रोमी 13
13
सरकारक अधीनम रना
1सबजन आपन सरकारह मानपर्ठा, काकरकि परमेश्वरक इच्छा बिना कौनो सरकार टिक नैस्याकट्। सब सरकार परमेश्वरसे खटागैलक हुइट। 2कौनोजन सरकारक विरोध कर्ठा कलसे उ परमेश्वरक नियुक्त करल बातक विरोध कर्ठा। जे-जे परमेश्वरक विरोध करी, हुँक्र दण्ड पैनेबाट। 3काकरकि असल काम कर्ना मनै नाही, तर खराब काम कर्ना मनै सरकारसे डराइपर्ठा। का टुँ सरकारक आघ निडर हुइ चाहटो? ओसिन हो कलसे असल काम करो त सरकारसे स्याबासी पैबो। 4काकरकि शासन करुइयन परमेश्वरक सेवकहुँक्र हुइट। परमेश्वर हुँकन टुन्हक भलाइक लाग खटैलक हुइट। तर यदि टुह्र खराब काम कर्ठो कलसे सरकारक डर डराओ, काकरकि सरकारह दण्ड देना अधिकार बाटस। सरकार त खराब काम करुइयन दण्ड देना परमेश्वरक सेवक हो। 5दण्डसे बाँचक लाग केल नाही तर आपन विवेकले असिन कर्ना ठीक हो कैक सरकारक अधीनम रहहीपर्ठा।
6टुह्र कर तिर्ना कारण फे यिह हो काकरकि सरकार आपन कर्तव्य पूरा करक लाग परमेश्वरक कामम लग्लरठा। 7तिरपर्ना सब चिज तिरदेओ, कर तिरपर्ना ठाउँम कर तिरो, भन्सारम तिरपर्ना भन्सार तिरो, आदर करपर्ना मनैन आदर करो, इज्जत करपर्ना मनैन इज्जत करो।#मत्ती २२:२१; मर्क १२:१७; लूक २०:२५
प्रेमम लग्लरना
8ठीक समयम आपन ऋण चुक्ता कैडारो। तर प्रेमह भर चुक्ता कर नैसेक्जैना ऋणअसक मान्क एक-औरजहन प्रेम कर्टिरहो, काकरकि आपन छिमेकीन प्रेम कर्ना मनैया व्यवस्थक नियम पूर्ण रूपले पालन कर्ठा। 9व्यवस्थम व्यभिचार नैकर्ना, हत्या नैकर्ना, चोरी नैकर्ना, ल्वाभ नैकर्ना आज्ञा ओ और-और आज्ञा फे बा। आपन छिमेकीह अपन्हेहअस प्रेम करपर्ठा कना बात व्यवस्थक यी सक्कु आज्ञक सार हो।#प्रस २०:१३-१५,१७; व्य ५:१७-१९; लेवी १९:१८ 10प्रेम करुइया औरजन्हक खराबी नैकरट, उहओर्से प्रेम कर्ना कलक व्यवस्थमक सक्कु बातक पालन कर्ना हो।
11हम्र कत्रा महत्वपूर्ण समयम बाटी कना बात बुझ्क यी सब बातम ध्यान देओ। आब निन्दमसे उठ्क जग्ल रना ब्याला आरहल। हम्र सुरुम विश्वास करल ब्यालासे आब हम्र मुक्ति पैना ब्याला झन् लग्घ आरहल। 12रात कटस्याकल, आब अजरार हुइटीबा। उहओर्से अन्धकारम कर्ना खराब काम छोर्क अजरारक हातहतियार धारण करी। 13दिनक अजरारम सुहैना हिसाबले काम करी। रातकअस मोजमज्जा कर्ना, मट्वार रना, व्यभिचार कर्ना, भ्रष्टाचार कर्ना, झग्रा कर्ना, बिह्र मुना असिन सब काम छोरदी। 14बेनसे प्रभु येशू ख्रीष्टह धारण करी, ओ पाप स्वभावक इच्छा पूरा कर्ना बातम ध्यान नैदी।
Currently Selected:
रोमी 13: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
