1 YAHYA 1
1
Bala Ulun
1 #
Yah 1.1
Kai ngayud ratnan Bala Ulun luk idi rat pun-pun, luk pangeh pindenger kai, luk pangeh sinier dengan mateh kai, luk pangeh tinutong kai, idi luk kikem dengan ticu' kai. 2#Yah 1.14 Kareb ulun ineh pangeh ginala', kai nenier neneh, idi maré kali' idi mada' kuan muyuh ulun luk meruked, luk idi pad-pad dengan Taman idi luk pangeh ginala' kuan kai. 3Anun-anun luk pangeh sinier idi pindenger kai, kai mada' teh kuan muyuh, pad muyuh pana' miak perurum dengan kai; setuneh rurum kai ini inan pad-pad dengan Taman idi dengan Yésus Keristus, AnakNeh ineh. 4Kai ngayud amung-amung luk kudeng ini pad awang kai mangun meriput.
Allah Ineh Acang
5Idi ini bada' AnakNeh luk pangeh pindenger kai rat Neneh, idi mada' kuan muyuh teh: idi Allah, Ieh ineh acang idi na tu-tu inan dacem bang Neneh. 6Kudeng tau pebala tau perurum Neneh, iamo' nalan bang dacem, tau mebalih idi na nganau' luk matu. 7Iamo' kudeng tau mulun bang acang, mepad kudeng Ieh pana' bang acang, idi tau perurum seburur dengan seburur, idi dara' Yésus, AnakNeh ineh, maru' netau ratnan amung-amung sala'.
8Kudeng tau mala netau na sala', idi tau naluk burur tau sebuleng, idi luk matu ineh na luk idi bang netau. 9Iamo' kudeng tau ngamo amung-amung sala' tau, idi Allah ineh lutep idi matu, pad Ieh maré do' ratnan amung-amung sala' tau, idi maru' netau ratnan amung-amung luk dat. 10Kudeng tau mala netau na tu-tu nenganau' sala', idi tau mala Allah mebalih, idi balaNeh na mudeng bang netau.
Currently Selected:
1 YAHYA 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
