KEKAMEN RASUL-RASUL 11

Bala Pétrus Kuan Sidang Déi' Yerusalim

1Rasul-rasul idi kinanak-kinanak luk déi' bawang Yudia neninger ratnan lun pupu baken ineh pangeh nengalap bala Allah. 2Kareb Pétrus numak déi' Yerusalim idi lemulun luk maya' adat sunat ineh nengilang neneh, keburi'deh, 3“Iko pangeh iné' inan lemulun luk na sinunat idi nekuman dengandeh.” 4#Pur 12.1–27 Iamo' Pétrus nengimun mada' amung luk nangun kuandeh dengan megala', keburi'neh:

5“Kareb unedku sembayang déi' bawang Yopa, idi ui nenier aceh luk sinierku, idi inan aceh luk kudeng tarub luk rayeh luk inimet anid lidungneh, inurur rat déi' langit macing negku. 6Ui nenier ineh do'-do', idi ui kali' inan puar-puar pung luk apat kukud, pung luk meliput, menipeh, idi suit. 7Idi ui neninger aceh tang luk nepebala negku, ‘O Pétrus, mudur iko, keretenmu idi kenenmu pung ineh.’ 8Iamo' keburi'ku, ‘Ara’ ui Tuhan, ngaceku nateh ui nekuman anun-anun luk dat idi melutak.’ 9Iamo' tang ineh nepebala sekua' teh rat déi' langit, ‘Luk pangeh biru’ Allah aleg iko mala neneh dat!’ 10Ini mangun teluh kua', idi pangeh ineh amung ineh ininat amé' déi' langit. 11Idi kareb ineh teh inan teluh burur lemulun luk tuped pa atun ruma' luk inan kai tudo, luk icuk rat Kaisaria amé' matun negku. 12Idi Roh nengecuk negku amé' maya' nedeh dengan na merapang, idi anem kinanak ini pana' nemaya' negku, idi kai nesemuet bang ruma' Kornelius. 13Idi ieh nemada' nekai ratnan kudeng apeh ieh nekali' melaikat ineh tuped bang ruma'neh luk nepebala neneh, ‘Ngecuk lemulun amé' déi' Yopa nawar Simun luk titen Pétrus. 14Ieh miak mada' aceh bala kuanmu, idi ratnan bala ineh iko dengan tetek ruma'mu miak ngalap ulun.’ 15Kareb uned ui pebala idi Roh Meligan netemurun luun lemulun ineh mepad kudeng luun tau kareb pun-pun. 16#Kek 1.5 Idi ui nengerawé ratnan bala Tuhan, ‘Sagan pana' Yahya nengerereb bang abpa', iamo' muyuh ini miak rerebpen bang Roh Meligan.’ 17Megala; Allah pangeh nemaré baré kuan pupu ineh mepad kudeng luk biréNeh kuan tau kareb tau manu inan Tuhan Yésus Keristus. Idéké ui ini, miakké ui mebpeng Allah?”

18Pangeh ideh neninger kudeng ini idi amung-amungdeh pirud, idi nengerayeh Allah, kebaladeh, “Kudeng pieh kudeng ineh, kuan lun pupu baken teh Allah pangeh nemaré dalan uren luk nguit amé' inan ulun.”

Sidang Déi' Antiokia

19 # Kek 8.1–4 Idi lun manu nepatad-patad ngaceku dereh luk nacing kareb até Stepanus ineh. Idi ideh neburo iné' Punikia, Siprus, idi Antiokia. Iamo' ideh nemada' bala ineh kuan lun Yahudi mo'. 20Iamo' arang lun manu ineh inan teh lun Siprus idi lun Kiréni. Idi kareb ideh nacing déi' Antiokia, ideh nemada' nelun pupu baken. Ideh nemada' Bala luk Do' ratnan Tuhan Yésus. 21Idi lalud Tuhan nengedengan nedeh, pad mula' lemulun manu idi lumi inan Tuhan.

22Idi sidang déi' Yerusalim neninger bala ratnan sidang Antiokia, idi ideh nengecuk Barnabas amé' déi'. 23Kareb ieh nacing idi nenier katu Allah, idi ieh mawang niat peh, idi ieh nemada' amung-amungdeh pad niatdeh lutep maya' Tuhan. 24Barnabas ineh selemulun luk do', idi panu' ku Roh Meligan idi anu, idi lemulun luk lumi inan Tuhan luk amé' mula'.

25Pangeh ineh Barnabas iné' Tarsus sikal nakap ni Saul. 26Kareb ieh nepapu' neneh idi ieh nenguit neneh iné' déi' Antiokia. Idi ruked selak didueh ineh netebubpun dengan sidang, idi nemada' mula' lemulun. Idi déi' Antiokia anak-anak sekola' pun-pun titen lun Kristen.

27Idi kareb ineh tuda'-tuda' nabi rat Yerusalim iné' déi' Antiokia. 28#Kek 21.10 Idi seburur rat arangdeh luk titen Agabus netuped idi nemada' dengan lalud Roh ratnan aceh iru' luk rayeh luk miak mangun aput tana' ini. (Idi iru' ineh nangun kareb imet Raca' Klaudius.) 29Idi anak-anak sekola' ineh pana' neperurum sikal maré luk baréndeh kuan amung-amung kinanakdeh luk déi' bawang Yudia maya' kinula' binawehdeh. 30Idi ideh nenganau' kudeng ineh idi nemaré luk birédeh bang ticu' Barnabas idi Saul kuan amung-amung lun rayeh ineh.

Currently Selected:

KEKAMEN RASUL-RASUL 11: BLD

Highlight

Copy

Compare