1 TESALONIKA 3
3
1 #
Kek 17.15
Kekipedneh kai na miak tuman teh. Ngaceku ineh kai ngerawé do' kai tudo déi' Atina tuda'-tuda' io. 2Idi kai nengecuk Timotius, ieh ineh kinanak tau luk ngakem kuan Allah idi pad-pad mada' Bala luk Do' ratnan Keristus dengan kai. Kai nengecuk neneh ngedengan nemuyuh idi ngepicet anu muyuh, 3pad muyuh na lemubed ngaceku dereh ini. Muyuh sebuleng kali' amung dereh ineh mangun ku sebabpat luk pian Allah kuan tau. 4Ngaceku kareb kai idi dengan muyuh, kai nemada' nemuyuh atun ratnan kai uen ngedereh; idi muyuh kali' do'-do', ineh luk pangeh nangun. 5Ini punneh ui nengecuk Timotius amé' nemuyuh. Kareb ui na miak tuman teh, ui nengecuk neneh pad ui miak kali' ratnan anu muyuh, kian muyuh pangeh tinutun Iblis ineh pad erur kai mangun mo'-mo'.
6 #
Kek 18.5
Nekini Timotius pangeh nacing rat nemuyuh idi nenguit kuan kai bala luk do' ratnan anu idi awa muyuh. Ieh nemaré kali' ratnan muyuh megéi' do' nekai, idi ratnan muyuh geregan papu' nekai, mepad kudeng kai geregan papu' nemuyuh. 7Ini punneh bang amung-amung susa' idi dereh kai, niat kai pangeh inubuk ngaceku anu muyuh, O kinanak-kinanakku, 8ngaceku nekini kai mulun dengan do' kudeng muyuh lutep bang Tuhan. 9Idi nekini kai miak ngubur Allah ngaceku muyuh, idi ngaceku awang niat luk pangeh ilap kai pa kiung allah tau ngaceku muyuh. 10Tebaco kedangan kai mutuh rat Neneh, pad kai miak nier kiung muyuh teh, pelé kai miak ngedengan nemuyuh idi anun muyuh ruen petap.
11Do' Allah Taman tau, idi Tuhan Yésus pana' ngukab dalan pad kai macing nemuyuh. 12Idi do' Tuhan nganau' nemuyuh meluun awa seburur dengan seburur, idi inan amung-amung lemulun dengan mela, mepad kudeng kai mawa nemuyuh. 13Dengan luk kudeng ineh Ieh miak ngepicet niat muyuh, pad muyuh meligan dengan na melutak idi na mesala' pa kiung Allah, Taman tau, kareb acing Tuhan tau Yésus dengan amung-amung lun manu.
Currently Selected:
1 TESALONIKA 3: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
