लूका 2
2
येशू गम्डिम
(मत्ती १:१८-२५)
1मेराम थारीका रोमी हप अगस्तसका उमा किब्दीगोडा बाट्पा खोत्ले मु़चु़मिमकु नङ डो़नी बु़डु़मी। 2सिरियाडाम किब्दी साखामचो़ कुरेनियस बाइडाम थारीका ङादो मु़चु़मिमलाई ङार्मिडिम थारी ओराम ङा बाइडा। 3खोत्ले मु़चु़मिम उनी नङ डो़बेड्डा त्वा-त्वाहोम उनी शहरडा लम्डी।
4योसेफ दाऊदकु चो़-चु़सु़लाममिम बाइडा। मेम्मिमका गु गालीलडाम नासरत देललामका गेले यहूदियाकु बेथलेहेमडा लस्ता। मेसिन्डा माके दाऊद हपकु नेम बाइडा। 5नङ डो़बेन्मु लागि योसेफका उमाडा बिम्डिम मरियमलाई वो गुनुङ ङा लडु़मा लस्ता। मेकोतिलो मरियम गोजु़मे बाइडा। 6मेर्चिप बेथलेहेमडा बाच्चिम थारीका ङा मरियमकु चो़च्चो़ गक्पा थारी रोक्फाड्डा, 7मा गुका उ तोङदी वोस्चो़ कस्तु़, मा गुमीलाई येका दिल्लु़मा बोक्सागोयु़ आम्डु़, हेङालोने मेर्चिपका पाटीबाडे बान्ते वो बुमु मेल्वाचिवा।
भेन्दा रेपा-क्रिपामिम नुङ पाह्रीचो़मिम
8मेराम सिन्था बेथलेहेम फार्डाम भेन्दामिम जापा धेब्देडा रेपा-क्रिपा मु़चु़मिमका सेर्पा उनी भेन्दामिम लन्थाट्मिडिम बाइडा। 9ङाचो़कु कोले पाह्रीचो़ मेर्मिमनुङ रेम्बेसिड्डा मा ङाचो़कु ओल मेर्मिमकु होनोलाम-आथो़लाम झ्वाक्ता, मा मेर्मिम छो़म ङिम्डी। 10लावो पाह्रीचो़का मेर्मिमनुङ र्वाक्ता, “मेङिनी! गो गानीलाई कोले जो़पा-सेला थो़बेनिनी, मेरामका खोत्ले मु़चु़मिम छो़म भ्रम्सिमी। 11आनेप दाऊदकु शहरडा गानीलाई सेल्पा कोले मु़चु़ ङाचो़ ख्रीष्ट गम्डिम बु। 12गानी कोले चो़च्चो़लाई येका दिल्साका बोक्सा गोयु़ आम्थाट्मा डार्नी, गानी ओराम छेखोपलामका गुमीलाई छेनी।”
13मेकोतिलोङा कोचोत्ति वाङमी छो़म सेर्पा पाह्रीचो़मिम मे पाह्रीचो़नुङ काम्सिम्डी। मेकोतिमा माम्चु़नीकु नङ कोक्तो आरे र्वाम्डी,
14“खोत्लेडाम येप्पा पाह्रीला माम्चु़नीकु यु़म झ्वानु़,
मा सुबुडा उहेम मु़चु़मिमनुङ गुमी गेर्सिक्पा बुमी
मेर्मिमकु न-गो भ्रसिनु़।”
15पाह्रीचो़मिम मेलामका पाह्रीथो़ ख्लोसिम्डी मा मे रेपा-क्रिपा मु़चु़मिमका उनी त्वाप-त्वापडा आरे र्वाबेम्डी, “दो, गुइ मे बेथलेहेमनो लक्सी मा मिप्रङमाका गुइनुङ सो़म्डिम ल्वा मेसिन्डा हाम दु़स्ताम रेछा रेप्डी।”
16मेर्मिम ओन्तो लम्डी, मा मेसिन्डा मेर्मिमका मरियम, योसेफ नुङ बोक्सागोयु़ आम्थाट्मा चो़च्चो़लाई डार्मिडी। 17रेपा-क्रिपा मु़चु़मिमका मे चो़च्चो़ ल्वाम्डी, मा पाह्रीचो़मिमका चो़च्चो़कु दुथाम हाम र्वाम्डिम बाइडा, मेराम ल्वा मेर्मिमका खोत्लेनुङ सो़म्डी। 18ओराम ल्वा थो़पामिम खोत्ले ङाङाया दु़म्मिडी। 19लावो मरियमका ने ओर्मिम ल्वाकु दुथाम मिम्तो उमा नडा जु़ल्थाड्डु़। 20पाह्रीचो़का मेर्मिमनुङ र्वाक्ताम होम्साका मेर्मिमका ल्वाम्डी, थो़म्डी। मेम्मिमका मेर्मिमका माम्चु़नीलाई डोक्पु मिम्तो नुङ उनीमा नङ कोक्तो उनी भेन्दामिम बाट्पाथो़ ख्लोम्सिम्डी।
चो़च्चो़ येशू सो़रनेमगोडा रेट्मिडिम
21लेतलेम नेम मे चो़च्चो़कु खिरिरि क्रिप्मिडी,#२:२१ माम्चु़नीकु मु़चु़ र्वाक्साका रेम्बेपा छेखोप। मा उनीमा नङ येशू बाबेट्मिडी। मेराम नङ उनी मामकु ङेलगोनो गुमी मुन्मु ङादो पाह्रीचो़का र्वाक्ताम बाइडा।#लेवी १२:३; लूक १:३१
22मोशाकु डु़म्ला होम्साका चो़च्चो़ गमिम चङडा सेपा दु़म्मुकु थारी हुक्तामा मेर्चिपका येशूलाई मिप्रङमाकु ङादोडा ग्वामु लागि यरूशलेमडा रेट्ची।#लेवी १२:६-८ 23मिप्रङमाकु डु़म्लाका र्वा, “खोत्लेडाम ङादो गक्पा थाकु मिप्रङमालाई ग्वामु बासी।#प्रस १३:२,१२” 24मेकोतिमा मिप्रङमाकु डु़म्ला होम्साका सासेन्मु लागि नले तुक्तुकुर लोवो नले परेवा लोवो मेर्चिपका मेसिन्डा रेट्ची।#लेवी १२:८
25मेकोतिलो शिमियोन नङकाम कोले मु़चु़ यरूशलेमडा बाइडा। गु माम्चु़नीकु न-गो होप्माम नुङ उनी न होम्साका दोपा, मा ख्रीष्ट योमिमा इस्राएलीमिमलाई बोमी-थार्मिमिम लथाक्पा मु़चु़ बाइडा। माम्चु़नी-पेल गुनुङ बाम्डी, 26मा “मिप्रङमाकु ख्रीष्ट मेल्वाथु़मसम्म इमा साम मेल” र्वाक्साका माम्चु़नी-पेलका गुलाई रेम्बेम्डिम बाइडा। 27मोशाकु डु़म्लाका मालो गक्पा चो़च्चो़कु दुथाम हाम बोमु र्वाक्ताम, मेराम होम्साका ङा मरियम नुङ योसेफका मे चो़च्चो़ येशूलाई सो़रनेम गोनो रेट्ची। मेकोतिलो माम्चु़नी-पेलका शिमियोनलाई मे सो़रनेम गोनो थु़र्मिडी। 28मेकोतिमा शिमियोनका मे चो़च्चो़ येशूलाई ल्वाडा झेड्डु़मा माम्चु़नीलाई आलासो़ ग्वाक्तो र्वाक्ता,
29“ए मिप्रङमा आथा ने गो इनी डु़ल्चो़नुङ याचे जेन्निम होम्साका
गो भ्रसिक्साका सिमु चापु।#मत्ती २:२३
30हेङालोने मु़चु़मिमलाई सेल्पा
गानी थु़र्निम मु़चु़ गो ल्वाउतोम बु।
31गानी गुमीलाई खोत्ले मु़चु़मिमकु ङादोडा थु़र्निमिम बु,
32वाङसामामिम सेल्सिक्पा लाम्दी
रेम्बेट्पा ओल नुङ
इनी त्वाकु सामा इस्राएलीमिमकु
यु़म-झ्वाक्पा ओल
मेराम दु़म्बेट्निम बु।”#यशै ४२:६; ४६:६; ५२:१०
33चो़च्चो़ येशूकु दुथाम शिमियोनका र्वाक्ताम ल्वा थो़च्चिमा उनीमा माम नुङ पाप ङाङाया दु़म्ची। 34शिमियोनका मेर्मिमलाई जि ग्वाक्तु़मी, मा येशूकु माम मरियमनुङ र्वाक्ता, “रेप्डा, इस्राएलडाम हापा मु़चु़मिमलाई सेल्मु मा याङलाई देन्दे ग्वामु माम्चु़नीका ओराम चो़च्चो़लाई छेट्मिडिम बु। माम्चु़नीका गुमीलाई छेखोप होप्मामङा थुट्मिडिम बु, लावो मु़चु़मिमका गुमीलाई मेद्वामी। 35मेम्मा आरेसाका हापा मु़चु़मिमकु न-गो ल्वासिक्पा दु़म, मा कातु़रु़का ख्वाकु़मिम होङङा इमा वो थो़म्बोक दु़खाका ख्वाकु़।”
36आशेर दोचो़लाममिम फनिएलकु जाउमो चो़ हन्ना नङकाम माम्चु़नीलाम जेपा कोले ङामी मेसेम मे सो़रनेमगोनो बाइडा। गुका लालीकुन्दा बु़डु़म येतले थ चङडा उमा वोचु़ सिडाम बाइडा, 37मा अर्दोमे दु़स्तामा लेत-ब्ल (८४) थ रोक्थिड्डाम बाइडा। गुका हेल्लो वो सो़रनेम मेडिथालु़वा, मा उपास बासाका नुङ सो़म्दी बेसाका नेम्फु सिन्था माम्चु़नीकु सो़रलोले बु़थाल्लु़। 38शिमियोनका मरियम, योसेफनुङ जेमु दु़म्स्तु़लो हन्ना मेसिन्डा रोक्तामा माम्चु़नीलाई आलासो़ ग्वाक्तु़, मा यरूशलेमडाम मु़चु़मिम सेल्सिमिमिम थारी लथाक्पामिम खोत्लेनुङ गुका मे चो़च्चो़ येशूकु दुथाम सो़यु़डु़।
39मेर्चिपका मिप्रङमाकु डु़म्ला होम्साका खोत्ले खारी बोमु दु़म्ची। मेकोतिमा मेर्चिप उची चो़ येशूनुङ गालीलडाम नासरत शहरडा बाट्पा उची नेमडा ख्लोसिक्ची। 40मे चो़च्चो़ येशू बर्तो लम्डी, मा नेप्ची नुङ सोनुङमा दु़म्तो लम्डिमा माम्चु़नीकु दिदाम गुमीनुङ बाइडा।
चो़च्चो़ येशू सो़रनेमगोडा
41येशूकु माम-पाप सेल्सिक्पानेमकु चाड मानेबेप्डा थ-थका यरूशलेम लक्थाल्ची।#प्रस १२:२७; व्य १६:१-८ 42येशू को-न (१२) थकाम दु़म्मिडी, मा ङादो बेम्खेम्डिम होम्साका येशू नुङ उनीमा माम-पाप चाड मानेबोमु लागि यरूशलेम लम्डी। 43चाड मानेबोमु दु़म्मिडी, मा उनीमा माम-पाप नेम ख्लोसिक्चिलो मे चो़च्चो़ येशू ने यरूशलेमडा ङा बाम्ल्याम्डी। ओराम ल्वा उनीमा माम-पापका मेचक्चिवा। 44लाम्दी लाम्दिपामिमनुङ येशू बुमी र्वाक्पा मिम्सिक्चिमा उनीमा माम-पाप कोलेमकु लाम्दी लक्ची। गुमीलाई उनी माम-पापका उची मु़चु़मिम नुङ ङोप्सो़मिमकाडा माल्ची। 45गुमीलाई बान्ते वो मेडार्चिवामका मेर्चिप उची चो़ माल्तो यरूशलेमथो़ ङा ख्लोसिक्ची। 46सुलेम चङडा मेर्चिपका येशूलाई सो़रनेमडा यहूदीमिमकु डु़म्ला सीपा मु़चु़मिमकु थेतेडा गन्तासिट्मिडिमा मेर्मिमकु ल्वा थो़त्तो मेर्मिमनुङ हिलाहिसी बेत्तोङा लेट्मिडिम माम नुङ पापका डार्ची। 47गुमीका ल्वा थेसिथेट्मिडिमा उनी सि ख्लोक्मिडिम थो़पा मु़चु़मिम खोत्ले ङाङाया दु़म्मिडी। 48गुमीलाई ल्वाच्चिमा उनीमा माम-पाप ङाङाया दु़म्ची, मा उनी मामका गुमीनुङ र्वाक्ता, “आमा तारापाचो़, गाना आरेप्माम हाम बेन्नाम? रेप्डा, इमा पाप नुङ गुचुकु इमा लागि मिम्ताम-सो़र्ताम बेसाका छु़रु़प-छु़रु़प लु़त्तो गानालाई माल्चोको।”
49येशूका मेर्चिपनुङ र्वाम्डी, “गानी हेङा गोलाई माल्ङिडिनिम? हाम गो आमा पापकु नेमडा बुमु बासी र्वाक्पा गानी चनिम मेबायावा?”
50लावो गुमीका र्वाम्डिम ल्वा उनीमा माम-पापका थेसिमेथेचिवा। 51मेकोतिमा गुमी उनी माम-पापनुङ उनी नेम बाट्पा नासरत शहरथो़ ख्लोसिम्डी, मा उनीमा माम-पापका र्वाक्चिम होम्साका बेम्डी। उनीमा मामका हा-हाम दु़स्ताम मेर्मिम खोत्ले ल्वा उमा नडा जु़ल्थाड्डु़। 52येशू नेप्चीडा, मिरो़मडा, माम्चु़नी नुङ मु़चु़मिमकु दिदामडा बर्तो लम्डी।#१ शमू २:२६; हितो ३:४
Currently Selected:
लूका 2: THUL
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
