गलाती 4
4
1दिनदिनक जीवनमसे और एकठो उदाहरण हेरी, हकवाला फे नाबालक रहट्सम बाबक धनक मालिक रलसे फे कमारा बराबर केल रठा। 2ऊ आपन डाई-बाबक स्वाँचलअस वाकर उमेर नैपुगट्सम आनक अधीनम रठा। 3ख्रीष्ट अइनासे आघ हम्र फे नाबालकअस रलही, संसारक आत्मिक शक्तिक अधीनम रलही। 4तर समय पूरा हुइल् त परमेश्वर आपन छावह पठैल। उहाँ जन्नीमनैयक कोखिमसे जन्मल ओ यहूदी व्यवस्थक अधीनम जन्मल। 5हम्र छावक हक पाइसेकी कैक व्यवस्थक अधीनम रहल मनैन म्वाल तिर्क छुट्कारा देहक लाग उहाँ पठागैल। 6हम्र परमेश्वरक सन्तान हुइटी कना बात देखाइक लाग उहाँ आपन छावक आत्मा हमार हृदयम ढैदेरख्ल। उह आत्मा हमार हृदयमसे “हे अब्बा#४:६ अब्बा: आरमाइक भाषम आपन बाबह सम्बोधन करबेर प्रयोग कैजिना शब्द हो।, बाबा!” कैक पुकारा कर्ठ। 7उहओर्से आब टुह्र कमारा नैहुइटो, तर परमेश्वरक सन्तान हुइटो। सन्तान हुइटो कलसे परमेश्वरक टुह्र हकवाला फे हुइटो।#रोम ८:१५-१७
गलातीन्हक लाग पावलक वास्ता
8टुह्र परमेश्वरह चिन्हासे पैल्ह, टुह्र धेर देवीदिउँतन्हक पूजा करो, हुँक्र परमेश्वर नैहुइट। टुह्र हुँकन्हक कमारा रलहो। 9तर आब त टुह्र परमेश्वरह चिनरख्लो अथवा असिक कही, परमेश्वर टुँहन स्वीकार कैरख्ल। आम्ही फे कसिक उ पुरान कमजोर बिना कामक बातम घुम्क जाइ चहठो? टुह्र काजे फेदोस्र हुँकन्हक कमारा हुइ चहठो? 10टुह्र विशेष दिन, मैन्हा, ऋतु ओ सालह पवित्र मन्ना रीतिथिति पो मन्ठो। 11महीह चिन्ता लागल बा। का मै टुन्हक लाग बिना कामक दुःख कर्नु तो? 12भैयौ, टुह्र फे म्वारअस होदेओ कैक मै बिन्ती करटुँ काकरकि मै फे टुन्हकअस होदेरख्नु।#४:१२ याकर अर्थ पावल यहूदी धर्मक रीतिथिति छोर्क हुँकन्हकअस हुइल। आब पावल हुँकन ओसिन रीतिथिति छोर्क आपनअस हुइक लाग कहट।
टुह्र म्वार कुछु बिगार नैकर्लहुइटो। 13टुँहन थाहँ बा, सबसे पैल्ह टुँहन खुशीक खबर सुनाइबेर मै शरीरम कमजोर रनहुँ। 14मै शरीरम कमजोर रहलब्याला टुँहन अप्ठ्यारो लागल रलसे फे टुह्र महीह छिःछिः ओ दूर-दूर नैकर्लो। बेनसे उल्ट टुह्र त परमेश्वरक दूतह ओ ख्रीष्टह करअस महीह स्वागत कर्लो। 15उ ब्याला टुह्र कत्रा खुशी रलहो, सम्भव रलसे त टुह्र आपन आँख झिँक्क महीह देह पर्लसे फे तयार रलहो। मै यी बातक साक्षी बाटुँ। तर आब का हुइल्? 16आब मै सत्य बात बोल्क का मै टुन्हक शत्रु होरनु?
17उ झूटा शिक्षकहुँक्र टुँहन आपनओर तानक लाग टुँहनसे खूब घनिष्ठ सम्बन्ध ज्वार चहठ, तर मजा विचारले त नैहो। हुँक्र महीसे टुँहन फूट कराक आपनओर तान चहठ। 18मै टुन्हकसँग रहलम केल नाहीँ, नैरहलम फे सड्डभर असल बातम सम्बन्ध बह्रैना त एकदम मजा हो। 19म्वार लर्काओँ, टुन्हकम ख्रीष्टक स्वभाव नैबनटसम व्याथा लागल जन्नीमनैयाअस महीह दुःख लग्टिरठा। 20आबहेँ मै उहाँ रटुँ त मै असिक कह नैपर्नेरह। तर दूरसे मै का कर्ना? मै त अन्योलम परलबाटुँ।
हागार ओ सारा
21व्यवस्थक अधीनम रह चहना मनैन मै पुछटुँ। का टुह्र व्यवस्थम लिखल बात नैबुझ्टो? 22यिहाँ हेरो, अब्राहामक दुइ भाइ छावन रलह, एकठो कमारी गोसिन्या हागारकओर्से, औरजुन स्वतन्त्र गोसिन्या सारकओर्से।#उत १६:१५; २१:२ 23कमारीकओर्से जन्मल् छावा शरीरक इच्छा अनुसार जन्मल् रह तर स्वतन्त्र गोसिन्यकओर्से जन्मल् छावाजुन परमेश्वरक प्रतिज्ञा कैगिल् छावा रह। 24यी बातमसे हम्र का बुझसेक्ठी कलसे, उ दुइठो जन्नीमनै परमेश्वरक दुइठो बाचह बुझैठा। सीनै पर्वत्वम व्यवस्थक पुरान बाचा कलक कमारी हागार हो। याकर सन्तान कमाराहुँक्र हुइट। 25अरब देशक सीनै पर्वत्वा त कमारी हागारअस हो। व्यवस्था मन्ना पृथ्वीक यरूशलेम ओ वाकर पाछ लग्ना सबजन कमारीक सन्तानअस हुइट। 26तर स्वर्गक यरूशलेम त स्वतन्त्र बा ओ हम्र स्वतन्त्र यरूशलेम डाईक सन्तान हुइटी। 27धर्मशास्त्रम फे यिह बात लिखल बा,
“लर्का नैपैना जन्नीमनैया, खुशीले रमाओ,
व्याथा थाहाँ नैपैना जन्नीमनैया, आनन्द मनाओ,
काकरकि गोस्या रहल जन्नीमनैयसे त
बाँझ रहल जन्नीमनैयक#४:२७ यी पदम रहल बात यशैया अगमवक्तक कहल बात हो। ऊ यरूशलेम कैदम पर्नासे आघ ओ पाछक बात कल। यरूशलेम त लर्का जन्मैना जन्नीमनैया हागारअस नाहीँ, तर लर्का नैजन्मैना जन्नीमनैया साराअस रह। पाछ जाक सारा एकठो छावा जन्मैली, उह छावाद्वारा संसारक सबजन आशिष पैल। गलातियक मण्डली उ आशिषम सहभागी हुइल्, काकरकि ख्रीष्टियनहुँक्र सबजन अब्राहामक (ओ सारक) सन्तान हुइट (गलाती ३:२९)। सन्तान धेर बाट।”#यशै ५४:१
28भैयौ, हम्र त परमेश्वरक प्रतिज्ञा करल सन्तान इसहाकक्अस हुइटी। 29उ ब्याला शरीरक इच्छा अनुसार जन्मल् छावा पवित्र आत्मा अनुसार जन्मल् छावह सँताए, ओ आम्ही फे अस्तह बा।#उत २१:९ 30तर धर्मशास्त्रम लिखल बात हेरी, “कमारी ओ वाकर छावह निकारदेओ काकरकि कमारीक छावा स्वतन्त्र जन्नीमनैयमसे जन्मल् छावसे कौनो हक नैपैनेहो।”#उत २१:१० 31उहओर्से भैयौ, हम्र कमारीक सन्तान नैहुइटी, तर स्वतन्त्र डाईक सन्तान हुइटी।
Currently Selected:
गलाती 4: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
