1 PETRUS 4

Ulun Luk Mebaruh

1Ngaceku Keristus pangeh nengalap dereh bang burur lemulun, do' muyuh pana' ngayung ku niat luk mepad kudeng ineh teh; ngaceku lemulun luk ngalap dereh bang burur ineh, pangeh ugka' ratnan nganau' sala'. 2Rat pad sini seruked ulun muyuh luk ketecan, aleg muyuh maya' lili lemulun, iamo' pian Allah. 3Bang kareb luk atun petap sala' luk inau' muyuh maya' kekamen luk inau' lun luk na manu. Atun muyuh mulun bang luk melutak, pian burur, mabuk, idi rot luk dat. Muyuh ucet ngirup, sembayang inan akang, idi nganau' luk bibpeng ineh teh. 4Idi nekini lun luk na manu mawa nemuyuh na upun pad-pad dengandeh sikal semuet bang rot luk pelaba dat ineh, idi ideh nguyo nemuyuh. 5Iamo' ideh na miak na maré or kuan Allah luk temina' sikal ngukum lemulun luk mulun idi luk naté. 6Ineh punneh Bala luk do' ineh bida' kuan lemulun luk naté pana', pad ideh miak kumin maya' kudeng ayu lemulun, iamo' mulun kudeng maya' ayu Allah bang roh.

Ratnan Makai Baré Allah Dengan Mesiri

7Iamo' kareb luk kekiped ineh pangeh muneng. Do' muyuh ngimet burur muyuh, idi matar pad miak sembayang. 8#Bal 10.12 Idi luk pun-pun do' muyuh mawa seburur dengan seburur, ngaceku awa ineh miak mapen sala' luk mula'. 9Do' muyuh ngasa' seburur dengan luk baken dengan na dureng-dureng. 10Do' ngasa' nelun baken maya' kinula' baré luk ilap anid-anid lemulun, mepad kudeng lun ngasa' luk lutep ngimet baré Allah. 11Kudeng seburur mada', do' ieh mada' bala Allah; kudeng seburur ngasa' nelun baken, do' ieh ngasa' dengan tueh luk biré Allah, pad Allah miak uen ngerayeh bang luk amung-amung ngaceku ratnan Yésus Keristus. Idi rayeh kuanNeh, idi lalud macing ruked-ruked! Amin.

Ratnan Dereh Ngaceku Manu

12O luk inanku mawa, aleg muyuh mawa ku tutun luk rayeh luk macing luun muyuh ineh, ayu-ayu mepad kudeng sebuleng luk inan mawa pangeh macing luun muyuh. 13Iamo' do' muyuh mawang niat ngaceku muyuh miak ngalap babpat ratnan dereh Keristus, pad muyuh mepanu' ku awang, kareb rayehNeh uen ngelio. 14Kudeng muyuh uen nguyo ngaceku ngadan Keristus, samal kuan muyuh, ngaceku Roh luk rinayeh, ieh ineh Roh Allah, idi bang nemuyuh. 15Aleg seburur rat arang muyuh medereh ngaceku ieh lun ngaté, lun mano, lun luk dat, kian lun luk semuet bang gayam lun baken lek. 16Iamo' kudeng muyuh medereh ngaceku muyuh lun Kristen, aleg muyuh migu'. Iamo' ngubur Allah ngaceku muyuh ngegala' ngadan Keristus.

17Ngaceku pangeh macing karebneh ukum Allah ngimun kuan uang ruma' Allah, iamo' kudeng ukum ineh ngimun rat netau, idi anunké kekipedneh kuan amung-amung lemulun luk na maya' bala Allah ineh? 18#Bal 11.31 Maya' kudeng luk inayud,

“Idi kudeng mikat kuan lemulun luk matu ngalap ulun,

kudeng apeh teh miak mangun kuan lemulun luk dat idi luk mesala' ineh?”

19Ngaceku ineh do' lemulun luk medereh maya' pian Allah maré ulundeh dengan megéi' nganau' luk do', kuan Lemulun luk Mudut luk lutep maya' jani' ineh.

Currently Selected:

1 PETRUS 4: BLD

Highlight

Copy

Compare