२ कोरिन्थी 12
12
पावलक दर्शन ओ काँट
1कुछु फाइदा नैहुइलसे फे मै गर्व करहीपर्ठा। प्रभु महीह देखाइल ओ मै पाइल दर्शन ओ प्रकाशक बारेम बट्वाइटुँ। 2चौध वर्ष आघक बात हो, ख्रीष्टम विश्वास कर्ना एकठो मनैया तीसर स्वर्गम उठाक लैजागैल। उ मनैयह मै चिह्न्ठुँ। ऊ शरीरसैँट लैजागैल कि बिना शरीरक लैजागैल, उ बात मै नैजन्टुँ, परमेश्वर जन्ठ। 3मै उ मनैयह चिह्न्ठुँ, ऊ शरीरसैँट लैजागैल कि बिना शरीरक लैजागैल, उ बात मै नैजन्टुँ, परमेश्वर जन्ठ। 4ऊ स्वर्गम लैजागैल ओ मनैन्हक मुहले बट्वाए जो नैपाजैना अचम्मक बात ऊ सुन्ल। 5मै उ मनैयक बारेम गर्व करसेक्ठुँ, तर मै आपन कमजोरी बाहेक और बातम गर्व नैकर्नेहुइटुँ। 6यदि मै गर्व कर्ना इच्छा करम कलसे फे, मै मूर्ख नैहुइनेहुइटुँ, काकरकि मै सत्य बात बोल्ठुँ। तर मनै म्वार जीवनम द्याखल ओ महीसे सुनलसे बहुत जिन समझदेहीँ कना मै चहठुँ।
7म्वारम प्रकट कैगिल् अचम्मक दर्शनक कारणले मै घमण्डले नैफुलूँ कैक महीह सताइक लाग ओ घमण्डसे र्वाकक् लाग म्वार शरीरम एकठो काँट अर्थात् शैतानक दूत देगैल्। 8यी काँट म्वारमसे हटादी कैक मै तीन फ्यारा प्रभुसे बिन्ती कर्नु। 9तर उहाँ महीह कल, “म्वार अनुग्रह ट्वार लाग प्रशस्त बा, काकरकि टैँ कमजोर रहल समयम म्वार शक्ति पूरा काम कर्ठा।” उहओर्से ख्रीष्टक शक्ति म्वारम पलिरह कैक मै कमजोरीम झन् धेर खुशी होक गर्व कर्ठुं। 10उहओर्से ख्रीष्टक लाग कमजोरीम, बदनामीम, दुःखकष्टम, सतावटम, आपत्विपत्म मै सन्तुष्ट रठुँ। काकरकि जब मै कमजोर रठुँ, तब मै शक्तिशाली हुइठुँ।
कोरिन्थीहुँकन्हक लाग पावलक सरोकार
11टुह्रहे महीह असिक मूर्खअस घमण्ड कर लगैलो। खासकैक कना हो कलसे, मै टुँहनसे प्रशंसा पाइपर्ना रह। काकरकि मै अपन्हे कुछ नैरलसे फे, अपन्हेह वरिष्ठ प्रेरित सम्झुइयनसे मै का कम बाटुँ? 12पूरा धीरजसे शक्तिशाली ओ अचम्मक काम कैक मै टुन्हक बीचम ख्रीष्टक प्रेरित हुइलक प्रमाण देरख्नु। 13और सब मण्डलीक तुलनम कौन बातम मै टुँहन नैमजा व्यवहार कर्नु? अत्र केल हो कि मै खर्च बिह्वार नैलगैनु, यी म्वार गल्ती हो, यी बातमभर महीह माफ करो।
14आब मै तीसर फ्यारा टुन्हकठे आइटुँ। मै टुन्हक लाग बोझ नैबन्ने हुइटुँ। मै टुन्हक चिजबिज नाहीँ तर टुँहन चहठुँ, काकरकि डाई-बाबन्हक लाग छाई-छावन नाहीँ, तर छाई-छावन्हक लाग डाइबाबाहुँक्र सम्पत्ति साँच्क ढैदेहपर्ठा। 15मै टुँहन आपनठे रहल सब चिज खुशीसे देनेबाटुँ, ओ आपन जीवनसमेत देनेबाटुँ। मै टुँहन धेर प्रेम करम त का टुह्र महीह डान्चे केल प्रेम कर्बो? 16हमार खर्च टुँहन बिह्वार नैपरल, यी बात टुँहन जो थाहाँ बा। हुइना त महीह कौनो-कौनो मनै चलाकी करल कहीँ। 17का मै मनैन पठाक टुँहनसे कुछु फाइदा उठैनु? 18मै तीतसह जाइक लाग बिन्ती कर्नु, ओ हुँकाहारसँग और भैयह फे पठैनहुँ। का तीतस टुँहनसे कुछु फाइदा उठैलह? का हम्र दुनु जन्हक एक्क भावना नैरह? ओ का हम्र एक्क हिसाबले नैचल्ली?
19हम्र अत्राबेरसम आपन बचाउक सफाइ देहटी कैक टुह्र स्वाँचठुइबो। प्रियहुँक्र, हम्र परमेश्वरक सामनेम ख्रीष्टम रह्क ब्वालटी। हमार करल सब काम टुँहन बलगर बनाइक लाग हो। 20मै टुन्हकठे अइलसे ओ स्वाँचलअस टुँहन नैभेटैम, ओ टुह्र फे स्वाँचलअस महीह नैभेटैबो कना महीह डर लागल बा। सायद मै टुन्हक बीचम झग्रा, डाहा, रिस, स्वार्थ, निन्दा, चिब्लीचिब्लक बात, घमण्ड, ओ गोलमाल भेटैठुँ कि कना महीह डर लागल बा। 21महीह यी फे डर बा, कि मै फेदोस्र आइबेर परमेश्वर महीह टुन्हक आघ नीच बनाइसेक्ठ। ओ महीह शोक करपरी, काकरकि टुह्र धेर जन पुरान पाप कर नैछोर्लहुइटो। टुह्र आपन करल अशुद्ध काम, व्यभिचार, ओ छाडा काममसे आपन पापी मन परिवर्तन नैकर्लहुइटो।
Currently Selected:
२ कोरिन्थी 12: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
