गलाती 1
1
1मै पावल प्रेरित हुइक लाग कौनो मनैन्हक समूहसे वा कौनो अधिकारीसे नाहीँ तर येशू ख्रीष्टसे ओ उहाँह मुवलमसे जियैना परमेश्वर बाबसे रोजगैल् हुइटुँ। 2मै ओ म्वारसँग रना सब भैयहुँकन्हक तर्फसे गलातीयक मण्डलीह यी चिठी लिखटुँ।
3परमेश्वर बाबा ओ हमार प्रभु येशू ख्रीष्ट टुँहन अनुग्रह ओ शान्ति देहीँ। 4उहाँ जो यी दुष्ट युगमसे हमन बचाइक लाग हमार परमेश्वर ओ बाबक आज्ञा मान्क हमार पापक सटाहा बलि हुइल। 5परमेश्वरह सड्डभर महिमा ह्वाए। आमेन।
खुशीक खबर और नैहो
6मै त टुँहन देख्क छक्क परलबाटुँ, कि ख्रीष्टक अनुग्रहक कारण टुँहन रोजुइया परमेश्वरह अत्रा हाली छोर्क टुह्र और खुशीक खबरओर लागटो। 7वास्तवम खुशीक खबर और नैहो, तर कुई-कुई मनै असिन बाट, हुँक्र टुँहन दिक्क लगाइट ओ ख्रीष्टक खुशीक खबरह बाङ बनाइ ख्वाजट। 8हम्र खुशीक खबर प्रचार कर्ली तर याकर उल्टा कुई प्रचार कर्ठा कलसे चाहा हम्रहे हुई, चाहा स्वर्गदूत ह्वाए, हुँकन्हकम सराप परहीन। 9मै यी बात आघ फे कनहुँ ओ आब फे कहटुँ, टुन्हक मानल खुशीक खबरक उल्टा सिखुइयकम सराप परहिँस।
10असिक कैक का मै मनैन खुशी पारक लाग बाटुँ? ओसिन नैहो, मै त परमेश्वरह खुशी पार चहठुँ। का मै मनैन्हक प्रिय हुइ ख्वाजटुँ? यदि ओसिन हो कलसे, मै ख्रीष्टक सेवक नैहुइटुँ।
पावलक बोलावट
11भैयौ, मै टुँहन का बात बुझल चाहटुँ कलसे, म्वार प्रचार करल खुशीक खबर केक्रो सिर्जाइल बात नैहो। 12मै यी खबर कौनो मनैयसे पाइल नैहुइटुँ, ओ कौनो मनैया महीह यी बात नैसिखाइल। तर यी बात येशू ख्रीष्ट महीह प्रकट कर्लह। 13यहूदी धर्मक भक्त रहलब्याला म्वार जीवन कसिन रह कना बारेम त टुह्र सुनरख्लो, मै कसिक परमेश्वरक मण्डलीह सँतैनासम सँतैनु, ओ ओहीह नाश कर खोज्नु।#प्रे ८:३; २२:४-५; २६:९-११ 14मै उ ब्याला यहूदी धर्म मन्ना मनैमध्ये सबसे कट्टर रनहुँ। मै आपन पुर्खन्हक रीतिथिति मरिमेट्क मानु।#प्रे २२:३ 15तर परमेश्वर आपन अनुग्रहद्वारा मै जन्मनासे आघहेँ महीह अलग कर्ल ओ आपन काम करक लाग रोज्ल। 16मै मार्फत और जातिन्हकम खुशीक खबर प्रचार हुइस्याक कैक उहाँ जो आपन छावह म्वारठे प्रकट कर्ल। उ ब्याला मै कौनो मनैयसे कुछु सल्लाह नैलेनु।#प्रे ९:३-६; २२:६-१०; २६:१३-१८ 17महीसे आघक प्रेरितहुँकनसे सल्लाह लेहक लाग मै यरूशलेम फे नैगैनु। तर मै तुरुन्त अरब देशम गैनु ओ पाछ घुम्क दमस्कसम अइनु।
18तीन वर्ष पाछ मै पत्रुसह भेटाइक लाग यरूशलेम गैनु ओ हुँकाहारठे उहाँ पन्ध्र दिन रनु।#प्रे ९:२६-३० 19और प्रेरितमध्येम मै प्रभुक भैया याकूबह केल भेँट्नु। 20म्वार लिखल बात सत्य हो ओ मै परमेश्वरक नजरम झूट नैबोल्टुँ। 21तबदोस्र मै सिरिया ओ किलिकिया क्षेत्रम गैनु। 22उ ब्यालासम यहूदियम रहल ख्रीष्टक विश्वासीहुँक्र महीह देख्ल नैरलह। 23हुँक्र का बात सुनरख्लह कलसे, “आघ हमन सँतैना मनैया जौन विश्वास नाश कर ख्वाजटह, आब उ मनैया उह विश्वासक प्रचार करटा।” 24असिक हुँक्र मै परिवर्तन हुइलकम परमेश्वरक महिमा कर्ल।
Currently Selected:
गलाती 1: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
