3 YAHYA 1
1
1 #
Kek 19.29; Rum 16.23; 1 Kor 1.14 Rat negku, seburur lun rayeh —
Kuan Gayus luk inanku mawa dengan matu.
2O luk inanku mawa, ui sembayang pad iko miak uen ngeperuan bang luk amung-amung, idi pad iko do' ulun — mepad kudeng niatmu pangeh nengalap do' teh. 3Ui pelaba awang niat kareb tuda'-tuda' kinanak nacing idi nemaré kali' ratnan sirimu, idi kudeng apeh iko mulun bang luk matu. 4Idi na luk idi awang negku luk meluun rayeh ratnan ini, ieh ineh ninger ratnan anak-anakku luk mulun bang luk matu.
Gayus Inubur
5O luk inanku mawa, iko lutep bang kekamen luk ruenmu kuan kinanak-kinanak tau, sagan pana' lemulun ineh sakai. 6Ideh nemaré kali' ratnan awamu pa kiung sidang tungé'. Do' ngedengan nedeh pad ideh nacu lawédeh maya' kudeng luk petulu dengan Allah. 7Ngaceku ideh nenalan ngakem kuan Keristus dengan na ngalap tabpar rat nelun lukna manu ineh. 8Ngaceku ineh do' tau lun manu ngedengan lemulun ineh, pad tau miak ngalap babpat bang kekamendeh kuan bada' luk matu ineh.
Diotrepes Idi Demitrius
9Ui nengayud tuda'-tuda' bala kuan sidang, iamo' Diotrepes luk sikal pa luundeh, na pian ngalap nekai. 10Ngaceku ineh kareb ui macing, ui pian ngegala' amung-amung luk inau'neh ineh: ieh neh kuyoneh nekai, idi balihneh pana'! Iamo' na ieh musam ku ineh. Iamo' ieh ara' nganak kinanak-kinanak tau, kareb ideh macing idi ieh mebpeng lemulun luk sikal nganak nedeh, idi nala' nedeh rat bang sidang.
11O luk inanku mawa aleg iko nginud luk dat, iamo' nginud luk do'. Lemulun luk nganau' luk do', ieh ineh ratnan Allah; idi lemulun luk nganau' luk dat ineh nateh nenier Allah.
12Amung-amung lemulun ngubur ni Demitrius. Luk matu ineh pana' ngubur neneh. Idi kai pana' maré kali' ratnan ineh, idi muyuh kali' bala kai ineh matu peh.
Tabi' Luk Kekiped
13Inan teh mula' luk belénku namu, iamo' na ui pian ngayud ku dawat idi pén. 14Iamo' na mio teh ui meraept papu' namu, idi kiteh miak pegayam petutup. 15Awang kuanmu.
Amung-amung lun rurummu maré tabi' namu. Do' maré tabi' kuan anid-anid lun rurum kiteh.
Currently Selected:
3 YAHYA 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.