प्रकाश 6
6
धेर मोहर खोल्लक
1तबदोस्र पठ्रू सातठो मोहरमध्ये पैल्ह मोहर ख्वालल् मै देख्नु ओ उ चार जीवित प्राणीमध्ये एकठो गर्जनअस आवाजम “आओ!” कहल मै सुन्नु। 2म्वार आघ उज्जर एकठो घोर्वा देखपरल ओ वाकरम सवार हुइल् मनैया एकठो धनु लेल्ह रह, ओहीह एकठो मुकुट देगैल् ओ ऊ औरजहन हरैटी विजय पाइक लाग आघ गैल्।#जक १:८; ६:३,६
3तबदोस्र पठ्रू द्वासर मोहर खोल्ल ओ मै द्वासर जीवित प्राणी “आओ!” कहल सुन्नु। 4और एकठो लाल घोर्वा निक्रल ओ मनै एक-औरजहन मारिकमारा करहीँ कैक उ लाल घोर्वकम सवार हुउइयह लडाइँ मच्चैना अधिकार देगैल् रह। ओहीह एकठो बराभारी तरवाल देगैल्।#जक १:८; ६:२
5तबदोस्र पठ्रू तीसर मोहर खोल्ल ओ तीसर जीवित प्राणी “आओ!” कहल मै सुन्नु। कर्या घोर्वा निक्रल। वाकरम सवार हुइल् मनैयक हाँठम एकठो तराजु रह।#जक ६:२,६ 6उ चार जीवित प्राणीन्हक बीचम एकठो आवाज असिक कहल मै सुन्नु, “एक दिनिक ज्यालाले एक किलो गोहूँ वा तीन किलो जौँ केल किन सेक्जैठा तर जैतून ओ अङ्गूरिक ब्वाँटिह नोक्सान जिन करो।”
7तब पठ्रू चौथा मोहर खोल्ल ओ चौथा जीवित प्राणी “आओ!” कहल मै सुन्नु। 8मै हेर्नु! हल्का हड्यार रङ्गक एकठो घोर्वा देखपरल। वाकरम सवार हुउइयक नाउँ “मृत्यु” रह ओ पाताल फे वाकर पाछ-पाछ लागलरह। हुँकन लडाइँ, अनिकाल, महामारी ओ जङ्गली जनावरद्वारा एक चौथाइ भाग नाश कर्ना अधिकार देगैल् रह।#इज १४:२१
9तबदोस्र पठ्रू पाँचवाँ मोहर खोल्ल ओ वेदीक टर परमेश्वरक वचन सुनैलक ओ उहाँक साक्षी हुइलक कारणले मुवागैल् विश्वासी शहीदहुँकन्हक आत्मा मै देख्नु। 10हुँक्र असिक कैक बराभारी आवाजले चिल्ला-चिल्लाक कल, “हे पवित्र, सत्य, सर्वशक्तिमान् परमप्रभु! हमन मुवैलक कारण पृथ्वीक मनैन कैह्या न्याय कैक दण्ड देबी?” 11ऊ हरेकजहन एक-एकठो उज्जर लुगा देगैल् रह ओ हुँकन असिक कैगिल् रह, कि टुन्हक सहकर्मीहुँक्र ओ दादुभाइहुँक्र पूरा सङ्ख्याम टुन्हकअस नैमुवाजाइट्सम विश्राम करो।
12तब पठ्रू छैठवाँ मोहर खोल्लक मै देख्नु। एकठो डरलग्टिक भुइँचाल गैल्। दिन त अन्धर्या रातअस कर्या हुइल् ओ सल जोन्ह्या जुन रगतअस लाल हुइल्।#प्रका ११:१३; १६:१८; यशै १३:१०; योए २:१०,३१; ३:१५; मत्ती २४:२९; मर्क १३:२४-२५; लूक २१:२५ 13आँधी अञ्जीरक रूख्वह हिलाक वाकर नैपाकल फारा झरादेहल अस आकाशक धेर तोरैँया पृथ्वीम खसल।#यशै ३४:४; प्रका १६:२० 14कागत लपेटगैल् अस आकाश हट्क गैगिल् ओ पर्वत्वा ओ टापु आपन-आपन ठाउँमसे हट्गैल्। 15तबदोस्र संसारक राजा, शासक, सेनापति, धनी, अधिकारी, कमारा, मुक्त ओ और सब मनै ओडार, पर्वत्वा ओ चट्टानक कोनिकाटरओर नुक्ल।#यशै २:१९,२१ 16हुँक्र पर्वत्वा ओ चट्टानह कल, “सिंहासनम विराजमान् रहुइयक सामुन्नेमसे ओ पठ्रूक क्रोधमसे हमन नुकाइक लाग हमारम खस#होशे १०:८; लूक २३:३० 17काकरकि हुँकन्हक न्याय ओ सजाय पैना बराभारी दिन आस्याकल ओ उ दिन के सह सेकी?”#योए २:११; मला ३:२
Currently Selected:
प्रकाश 6: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
