१ कोरिन्थी 6
6
विश्वासीन्हक बीचम मुद्दामामिला
1टुह्रमध्ये एकठो विश्वासीक और विश्वासीसे झग्रा परल कलसे, उ मुद्दा फैसला कराइक लाग, विश्वासीन्हकठे नैलैजाक अविश्वासीन्हकठे लैजैठो। काजे टुह्र ओसिक कर्ठो? 2एक दिन हम्र विश्वासीहुँक्र संसारक न्याय करुइयाबाटी कना बात का टुँहन थाहाँ नैहो? यदि टुह्र संसारक न्याय करुइयाबाटो कलसे, का टुह्र ओसिन छुटीछुटी बात मिलाइ नैसेक्टो? 3हम्र स्वर्गदूतन्हक फे न्याय करुइयाबाटी कना बात का टुँहन थाहाँ नैहो? यदि ओसिन हो कलसे, टुह्र यी जीवनम कसिक न्याय कर्ना कना बात अवस्य जानपर्ना हो। 4यदि झैझग्रा परल कलसे, काजे टुह्र उ मुद्दा अविश्वासीन्हकठे लैजैठो? हुँकन त मण्डलीक मनै कुछु महत्व नैदेट। 5टुँहन त शरम लाग पर्ना हो। भाइ-भाइक बीचम परल झग्रा मिलाइ सेक्ना बुद्धिमान मनैया का टुह्र कुई नैहुइटो? 6तर एकठो भैया और भैयह मुद्दा चलाइक लाग अविश्वासीन्हक सामुन्ने लैजैठा!
7टुन्हक आपसी मुद्दामामिलाले टुह्र जातसे असफल हुइलक बात देखैठा। बेनसे अन्यायम पर्ना ओहीसे असल नैहो का? बेनसे ठग्वा पैना ओहीसे असल नैहो का? 8तर टुह्र भाइ-भाइम जो एक-औरजहन अन्याय करिक-करा, ओ ठगिक-ठगा कर्ठो।
9अन्याय करुइया मनै परमेश्वरक राज्यक हकदार हुइ पउइया नैहो कैक का टुँहन थाहाँ नैहो? अपन्हेह ध्वाखा जिन देओ। छाडा काम कर्ना, मूर्तिपूजा कर्ना, व्यभिचार कर्ना, पुरुषहुँक्र पुरुषहुँकनसे नैमजा काम कर्ना, समलिङ्गीहुँक्र 10चोर्ना, लोभ कर्ना, मत्वार हुइना, निन्दा कर्ना ओ लुट्ना मनै परमेश्वरक राज्यक हकदार हुइ पउइया नैहुइट। 11टुह्र कुई-कुई एक समयम अस्तह रलहो। तर परमेश्वर टुन्हक पाप धोदेल ओ टुँहन पवित्र बनैल। प्रभु येशू ख्रीष्टम विश्वास कर्लक कारण पवित्र आत्माद्वारा टुह्र धर्मी ठह्रल बाटो।
व्यभिचार
12टुह्रमध्ये कुई कहसेकी, “मै आपन मन लागल ज्या कर्लसे फे हुइठा।” तर मनपर्दी करल सब कामले टुन्हक भलाइ नैहुइट्। कना त मै फे कहसेक्ठुँ, “मै आपन मन लागल ज्या कर्लसे फे हुइठा,” तर मै कुछु चिजिक कमारा हुइ नैचहटुँ।#१ कोर १०:२३ 13टुह्रमध्ये कुई कहसेक्ठा “खैना चिज प्याटिक लाग हो, प्याट खैना चिजिक लाग हो।” यी बात ठीक हो तर परमेश्वर यी दुनु चिजिह नाश करुइयाबाट। तर टुन्हक शरीर व्यभिचारक लाग बनल हो कैक टुह्र कह नैसेक्टो। शरीर त प्रभुक लाग बनल हो, ओ प्रभु हमार शरीरक वास्ता कर्ठ। 14परमेश्वर आपन शक्तिले प्रभुह जीवित बनैल, ओ हमन फे उहाँक शक्तिले जीवित बनुइयाबाट। 15टुन्हक शरीर ख्रीष्टक अङ्ग हो कना बात का टुँहन थाहाँ नैहो? का मै ख्रीष्टक यी अङ्गह वेश्यकम जोडदिऊँ? यी त हुइही नैसेक्ना बात हो। 16वेश्यसे मिल्ना मनैया वेश्यसे शरीरम एक हुइठा कना बात का टुँहन थाहाँ नैहो? धर्मशास्त्रम लिखल बा, “हुँक्र दुनु जन मिल्क एक शरीर हुइठ।”#उत २:२४ 17तर प्रभुकसँग मिलुइया जुन उहाँकसँग आत्मम एक हुइठा।
18व्यभिचारसे दूर रहो। मनैया और पाप आपन शरीरसे बाहर कर्ठा, तर व्यभिचार करुइया आपन शरीरक विरुद्धम पाप कर्ठा। 19टुन्हक शरीर पवित्र आत्मक मन्दिर हो कना बात का टुँहन थाहाँ नैहो? परमेश्वरक देहल पवित्र आत्मा टुन्हकम बास कर्ठ। टुह्र अपन्हे फे आपन नैहुइटो तर परमेश्वरक हुइटो#१ कोर ३:१६; २ कोर ६:१६, 20काकरकि टुँहन परमेश्वर म्वाल डार्क किन्लह। उहओर्से टुह्र परमेश्वरह महिमा करक लाग आपन शरीर प्रयोग करो।
Currently Selected:
१ कोरिन्थी 6: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
