हिब्रू 11
11
विश्वासक उदाहरण
1विश्वास कलक आशा करल बातक निश्चय ओ नैद्याखल बातक पक्का भरोसा हो। 2यिह विश्वासक कारण अघट्टेक मनै परमेश्वरसे प्रशंसा पैल।
3विश्वासद्वारा जो हम्र बुझ्ठी, कि परमेश्वरक वचनले सारा संसारक सृष्टि हुइल् ओ आब देखपर्ना चिज पैल्हहेँ अस्तित्वम रहल चिजले बनल नैहो।#उत १:१; भज ३३:६,९; यूह १:३
4विश्वासक भरम हाबिल परमेश्वरह कयिनसे मजा बलि चह्रैल। विश्वासक भरम ऊ परमेश्वरक सामु धर्मी ठह्रल ओ हुँकहार चह्राइल बलि परमेश्वर स्वीकार कर्ल। हाबिल मुक गैलसे फे हुँकहार विश्वासले करबेर आम्ही फे बोल्टीबाट।#उत ४:३-१०
5विश्वास कर्लकओर्से हनोक मृत्युक अनुभव बिना कर्ल यी धर्तीमसे शरीरसैँट उप्पर लैजागैल। ओ फेदोस्र नैदेखपर्ल काकरकि परमेश्वर हुँकहीन उप्पर उठारख्लहिन। ऊ उठाजैनासे आघ परमेश्वरह खुशी पाररख्लह कना बात धर्मशास्त्रम लिखल बा।#उत ५:२१-२४ 6विश्वास बिना परमेश्वरह खुशी पर्ना असम्भव बा। काकरकि जे परमेश्वरक लग्घ अइठा, ऊ परमेश्वर बाट ओ उहाँह खोजुइयन उहाँ इनाम देठ कना पक्का विश्वास करपर्ठा।
7विश्वास कैक नोआ परमेश्वरक चेताउनी सुन्ल। कबु नैद्याखल तर पाछ ह्वाए अइना बातक बारेम परमेश्वर हुँकहीन कैरख्लह। ऊ परमेश्वरक बात मान्क कट्ठोक एकठो भारी जहाज बनैल ओ उहिँम पैँठ्क आपन परिवारन बचैल। असिक विश्वासद्वारा ऊ संसारह दोषी ठह्रैल ओ अप्नजुन उह विश्वासद्वारा धर्मी मनैया ठह्रल।#उत ६:१३-२२
8विश्वासद्वारा अब्राहाम परमेश्वरक आज्ञा मन्ल, ओ जाओ कैक कहल ठाउँओर गैल, जौन ठाउँ परमेश्वर हुँकहीन देना वचन देरख्लह। कहाँ जैना कैक थाहाँ बिना पैल ऊ आपन देश छोर्क गैल।#उत १२:१-५ 9विश्वासक भरम ऊ परमेश्वरक प्रतिज्ञा करल देशम गैल ओ परदेशीअस पाल टाँग्क बैस्ल। असहेँक परमेश्वर इसहाक ओ इसहाकक् छावा याकूबह फे प्रतिज्ञा कर्ल ओ हुँक्र फे ओसहँक बैस्ल।#उत ३५:२७ 10अब्राहाम त सड्डभर पलरना जगम बनल सहरक अश्या लग्लरलह, जौन सहरक योजना करुइया ओ बनुइया परमेश्वर अपन्हे हुइट।
11 #
उत १८:११-१४; २१:२ सारा बाँझी रलसे फे अब्राहाम विश्वासक भरम धेर बुह्राइल ब्यालम फे बाबा हुइना शक्ति पैल, काकरकि परमेश्वर आपन करल प्रतिज्ञा पूरा कर्ठ कैक अब्राहाम विश्वास कर्ल।#११:११ ग्रीक भाषक कौनो-कौनो स्रोत ह्यारबेर असिन बात बुझ्जैठा: विश्वासद्वारा सारा धेर बुह्राइल उमेरम फे गर्भवती हुइना शक्ति पैली, काकरकि परमेश्वर आपन करल प्रतिज्ञा पूरा कर्ठ कैक सारा विश्वास कर्ली। 12असिक मुवमुव होस्याकल ब्याला एकठो मनैया अब्राहामकमसे आकाशक तोरैँयाअस धेर ओ गन नैसेक्जैना समुद्रक रटुइयम रना बालुरअस धेर सन्तान हुइलन।#उत १५:५; २२:१७; ३२:१२
13हिँक्र परमेश्वरक प्रतिज्ञा करल बात बिना पैल विश्वास केल कैक मुल। उहफे परमेश्वरक प्रतिज्ञा करल बातह हुँक्र दूरसे देख्ल ओ स्वागत कर्ल, ओ हुँक्र यी पृथ्वीम अपन्हेह परदेशी ओ विदेशी रहल मन्ल।#उत २३:४; १ इति २९:१५; भज ३९:१२ 14असिन बात बट्वैना जे किउ हुइलसे फे हुँक्र एकठो देश खोज्टिबाट कना बात स्पष्ट बुझ्जैठा, जौन देश हुँकन्हक आपन हुउइया बाटन। 15हुँक्र जौन देशमसे निकर्क आरलह उ देशह सम्झटी नैरल। निकर्क आइल देशह सम्झटीरट कलसे हुँक्र फेदोस्र घुम्क उ देशम जाइ सेक्नेरलह। 16तर हुँक्र त उ देशसे फे मजा देश, अर्थात् स्वर्गदेशक चाहना कैरख्लह। उहओर्से हुँकन्हक परमेश्वर हुइटुँ कना फे परमेश्वर नैलजैट, काकरकि परमेश्वर हुँकन्हक लाग एकठो सहर तयार पारदेरख्ल।
17परमेश्वर अब्राहामक जाँच करबेर विश्वासक भरम अब्राहाम आपन छावा इसहाकह बलि चह्राइक लाग तयार हुइल। परमेश्वर अब्राहामह प्रतिज्ञा कैरख्लह, तर फे अब्राहाम आपन एक्कठो छावह बलिदान चढैना राजी हुइल।#उत २२:१-१४ 18यिह छावक बारेम परमेश्वर असिक कैरख्लह, “इसहाकक्मसे जन्मल् सन्तान जो टुँहार सन्तान मान्जैनेबाट।”#उत २१:१२ 19इसहाक मुलसे फे परमेश्वर हुँकहीन जीवित बनाइसेक्ठ कैक अब्राहाम विश्वास कर्ल, ओ एक हिसाबले इसहाकह मुवलमसे जियलअस फेदोस्र फिर्ता पैल।
20इसहाक विश्वासक भरम याकूब ओ एसावह पाछ ह्वाए अइना बातक बारेम आशीर्वाद देल।#उत २७:२७-२९; ३९–४०
21विश्वासक भरम मुना ब्याला याकूब आपन लट्ठीम अरेस लगाक परमेश्वरक आराधना कर्ल, ओ योसेफक दुनु छावन अर्थात् आपन नट्यन आशीर्वाद देल।#उत ४७:३१–४८:२०
22विश्वासक भरम योसेफ अप्न मुना ब्यालम इस्राएलीहुँक्र मिश्रदेश छोड्ना विषयम कैरख्लह। ओ ऊ आपन मुवल शरीरह का करपर्ना हो, उ बात फे कैरख्लह।#उत ५०:२४-२५; प्रस १३:१९
23विश्वासक भरम मोशक दाइ-बाबा मोशह जन्मलक तीन मैह्नासम नुकाक ढर्ल। हुँक्र आपन लर्कह सुहावन देख्क राजक हुकुमक डरसमेत नैमन्ल।#प्रस २:२; १:२२
24मोशा बरा हुइल त विश्वासक भरम अप्न राजक छाईक छावा हुइटुँ कैक चिह्न्जैना अस्वीकार कर्ल।#प्रस २:१०-१२ 25पापम एकघरी सुख भोग्नासे त बेनसे परमेश्वरक मनैन्हकसँग दुःख भोग्ना रोज्ल। 26मिश्रदेशक धनसम्पत्तिसे त ख्रीष्टक लाग हेल्हा, बदनामी कर्वापैना बरा बात सम्झल, काकरकि हुँकहार नजर त परमेश्वरक इनामओर रलहन। 27राजक रिसक डर बिना डरैल विश्वासक भरम ऊ मिश्रदेश छोर्ल। काकरकि आँखिले द्याख नैसेक्जैना परमेश्वरह द्याखअस ऊ पाछ घुम्बोघुम्बो नैकर्ल।#प्रस २:१५ 28विश्वासक भरम ऊ मुक्ति-दिवस मनैल, ओ पैल्ह जन्मलहुँकन नाश करुइया दूत इस्राएलीहुँकन नैछुहीँ कैक ड्वारिम बलिक रगत लगैल।#प्रस १२:२१-३०
29विश्वासक भरम इस्राएलीहुँक्र सुख्खा भुमिम न्याङ्गअस लाल समुद्र पार कर्ल, तर मिश्रदेशक मनै ओसहँक समुद्र पार कर ख्वाजबेर डुब्क मुगैल।#प्रस १४:२१-३१
30विश्वासक भरम इस्राएलीहुँक्र सात दिनसम यरीहो सहरक पर्खालक गिन्यौर घुमबेर पर्खाल ढल्लहा।#यहो ६:१२-२१
31राहाब वेश्या विश्वासक भरम परमेश्वरक बात नैमन्ना यरीहो सहरक और मनैन्हकसँग मुव नैपर्लिन, काकरकि ऊ इस्राएली सुराकिन मजा स्वागत कैरख्लही।#यहो २:१-२१; ६:२२-२५
32और बहुत का बट्वैना? काकरकि गिदोन, बाराक, शिमशोन, यिप्ता, दाऊद, शमूएल ओ अगमवक्तन्हक बारेम बट्वैना आब म्वार समय नैहो।#न्याय ६:११–८:३२; ४:६–५:३१; १३:२–१६:३१; ११:१–१२:७; १ शमू १६:१–१ राज २:११; १ शमू १:१–२५:१ 33विश्वासले हुँक्र कैयौ देश जित्ल ओ न्यायसे राज्य कर्ल। परमेश्वरक प्रतिज्ञा करल बात फे पैल। विश्वासले हुँक्र सिंहन्हक मुह् फे थुनदेल।#दान ६:१-२७ 34दन्कल आगी बुटादेल, तरवालक धारमसे फे उम्कल। हुँक्र कमजोर रलह तर आब शक्तिशाली हुइल। लडाइँम साहससे लड्क सक्कु विदेशी सेनाहुँकन खेद्ल।#दान ३:१-३० 35स्त्रीहुँक्र आपन मनैन मुवलमसे जीवित पैल। और कत्रा जन मृत्युपाछ और असल जीवन पैना आशम परमेश्वरह इन्कार कैक छुट्कारा पाइलसे त बेन यातनापूर्ण मृत्यु सहना बात रोज्ल।#१ राज १७:१७-२४; २ राज ४:२५-३७ 36और कत्रा जन हेल्हा कर्वापैल, कोर्रा खाइपर्लन, बन्ध्वापैल, कैदी हुइल।#१ राज २२:२६-२७; २ इति १८:२५-२६; यर २०:२; ३७:१५; ३८:६ 37मनै हुँकन पत्थ्रले मार्क मुवैल, आराले चिर्ल, तरवालले कट्ल। हुँक्र गरीब होक छेग्रीभेँरीन्हक छालले जीउ छोप्ल। अत्याचार ओ दुर्व्यवहार सहटी दुःख भोग्ल।#२ इति २४:२१ 38हुँकन्हक लाग यी संसार लायक नैरलहन। हुँकन उजार ठाउँम, पाहाडओर भाग पर्लन, गुफा ओ ओडारम बैठ पर्लन।
39हुँकन्हक विश्वासक कारण हुँक्र सबजहनसे परमेश्वर खुशी हुइल, तर परमेश्वरक प्रतिज्ञा करल बात हुँक्र नैपैल। 40काकरकि परमेश्वर हमार लाग और असल बातक योजना कैरख्लह। हमारसँग केल हुँक्र सिद्ध हुइहीँ कना उहाँक इच्छा रलहन।
Currently Selected:
हिब्रू 11: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
