ineh.

7Idi tuda'-tuda' aco kinioneh kai nemaya' kapal ulai-ulai, idi dengan mesusa' kai nacing muneng Kenidus. Idi ngaceku bui nengesabeng nekai, idi kai nenalan maya' iring bawang Kriti lemaba Salmoni. 8Idi dengan mesusa' kai nemaya' iring bawang ineh, idi nacing inan abpa' luk melitong, ngadanneh Lidung luk Do', muneng ku bawang Lasia.

9Idi mio kai ucu' déi', pad inan luk ngesabeng lawé kai, ngaceku aco mawa' lun Yahudi pangeh nepelaba, idi Paulus nengubuk nedeh, 10kebalaneh, “O lun muyuh, ui kali' lawé tau rat nekini medereh idi mula' rugi' teh, baken kuan binaweh idi kapal ini mo', iamo' kuan burur tau sebuleng.” 11Iamo' lun rayeh pebunu' ineh meluun rapet nan lemulun luk ngimet kapal idi tuan luk kuan kapal ineh teh ratnan luk bila Paulus. 12Ngaceku su luk inan kapal mapit ineh na do' kareb meteneb. Ngaceku ineh mula' lemulun nengecuk nedeh maya' kapal rat déi', merapet ideh miak nacing déi' Pinik idi tudo déi' kareb meteneb. Pinik ineh su luk inan kapal mapit déi' bawang Kriti, luk amé' matun pa dayeh busat aco idi pa lod busat aco.

Barui Déi' Abpa' Rayeh

13Kareb inan bui luk ulai-ulai rat pa kabing busat aco, ideh nengerawé pangeh nacing luk piandeh, idi ideh nenganak betuh idi nenalan maya' tangeb bawang Kriti. 14Iamo' na mio nacing aceh barui luk rayeh déi', ngadanneh Pa Lod Busat Aco. 15Kareb kapal ineh inuit bui ineh, idi na miak metueh rat neneh, idi kai nenima neneh manud. 16Kai selinged sesuut kareb kai iné' pa kabing busat aco aceh pulau luk isuut, ngadanneh Kauda. Idi su ineh dengan mesusa' kai nengabet alud luk bang kapal ineh. 17Ideh nenginat alud ineh, idi nengangel kapal ku tuda'-tuda' abet, idi ngaceku matot kapal mepasad luun bada, su luk metutun muneng ku Libia, idi ideh nenurun kén kapal ineh idi nenima' kapal ineh manud. 18Iamo' barui ineh iuk metueh, idi kenebpa ideh luk bang kapal nenala' binaweh bang abpa' rayeh. 19Idi kesoriak ideh nenala' repapeh kapal pana' bang abpa' rayeh. 20Idi kai na miak nier mateh aco idi gituen bang tuda'-tuda' aco, kinioneh, idi barui ineh na ugka', pad kekipedneh kai na tupu merapet miak mulun peh.

21Kareb lemulun pangeh mio na nekuman, idi Paulus netuped arangdeh idi nepebala, “O lun muyuh, kudeng muyuh neninger buri'ku atun, ‘Aleg nalan rat Kriti,’ na tau ngalap mesabeng idi rugi' ini teh. 22Iamo' nekini ui ngecuk nemuyuh lutep niat, ngaceku seburur pana' rat arang tau nateh miak metutu', iamo' kapal ini sebuleng mo'. 23Ngaceku malem ina aceh melaikat Allah luk inanku sembayang iné' negku, 24kebalaneh, ‘Aleg iko matot, O Paulus; na miak na iko tuped pa kiung raca' Rum, idi matu Allah maré kuanmu amung-amung lemulun luk denganmu bang kapal ineh.’ 25Ngaceku ineh, O lun muyuh, lutep mo' niat muyuh ngaceku ui manu inan Allah, idi mepad kudeng bala luk biréNeh kuanku, ieh ineh teh luk miak mangun. 26Iamo' na miak na tau mepasad inan aceh bawang.”

27Kareb macing alem luk kepulu' apat, idi kai manud-manud bang Abpa' Adria. Kareb lélé tangal dacem lun luk ngakem bang kapal ineh nengerawé iuk amé' muneng ku tangeb. 28Idi ideh nenala' betuh luk ku nutun kidalemneh; idi ideh nekali' kidalemneh dueh ngepulu' depeh; idi na mado rat déi' teh idi ideh nenala' betuh ineh sekua' teh idi ideh nekali' kidalemneh pulu' limeh depeh. 29Ideh matot mepasad luun batu-batu, idi ideh nenurun apat betuh rat pa ulin, idi nesembayang mutuh aco macang. 30Idi lun luk ngakem bang kapal ineh nenutun buro rat bang kapal ineh. Ideh nenurun alud bang abpa', ayudeh sikal nurun betuh rat pa atun kapal. 31Iamo' kebala Paulus nelun rayeh lun pebunu' ineh, “Kudeng na lemulun ineh ketecan bang kapal, idi amung-amung muyuh pana' na miak mulun.” 32Idi amung-amung lun pebunu' ineh pana' nenetak abet alud ineh, idi nenima' neneh manud.

33Kareb masat aco, idi Paulus pana' nengecuk nedeh kuman, kebalaneh, “Muyuh nenganét pulu' apat aco nekini, idi ruked ini muyuh na nekuman anun-anun pana'. 34Ngaceku ineh ui mutuh nemuyuh kuman, pad muyuh metueh idi na maté. Ngaceku sengurat abpuk pana' na miak metutu' ratnan uluh seburur muyuh.” 35Kareb Paulus pangeh nemala kudeng ini, idi ieh nengalap ruti idi ieh nesembayang inan Allah pa kiung amung-amungdeh. Idi ieh nemuri' ruti ineh idi ieh nengimun kuman. 36Pangeh ineh amung-amungdeh nengalap tueh sesuut, idi ideh nekuman. 37Kinula' kai bang kapal ineh dueh ngeratu tudu' ngepulu' anem burur. 38Kareb amung-amung kai pangeh mebor, idi ideh nenala' padé bang abpa' rayeh, pad kapal ineh meran.

Kapal Mekarem

39Kareb macang aco, na ideh miti tangeb ineh, iamo' sinierdeh aceh lidung luk inan nara, idi ideh nengerawé kudeng miak, do' nima' kapal ineh mepasad déi'. 40Idi ideh nenangal abet betuh ineh, idi ideh nenecan amung ineh bang abpa' rayeh, idi nenetak abet ulinneh, idi nenganak kén luk ku nganau' alud ineh nalan maya' bui, idi petacu iné' matun tangeb ineh. 41Iamo' ideh nacing su luk metutun, idi kapaldeh ineh nepasad pa ludungneh pad na miak sigio, iamo' pa ulinneh nabud nebila' ngaceku ribut luk metueh.

42Idi lun pebunu' sikal ngaté nelun luk tinutup ineh, pad seburur pana' na lemangui idi buro. 43Iamo' lun rayeh lun pebunu' ineh sikal ngulun ni Paulus, idi ieh nemebpeng nedeh na maya' piandeh. Idi ieh nengecuk nedeh luk mileh lemangui ubpa rat bang kapal idi lemangui amé' nan tangeb, 44idi lemulun luk ketecan miak ngimet bangar idi ngimet bila' kapal ineh. Idi kudeng ineh teh amung-amung kai mulun idi nacing inan tangeb.

Currently Selected:

KEKAMEN RASUL-RASUL 27: BLD

Highlight

Copy

Compare