१ पत्रुस 5
5
विश्वासीन्हक रेखदेख
1आदरणीय एल्डरहुँक्र, मै अप्नहुँकन का अनुरोध कर चाहटुँ कलसे, मै फे अप्नहुँकन्हकअस एकठो एल्डर हुइटुँ। ख्रीष्टक भ्वागल दुःख मै अपन्हे देखरख्नु ओ पाछ प्रकट हुइना सम्मानम सहभागी हुइबुँ। 2म्वार अनुरोध यी हो: गोठाला भेँरीन्हक रेखदेख करअस परमेश्वर टुन्हक जिम्मम देहल विश्वासीन्हक रेखदेख करो। यी काम करकापम पर्क नाहीँ तर खुशीसे परमेश्वरक इच्छा अनुसार, ओ पैँसक ल्वाभले नाहीँ तर सेवा कर्ना मन लेक करो।#यूह २१:१५-१७ 3टुन्हक जिम्मम रहल विश्वासीन्हकम हैकम जमैना नाहीँ तर हुँकन्हक लाग उदाहरण होओ। 4जब मुख्य गोठाला ख्रीष्ट प्रकट हुइहीँ, तब टुह्र सड्डभर चम्कटीरना सानदार मुकुट पैबो।
नम्र होओ
5ओसहेँक जवान मनै, उमेर ढल्कल मनैन्हक अधीनम रहो। टुह्र सबजन नम्र होक एक-औरजन्हक सेवा करो। काकरकि धर्मशास्त्रम लिखल बा,
“परमेश्वर घमण्डी मनैन्हक विरोध कर्ठ,
तर नम्र मनैन अनुग्रह देठ।”#हितो ३:३४
6उहओर्से नम्र होक शक्तिशाली परमेश्वरक अधीनम रहो, ओ उहाँ ठीक समयम टुँहन उठुइयाबाट।#मत्ती २३:१२; लूक १४:११; १८:१४ 7परमेश्वर टुन्हक वास्ता कर्ठ, उहओर्से आपन सारा चिन्ता-फिक्रि उहाँह सुम्पदेओ।
8होस करो ओ जागा रहो। टुन्हक शत्रु शैतान केहीह फ्याला पारूँ ओ खाडारूँ कैक गुञ्ज्रना सिंहअस खोज्टी घुम्ठा। 9विश्वासम बलगर होक शैतानक विरोध करो। काकरकि संसारम और विश्वासीहुँक्र फे टुन्हकअस दुःख भ्वागट कना बात टुँहन थाहँ बा।
10सारा अनुग्रहले पूर्ण परमेश्वर जो ख्रीष्टम आपन अनन्त महिमम सहभागी हुइक लाग टुँहन बलारख्ल। टुह्र कुछ समय दुःख उठैबो त पाछ उहाँ टुँहन फेदोस्र लौव बनैहीँ, ओ शक्ति देक टुँहन अरगर बनैहीँ। 11सड्डभर सारा शक्ति उहाँक ह्वाए। आमेन।
अन्तिम अभिवादन
12विश्वासयोग्य भैया सिलासह यी छुटीमुटि चिठी लिख लगैनु। यी चिठी लिख लगैना उद्देश्य का हो कलसे, टुँहन उत्साह देना ओ यिहाँ लिखल बात परमेश्वरक सत्य अनुग्रह हो कैक टुँहन साक्षी देना हो। आब यी अनुग्रहम अरगर पलरहो।#प्रे १५:२२,४०
13टुन्हकअस रोजगैल् बेबिलोनम रहल मण्डली टुँहन अभिवादन पठारख्ल। म्वार छावाअस रहल मर्कूस फे टुँहन अभिवादन पठारख्ल।#प्रे १२:१२,२५; १३:१३; १५:३७-३९; कल ४:१०; फिले २४ 14एक-औरजहन पवित्र प्रेमले अभिवादन करो। ख्रीष्टम रहल टुह्र सबजहन शान्ति ह्वाए।
Currently Selected:
१ पत्रुस 5: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
