प्रकाश 5
5
मुट्ठा ओ पठ्रू
1सिंहासनम विराजमान् रहुइयक दाहिन हाँठम मै कागतक एकठो लप्याटल मुट्ठा देख्नु। उ कागतक मुट्ठक भित्तर ओ बाहर दुनुओर लिखल रह ओ ओहीह सातठो मोहर लगाक बन्द कैगिल् रह।#इज २:९-१०; यशै २९:११ 2परमेश्वरक एकठो शक्तिशाली दूतह मै देख्नु। भारी आवाजले ऊ असिक महीह पुछ्ल, “यी मोहर टुर्क कागतक मुट्ठा खोल्ना योग्यक के बा?” 3तर स्वर्गम, पृथ्वीम ओ पातालम कागत खोल्क भित्तर ह्यार सेक्ना कुई फे नैरह। 4कागतक मुट्ठा खोल्क हेर्ना योग्यक कुई फे नैपागैलक कारण मै धेर रुइनु। 5एकठो धर्मगुरु महीह कल, “जिन रोओ, हेरो, यहूदा कुलसे आइल सिंह, जे दाऊदक सिंहासनक उत्तराधिकारी हुइट, उहाँ विजयी होरल ओ सातठो मोहर टुर्क उ कागतक मुट्ठा खोल्ना योग्यक बाट।”#उत ४९:९; यशै ११:१,१०
6तबदोस्र मै चार जीवित प्राणी ओ धर्मगुरुहुँक्र घ्यारल उ सिंहासनक बीचम एकठो पठ्रू ठह्र्याइल देख्नु। यी पठ्रूजुन मुवागैल् अस देखपर। वाकर सातठो सिङ ओ सातठो आँख रलहस, सातठो आँख कलक सारा पृथ्वीम पठागैल् परमेश्वरक सातठो आत्मा हुइट।#यशै ५३:७; जक ४:१० 7पठ्रू आघ जाक सिंहासनम विराजमान् रहुइयक दाहिन हाँठमसे उ कागतक मुट्ठा लेल।
8तबहेँ उ चारठो जीवित प्राणीहुँक्र ओ चौबीस जन धर्मगुरुहुँक्र पठ्रूक पाउ पर्क दण्डवत् कर्ल। हरेक व्यक्तिक हाँठम एक-एकठो वीणा ओ धूपक सुबासनले भरल स्वानक खोर्या रलहन, उ धूपक बासजुन परमेश्वरक भक्तहुँकन्हक चह्राइल बिन्तीप्रार्थना हो।#भज १४१:२ 9हुँक्र असिक कैक एकठो लौव गीत गैल,
“यी कागतक मुट्ठा लेना
ओ याकर मोहर टुर्क खोल्ना योग्यक अप्न केल बाटी,
काकरकि अप्न मुवागैली
ओ आपन रगतले सब कुल, सब भाषा, सब देश ओ सब जातिमसे
परमेश्वरक लाग मनैन किन्ली।#भज ३३:३; ९८:१; यशै ४२:१०
10अप्न त हुँकन राजाअस शासन कर
ओ पूजारीअस परमेश्वरक सेवा कर देठी,
ओ हुँक्र पृथ्वीम राज्य कर्नेबाट।”#प्रस १९:६; प्रका १:६
11फेदोस्र मै हेर्नु, ओ सिंहासन, जीवित प्राणी ओ धर्मगुरुन्हक चारिओर लाखौँ, करोडौँ स्वर्गदूतहुँकन गीत गाइट् सुन्नु। हुँक्र मुख्य सिंहासन, चार जीवित प्राणी ओ धर्मगुरुन्हक चारिओर ठह्र्याक#दान ७:१० 12बरा सोरले गाइटलह:
“बलिदानक रूपम मुवापाइल पठ्रू
अधिकार, धन, बुद्धि, बल, मान, महिमा
ओ स्तुति ग्रहण कर्ना योग्यक बाट!”
13स्वर्ग, पृथ्वी, पाताल ओ समुद्रम रहल सब प्राणी यी गीत गाइट् मै सुन्नु,
“सिंहासनम विराजमान् रहुइया ओ पठ्रूह
सड्डभर स्तुति, सम्मान्, महिमा
ओ अधिकार हुइटीरहस!”
14उ चारठो जीवित प्राणीहुँक्र, “आमेन” कैक जवाफ देल ओ धर्मगुरुहुँक्र जुन भुइँयासम लिहुर्क दण्डवत् कर्ल!
Currently Selected:
प्रकाश 5: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
