१ कोरिन्थी 9
9
प्रेरितक अधिकार
1का औरजन्हकअस मै स्वतन्त्र नैहुइटुँ? का मै प्रेरित नैहुइटुँ? का मै हमार प्रभु येशूह नैदेख्लहुँ? का प्रभुक लाग म्वार करल कामक फारा टुह्र नैहुइटो? 2मै औरजन्हक लाग प्रेरित नैरलसे फे कम-से-कम टुन्हक लाग त हुइटुँ। मै प्रभुक प्रेरित हुइटुँ कना बातक प्रमाण त टुह्र अपन्हे हुइटो।
3महीह दोष लगैना मनैन म्वार जवाफ यिह हो। 4का हमार खैनापिना अधिकार नैहो? 5का और प्रेरितन्हकअस, प्रभुक भैयन ओ पत्रुसकअस हमन फे आपन गोसिन्या लेक यात्रा कर्ना अधिकार नैहो? 6अथवा का जीविका चलाइक लाग बारनाबास ओ मै केल काम करपर्ठा?
7का सेनाम रहल सिपाही आपन खर्च अपन्हे ब्यहोर्ठ? का अङ्गूरिक खेती करुइया अङ्गूर खाइ नैपैट? का गोठाला आपन गोरुभैँसन्हक दूध खाइ नैपैट? 8का मै मनैन्हक हिसाबले केल यी बात बट्वाइटुँ? का व्यवस्थम फे यिह बात लिखल नैहो? 9मोशक व्यवस्थम असिक लिखल बा, “घाना डाईंबेर गोरुन्हकम मोह्कर्या जिन लगैहो।” का परमेश्वर गोरुक लाग केल यी बात कलह?#व्य २५:४; १ तिमो ५:१८ 10का उहाँ हमार लाग कलक नैहुइट? हो, यी बात हमार लाग कैगिल् हो। काकरकि हर जोँतुइया ओ घाना दउँइया अनाजक कुछु भाग पैना आशले काम कर्ठा। 11हम्र त टुन्हक माझम आत्मिक बीया बोरख्ली। यदि हम्र टुँहन्हकठेसे कुछु चिज लेली कलसे, का उ हद नाहाङ्गैल् तो?#रोम १५:२७ 12यदि और जन टुन्हकठेसे कुछु चिज लेहसेक्ठ कलसे, का हम्र झन् धेर पाइपर्ना नैहो?
तर हम्र यी हक नैचलैली। ख्रीष्टक बारेम खुशीक खबर सुनाइबेर कुछु बाधा नैपारी कैक हम्र सब चिज सहठी। 13मन्दिरम सेवा करुइयन मन्दिरम जो खैठ, ओ बलि चह्रैना वेदीम सेवा करुइयन चह्रागैल् बलिमसे भाग पैठ कना बात का टुँहन थाहाँ नैहो?#व्य १८:१ 14ओसहेँक खुशीक खबर प्रचार करुइयन खुशीक खबरमसे जो खाइ-लगाइ पैहीँ कना प्रभुक आज्ञा बा।#मत्ती १०:१०; लूक १०:७
15तर मै कौनो हक नैलेलहुँ। आब यी चिठी लिख्क मै हक पाइ चाहल फे नैहुइटुँ। सित्तैम खुशीक खबर प्रचार कर्ना म्वार यी गर्वह कुई फोगट्या सम्झठा कलसे त मै मुलसे फे हुइठा। 16मै खुशीक खबर प्रचार कर्नु कलसे, महीह घमण्ड कर्ना हक नैहो। मै सुसमाचार प्रचार करहीपर्ठा। यदि मै खुशीक खबर प्रचार नैकर्नु कलसे, महीह धिक्कार बा। 17यदि मै यी काम आपन इच्छले कर्टुं कलसे, मै कुछुकुछु पैना आशा कर्नेरनहुँ। तर परमेश्वर महीह यी कामक जिम्मा देलकओर्से, मै आपन कर्तव्य समझ्क यी काम करटुँ। 18आब म्वार ज्याला का हो त? हक अनुसार पैना पैँसा बिना लेल खुशीक खबर प्रचार कर पैना जो म्वार ज्याला हो।
19मै केक्रो कमारा नैहुइटुँ, तर फे धेर जहन ख्रीष्टम विश्वास कराइ सेकूँ कैक मै सबजन्हक कमाराअस होरनु। 20मै यहूदीन्हक माझम काम करबेर हुँक्र ख्रीष्टम विश्वास करहीँ कैक मै यहूदीअस होक जिनु। हुँक्र मोशक देहल व्यवस्था मन्ठ, मै नैमन्टुँ। तर हुँक्र ख्रीष्टम विश्वास करहीँ कैक मै व्यवस्था मान्क जिनु। 21मै व्यवस्था नैरहल मनैन्हक माझम काम करबेर हुँक्र ख्रीष्टम विश्वास करहीँ कैक मै व्यवस्था नैरहल मनैअस होक जिनु। याकर मतलब परमेश्वरक व्यवस्था मै नैमन्टुँ कलक नैहो। वास्तवम मै त ख्रीष्टक व्यवस्था मन्ठुँ। 22मै कमजोर मनैन्हक माझम काम करबेर हुँक्र ख्रीष्टम विश्वास करहीँ कैक मै कमजोरअस होक जिनु। सारा उपायले कौनो ना कौनोजहन बचाइ सेकूँ कैक मै सबजन्हक लाग सब थोक हुइनु। 23मै खुशीक खबर फैलाइक लाग जो यी सब करटुँ, ताकि मै आशिषक भागीदार हुइ सेकूँ।
24दौडम भाग लेहुइयन सबजन दगुर्ठ, तर मुकुट त जितुइया मनैया केल पैठा कना बात का टुँहन थाहाँ नैहो? टुह्र फे मुकुट पैना किसिमले दगुरो।
25खेलम भाग लेहुइयन सबजन अनुशासित हुइपर्ठा। हुँक्र नाश होक जैना मुकुट पाइक लाग ओसिक कर्ठ, तर हम्र त कबु फे नाश नैहुइना मुकुट पाइक लाग असिक कर्ठी। 26उहओर्से बिना उद्देश्यक मै नैदगुर्टुं। मै हावम मुक्का ठोकुइयाअस लडाइँ नैकर्टुं। 27मै आपन शरीरह वशम पारक लाग खेलाडीअसक अनुशासित बनैठुँ। नकि त औरजहन प्रचार कैक पाछ मै अपन्हेजुन अयोग्य हुइसेक्ठुँ।
Currently Selected:
१ कोरिन्थी 9: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
