१ कोरिन्थी 5

मण्‍डलीम अनुशासन

1टुन्‍हक बीचम व्‍यभिचार बा कना बात सुनमिलटा। ओसिन व्‍यभिचार त गैरयहूदी मनै नैकर्ट। टुह्रमध्‍ये एकठो मनैया त झन् आपन सवत्‍या डाईह गोसिन्या बनाराखल हुँ।#व्‍य २२:३० 2टुह्रजुन आपनम घमण्‍ड कर्ठो, तर टुह्र त शोक करपर्ना रह ओ ओसिन काम कर्ना मनैयह आपन समाजमसे निक्रादेहपर्ना रह। 3मै शरीरम दूर रलसे फे आत्‍मम त टुन्‍हकठे पलिबाटुँ। मै टुन्‍हकठे रहलअस ओसिन घिनलग्‍टिक काम कर्ना मनैयह दोषी ठह्रारख्‍नु। 4टुह्र हमार प्रभु येशूक नाउँम जम्‍मा हुइल् समयम मै फे आत्‍मम टुन्‍हकठे रठुँ ओ हमार प्रभु येशूक शक्ति उहँ रठन। 5उ मनैयह शैतानक हाँठम सुम्‍पदेओ, ताकि वाकर पापी स्‍वभाव नाश हुहिँस, ओ प्रभु फेदोस्र अइना दिनम वाकर आत्‍माभर बचहीँस।

6टुन्‍हक करल घमण्‍ड ठीक नैहो। पीठम डान्‍चे खमिर मिलैलसे सारा पीठा खमिर होजैठा कना बात टुँहन थाहाँ नैहो का?#गला ५:९ 7टुन्‍हक बीचमसे पुरान खमिर हटाओ, तब टुह्र खमिर बिना मिलैल पकाइल रोटीअस शुद्ध हुइबो। हमार मुक्ति-दिवस टिहार तयार बा, जौन टिहारक पठ्‌रू ख्रीष्‍ट हुइट, ओ उहाँक बलिदान होसेक्‍लन।#प्रस १२:५ 8उहओर्से हम्र खराब ओ दुष्‍ट कामक पुरान खमिर मिलाक बनाइल रोटीले नाहीँ, तर खमिर नैमिलाइल, शुद्ध ओ सत्‍य बातक रोटीले यी टिहार मनाई।#प्रस १३:७; व्‍य १६:३

9मै टुँहन व्‍यभिचारीहुँकनसे सङ्‌गतऽ जिन करहो कैक चिठी लिखरख्‍नहुँ। 10याकर मतलब टुह्र व्‍यभिचार कर्ना, लोभ कर्ना, लुट्‍ना, या मूर्तिपूजा कर्ना यी संसारक मनैनसे सङ्‌गतऽ जिन करहो कलक नैहो। हुँकनसे अलग हुई चहना हो कलसे त टुह्र संसारमसे निकरजाइ पर्ना रह। 11मै त यी बात विश्‍वासी हुइटुँ कना तर वास्‍तवम व्‍यभिचार कर्ना, लोभ कर्ना, मूर्तिपूजा कर्ना, निन्‍दा कर्ना, मत्‍वार रना या लुट्‍ना मनैन्‍हक बारेम कनहुँ। असिन मनैनसे त खाइबेर फे सँग जिन बैठहो।

12मण्‍डलीसे बाहर रहल मनैन्‍हक न्याय कर्ना म्‍वार काम नैहो। तर टुह्र मण्‍डलीम ओसिन काम कर्ना मनैन्‍हक न्याय कर नैपरट्‍ का? 13बाहर रहल मनैन्‍हक न्याय त परमेश्‍वर करुइयाबाट। धर्मशास्‍त्रम लिखल बा, “दुष्‍ट मनैन आपन समाजमसे निक्रादेओ।”#व्‍य १३:५; १७:७

Currently Selected:

१ कोरिन्थी 5: thl

Highlight

Copy

Compare