रोमी 15
15
त्वापकाम मेएँ वाङमिमकु थो़म नु़बेट्नी
1गुइ थो़रडा सोनुङमा दु़म्पाका त्वाप कोङङा गेर्सी द्वाक्पा न बेसी मेनु़, लावो याक्के थो़रनुङमा थो़रलु़पामिमनुङ इम्सिसाका बुमु बासी। वाङमिमकाम न होङङा बोमु बासी। 2इकीमा त्वाकु साउखोरेलाई जो़पा दु़म्नु़ मा मेर्मिमकु थो़रलु़सीडा सोनुङमा दु़म्मिनु़ र्वाक्साका गुइ खोत्लेका मेर्मिमलाई गेर्सिबेन्मुमि बासी। 3हेङालोने ख्रीष्ट उनी त्वाका वो त्वापलाई गेर्सिट्पा खारी मेबेमिवा। माम्चु़नीकु सिजेमडा र्याक्मा बु, “गानीलाई डक्साका जेपामिमका गोलाई डक्साका जेम्डिम बु।”#भज ६९:९ 4ङादो र्याक्मा सिजेमडाम ल्वा इकीमा सीसिकाम लागि र्वाक्साका र्याक्मा बाइडा। मेराम सिजेमका गुइलाई इम्मु चापा दु़म्बेसाका माम्चु़नीका याचे जेम्डिम ल्वा रोथिनु़ र्वाक्पा न, नुङ सो हन्पा दु़म्बेसा। 5इम्मु चापा यु़म नुङ इकीमा सो हन्बेट्पा माम्चु़नीका गानीलाई येशू ख्रीष्टनुङ कोले बासी दोसीकाम दु़म्साका दोपा, मा गानी इनी त्वाप-त्वापडा कोले नकाम दु़म्साका बाट्पा यु़म ग्वानिमिनु़। 6आरेसाका गानी खोत्ले कोले नकाम दु़म्साका कोलेङा लो़लामका इकीमा ङाचो़ येशू ख्रीष्टकु पाप, माम्चु़नीकु नङ कोमु चापा दु़म्नी।
वाङसामाकाम लागि जो़पा-सेला
7मेम्मिमका माम्चु़नीकु यु़म झ्वाक्सीकाम लागि ख्रीष्टका गानीलाई हुनाखाना बेन्निम होम्साका गानी वो कोलेका कोङमीलाई हुनाखाना बेनी। 8गो गानीनुङ र्वाङु, माम्चु़नीका यहूदीमिमलाई मेर्मिमकु बेप-पापनुङ याचे जेम्डिम ल्वा आच्छाङा र्वाक्साका रेम्बोमु लागि ख्रीष्ट यहूदीमिमकु डु़ल्चो़ दु़म्मिडिम सो़। 9ओराम ल्वा थेसीथेन्बेन्मु नुङ वाङसामामिमका वो माम्चु़नीकु दिदामकाम लागि उनीमा नङ कोमिनु़ र्वाक्साका ख्रीष्ट योम्डिम सो़। माम्चु़नीकु सिजेमडा र्याक्मा बु,
“मेम्मिमका वाङसामामिमगोडा गो इनीमा नङ कोक्पु,
मा इनीमा सो़रलोले बेउ।”#२ शमू २२:५०; भज १८:४९
10मा आथावो आरेसाका र्याक्मा बु,
“खोत्ले वाङसामा नी, माम्चु़नीकु मु़चु़मिमनुङ गेर्सी द्वाक्नी।”#व्य ३२:४३
11आथावो आरेसाका र्वाक्मा बु,
“ए वाङसामा मु़चु़नी, ङाचो़कु नङ कोक्नी,
खोत्ले सामागोडाम मु़चु़नी,
ङाचो़कु नङ कोक्नी।”#भज ११७:१
12आथावो माम्चु़नीलाम जेपा यशैयाका र्वा,
“यिशैकु दोचो़लाम कोले रोमी,
गुमीका वाङसामामिमडला साखाम थो़मी,
गुमीलाम वाङसामामिमका सेल्सिमु न बोमी।”#यशै ११:१०
13सेल्सिमु ल्वापा न ग्वाक्पा माम्चु़नीडा गानी थो़रलु़न्निम बु। गुमीका गानीलाई न-गो भ्रसिबेन्मिनु़। मेम्साकाङा माम्चु़नी-पेलकु यु़मका मेराम ल्वापा इनीमा नगोडा गानी बर्तो लमु चापा दु़म्नी।
पावलका वाङसामागोडा बु़डु़म खारी
14आमा द्वादीबुङ वा-ल्वाकनी, गानी जो़पा न-गोकाम बुनी र्वाक्साका गो चक्पु। थेसीथेट्पा दु़म्निम बु मा त्वाप-त्वापगोडा सीमु चापा दु़म्निम बु। 15लावो माम्चु़नीका गोलाई दिदाम ग्वाङडिमिमका गानीलाई आथावो मिम्बेन्मु लागि मेङिसाका गो कोङनिम ल्वाकु दुथाम र्याक्तोङा बेउ। 16वाङसामाकाम लागि माम्चु़नीकु डु़म्लाचो़का बोमु बासिक्पा होम्साका खारी बोमु लागि गुमीका गोलाई ओराम दिदाम ग्वाङडिमिम सो़। मेम्मिमका माम्चु़नी-पेललाम सेपा दु़म्साका माम्चु़नीडा सासेन्सिमु घ्रेट्पा दु़म्मिनु़। 17मेम्मिमका येशू ख्रीष्टनुङ दु़म्साका माम्चु़नीकाम लागि बोमु बासिक्पा आमा खारीडा गो आमा नो़ डोक्पु बेउ। 18हेङालोने गो जेङुमिम ल्वाका नुङ खारीलामका वाङसामामिमलाई माम्चु़नीका र्वामिमिम थो़पा दु़म्बेन्मु लागि ख्रीष्टका गोलामका बेम्डिम मेराम खारीडाम वाङमिम ल्वाकु दुथाम गो जेमु मेचापु। 19छेखोपमिम, हेल्लो वो मेल्वाम्मा यु़म खारीमिम मा माम्चु़नी-पेलकु यु़मलामका गो यरुशलेमडाम्मा इल्लुरिकन र्वाक्मा नेब्दीसम्म येशू ख्रीष्टकु दुथाम जो़पा-सेला जो़होमका दो़उतोम बु। 20वाङमिमका चो़म्मिडिम जगडला नेम बनेबोमु चो़म्मा होम्साका वाङमिमका जो़पा-सेला दो़मु चो़म्मिडिम खोमडा गो मेदो़उ। ख्रीष्टकु दुथाम थो़मुङा मेथो़मिवाम मा वाङमिमका जो़पा-सेला मेदो़मिवाम खोमडा कोङङा गो जो़पा-सेला दो़मु द्वाक्पु। 21माम्चु़नीकु सिजेमडा आरेसाका र्याक्मा बु, “उनीमा दुथाम उहेमलाई हेल्लो वो थो़बेट्मा मिबु, मेर्मिमका गुमीलाई ल्वामी, मा उनीमा दुथाम उहेमका हेल्लो वो थो़म्डिम मिबु मेर्मिमका थो़मिमा थेसिथेन्मी।”#यशै ५२:१५
पावलका रोम लक्पा मुलु़ बु़डु़म
22आरेसाका सु़ वो मेरोम्थिक्मिवाम लाले खोमडा जो़पा-सेला दो़उतोमका गो इनीमाडा रोमु यु़त्तोम मिबु।#रोम १:१३ 23लावो ओर्मिम खोमडा गो जो़पा-सेला दो़मु दु़म्तोम बु। हापा थ आथाम गो गानीलाई क्रो़म्मु छो़म न बेउतोम बाइडा। 24गो मेराम लाम्दी दु़म्तो स्पेन लङुलो गानीनुङ घ्रो़म्डा रोक्पा न बु, मा कोलेम नलेम गानीनुङ बाट्पा न वो बेउतोम बु। मेम्लो स्पेनसम्म लमु लागि गानी गोलाई ख्लो़ङिनी डे र्वाक्पा आमा नडा मिम्तोम बु। 25-26लावो ओम्लो यरूशलेमडाम उनी हाम वो मेबाट्पा थो़रलु़पामिमकाम लागि अखैया नुङ मेसोदोनियाडा बाट्पा थो़रलु़पामिमका फक्मिडिम खउलुङ सोक्थिप्डा गो यरूशलेम लक्तोङा बेउ।#१ कोर १६:१-४ 27मेर्मिमका उनी त्वाकु नका ङा खउलुङ ग्वाम्डिम बाइडा। आच्छाङा मेर्मिमका यहूदी थो़रलु़पामिमलाई ख्लो़मु बासिक्पा वो सो़, हेङालोने मेर्मिमलाम ङा वाङसामामिमका वो माम्चु़नीलाम सेल्सिक्पा दिदाम ल्वाम्डिम बाइडा।#१ कोर ९:११ 28मेम्मिमका मेर्मिमका थु़र्मीडिम खउलुङ ग्वाक्जो़ल्पुमी मा स्पेन लङु, मेम्लो गो इनीमाडा वो लुङु। 29गो इनीमाडा रोङुलो येशू ख्रीष्टलाम ल्वाउतोम जिवा हापा रेट्पुमा रोङु र्वाक्साका गो चक्तोम बु।
30द्वादीबुङ वा-ल्वाकनी, ङाचो़ येशू ख्रीष्ट नुङ माम्चु़नी-पेललाममिम रिखामका आमा दु़खा थारीका गोलाई ख्लो़ङिमिनु़ र्वाक्साका आमा लागि माम्चु़नीनुङ हेल्लो लोवो छो़म सो़म्दी बेङ्साङनी र्वाक्साका गानीनुङ र्वाङु। 31यहूदियाडा बाट्पा थो़रमेलु़पा मु़चु़मिमडाम माम्चु़नीका गोलाई गेङिमिनु़ मा यरूशलेमडाम थो़रलु़पामिम लागि फक्मा खउलुङ मेर्मिमका रमिनु़ र्वाक्साका सो़म्दी बेङ्साङनी। 32मेम्मा माम्चु़नीकु न होम्साका गो इनीमाडा गेर्सी द्वाक्तो रोङु मा कोयो-कोयो न-गो भ्रसिक्तो बुइनु़ र्वाक्साका सो़म्दी बेनी। 33न भ्रसिबेट्पा माम्चु़नी पाप गानीनुङङा दु़म्मिनु़। आमेन।
Currently Selected:
रोमी 15: THUL
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
