एफिसी 3
3
गैरयहूदीन्हक लाग पावलक काम
1उहओर्से टुह्र गैरयहूदी मनैन्हक लाग ख्रीष्टक काम करबेर मै, पावल कैदी होरनु। 2टुन्हक्के लाग मै परमेश्वरक अनुग्रहक काम कर्ना जिम्मा पारख्नु कना बात टुह्र सुनराखलहुइबो। 3वास्तवम, परमेश्वर गुप्त रहल आपन योजना महीह प्रकट कैदेल। याकर बारेम मै टुँहन छोट्करीम पैल्हहेँ लिख्नहुँ। 4म्वार लिखल बात टुह्र पहर्बो कलसे, मै ख्रीष्टक रहस्य कत्रा बुझरख्नु कना बात टुह्र थाहाँ पैबो। 5पैल्ह यी रहस्य कौनोजहन फे थाहाँ देगैल् नैरह, तर आब पवित्र प्रेरितहुँकन ओ अगमवक्ताहुँकन पवित्र आत्माद्वारा प्रकट हुइल् बा। 6यी बात का हो कलसे, गैरयहूदीहुँक्र फे खुशीक खबरद्वारा परमेश्वरक आशिष पाइसेक्ठ। हुँक्र फे एक्कठो शरीरक अङ्ग हुइट ओ ख्रीष्ट येशूम परमेश्वरक करल प्रतिज्ञक भागीदार होरल।#कल १:२६-२७
7परमेश्वरक वरदानद्वारा मै खुशीक खबर प्रचार कर्ना सेवक हुइनु, यी वरदान उहाँ आपन शक्तिक काम अनुसार महीह देल। 8पवित्र जनमध्ये मै सबसे तुच्छ रलसे फे ख्रीष्टक महान सम्पत्ति खुशीक खबर गैरयहूदीहुँकन सुनैना अनुग्रह परमेश्वर महीह देल। 9सब चिज सृष्टि करुइया परमेश्वरक रहस्यमय योजना कसिक काम कर्ठा कना बात सब मनैन सुनैना काम मै पारख्नु। यी योजना सारा जुग-जुगसम गुप्त रह। 10वर्तमान समयम स्वर्गीय स्थानम शासकहुँक्र ओ अधिकारीहुँक्र मण्डलीद्वारा परमेश्वरक किसिम-किसिमक ज्ञान थाहाँ पाइ सेकहीँ कैक उ रहस्य प्रकट कैगिल् नैरह। 11परमेश्वर यी सब आपन अनन्त योजना अनुसार कर्लह, ओ उहाँ यी योजना हमार प्रभु ख्रीष्ट येशूम पूरा कर्ल। 12ख्रीष्टम रह्क ओ उहाँम विश्वास कैक हम्र परमेश्वरक आघ जैना साहस ओ भरोसा पारख्ली। 13उहओर्से म्वार बिन्ती का बा कलसे, टुन्हक लाग म्वार भ्वागल कष्ट देख्क हरेस जिन खाओ। यी त टुन्हक गौरवक बात हो।
ख्रीष्टक प्रेम
14उहओर्से परमेश्वर बाबक पाउम पर्क मै प्रार्थना कर्ठुं। 15उहाँद्वारा स्वर्ग ओ पृथ्वीक सारा परिवारक नाउँ ढैगिल् बा। 16उहाँक महान् सम्पत्ति ओ उहाँक आत्माद्वारा टुह्र शक्ति पाइसेको ओ उ शक्तिले टुन्हक आत्म-बल बहर्टी जाए कैक मै परमेश्वरसे प्रार्थना कर्ठुं। 17विश्वासद्वारा टुन्हक हृदयम ख्रीष्ट बास करहीँ ओ परमेश्वरक प्रेमम टुन्हक जर फैलटी जाए ओ टुह्र स्थापित हुइटीजाओ कैक मै प्रार्थना कर्ठुं। 18तब टुह्र फे सब पवित्र जनहुँकन्हकसँग ख्रीष्टक प्रेमक लम्बाइ, चौडाइ, उचाइ ओ गहिराइ कत्रा बा कना बात पूरा हिसाबले बुझ सेक्बो। 19सारा ज्ञानले जान नैसेक्जिना रलसे फे टुह्र ख्रीष्टक प्रेम अनुभव करो। ओ परमेश्वरक सारा स्वभावले भरिपूर्ण होओ।
20हमार भित्तर काम कर्ना उहाँक शक्तिद्वारा हमार माङ्गल या स्वाँचलसे फे धेर प्रशस्त मात्रम देह सेक्ना 21परमेश्वरह मण्डली ओ ख्रीष्ट येशूम सारा पुस्ता-पुस्ताम सड्डभर महिमा ह्वाए। आमेन।
Currently Selected:
एफिसी 3: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
