2 TIMOTIUS 1

1Rat ni Paulus, rasul Keristus Yésus luk dengan pian Allah mada' pejani' ulun luk inan bang Keristus Yésus —

2 # Kek 16.1 Kuan Timotius, anakku luk inanku mawa:

Do' katu, éi', idi awang ratnan Allah Taman temurun kuanmu idi ratnan Tuhan tau Yésus Keristus.

Maré Ubur Idi Ubuk

3Ui ngubur Allah luk inanku mepicet dengan teruayen niat luk meligan maya' kudeng kekamen tepunku, idi dengan na melawa' ui ngerawé namu bang sembayangku tebaco kedangan. 4Ui ngerawé ratnan abpa' matehmu, idi ui geregan papu' namu pad awangku panu'. 5#Kek 16.1 Ui ngerawé anumu luk matu bang niatmu, luk pun-pun netudo bang niat tepunmu Lois idi tinanmu Uniki, iamo' ui pangeh merapet anu ineh idi bang niatmu teh. 6Idi ini punneh ui ngegio terawému pad iko miak ngulun baré Allah luk bang bururmu ratnan ticu'ku luk pangeh rireng luunmu ineh. 7Ngaceku Roh luk biré Alla kuan tau na ngatot netau. Iamo' RohNeh ineh maré lalud idi awa, pad tau ngimet burur.

8Ngaceku ineh aleg migu' maré kali' ratnan Tuhan tau, idi aleg migu' ratnan ui kiling ngaceku Tuhan. Iamo' do' iko pad-pad ngalap medereh ngaceku Bala luk Do' maya' lalud Allah. 9Allah nengulun netau idi nenawar netau mangun ku pupuNeh, baken maya' kekamen tau, iamo' maya' pianNeh sebuleng idi katu luk biréNeh kuan tau atun bang Keristus Yésus rat kareb luk pun-pun. 10Iamo' nekini katu ineh pangeh ginala' kuan tau dengan acing Lun Nengulun netau, ieh ineh Keristus Yésus luk pangeh nengelaya' lalud até idi luk nengegala' ulun, idi dengan Bala luk Do', Ieh pangeh nengegala' ulun lu meruked.

11 # 1 Tim 2.7 Allah pangeh nemili' negku mangun ku lun mada', idi rasul, idi guru teh. 12Ineh punneh ui ngalap medereh bang amung ini. Iamo' na ui migu', ngaceku ui kali' idé luk inanku merapet ineh, idi ui kali' Ieh melalud miak ngasa' baréku pad macing Aco ineh. 13Do' ngalap luk pinginud ratnan amung-amung bala luk matu luk pangeh pindengermu rat negku, dengan anu idi awa luk bang Keristus Yésus. 14Do' matar amung-amung luk do' ineh luk biré kuanmu, ratnan Roh Meligan luk tudo bang netau.

15Iko kali' amung-amung lemulun luk déi' tana' Asia ineh pangeh neteketed rat negku, idi arangdeh ineh Pigelus idi Hermogenis. 16Idi do' Tuhan maré éi' kuan amung uang tetek ruma' Onesiporus, ngaceku tuda'-tuda' kua' ieh nengetueh niatku, idi na ieh migu' ku kalingku, 17iamo' kareb ieh déi' bawang Rum ieh pangeh nenakap negku dengan kél pad ieh nepapu' negku. 18Do' Tuhan ngedengan neneh, pad ieh ngalap éi' ratnan Tuhan kareb Aco ineh. Iko kali' do'-do' ratnan kudeng apeh ieh nengasa' negku déi' Epesus.

Currently Selected:

2 TIMOTIUS 1: BLD

Highlight

Copy

Compare