रोमि 4
4
अब्राहाम साकोङ्छ़ङ्लाम्पा साम्योक्मि काइसाओ
1हान आन्कान यहुदिचिओ आन्सुन्तुम अब्राहाम्ओ अ़तुक्वादा आन्कान दे य़ङिन? 2अब्राहाम अ़काचिचिलाम्पा साम्योक्मि काइसाओदे खो ऱक्भाक मुमा कालाम लिसाओ, मेन निनाम्हाङ्ओ अ़चुबुदा ऱक्भाक मुखालाम मान्लि। 3देकिनालो साम्कालिन्आ म़लोयाङ, “अब्राहाम्आ निनाम्हाङ साकोङ्छ़ङ मु, खोन्कि निनाम्हाङ्आ खो साम्योक्मि अ़काइसा।”#पुङ्चिपुक १५:६ 4काचि कामुआ तोक्तुओ काचिलुङ मोहा प़माय़ङ माआङ, मेन मो खोसाआ तोक्मादोत्ओ अ़पाङ ओ। 5साङ काचि अ़मुनिन, मेन मान्साम्योक्मि साम्योक्मि काकान निनाम्हाङ्एदा सोम्कुवा मुनालो मो सोम्कुवाआङा निनाम्हाङ्आ मो साम्योक्मि अ़कान। 6काचि मान्मुमाङ्ङा निनाम्हाङ्आ साम्योक्मि अ़कान्ओ म़नाओ अ़आसिखाओ अ़तुक्वादा ओवात्नि हाङ दाउद म़य़ङ:
7“साङ्चिओ अ़चुओ अ़अ़त्पा काचिचि म़लेत्तुप़युङ्सुचि,
खोन्कि निनाम्हाङ्आ अ़चुहेवाचि म़दिप्तुप़युङ्सुचि,
मोचि आसिखा कातोक्चि ओ। 8साङ्कोओ अ़हेवाओ अ़लुङ निनाम्हाङ्आ ऩलोउन, मो म़ना आसिखा कातोक ओ।”#साम्ऱङ्भुङ ३२:१-२
9दि ओ आसिखा सिप्मायाम्बुन म़मुवाओचिओ निम्पाङ ओन्ङा ओ? हे सिप्मायाम्बुन मान्मुकादाचिओ निम्पाङ्छाङ ओ? “अब्राहाम्ओ अ़साकोङ्छ़ङ्आ निनाम्हाङ्आ अब्राहाम साम्योक्मि अ़काइसा”नि आन्कान य़ङिन्येन। 10खोन्नालो देम्खा खो साम्योक्मि काइसा? खो बुया सिप्मायाम्बुन पाक्ताचिआकि हे आदेङ्माङ ओ? खोसोओ अ़सिप्मायाम्बुन लिसाचिआकि माआङ मेन बुयाङा ओ। 11सिप्मायाम्बुन्तात अब्राहाम्आ सिप्मायाम्बुन मुमादाङ्का बुयाङा साकोङ्छ़ङ मुवाओ, खोन्कि निनाम्हाङ्आ बुयाङा साम्योक्मि अ़काइसाओसोओ बुन ओ। मोवात्नि अब्राहाम सिप्मायाम्बुन मान्मुनुछाङ निनाम्हाङ्एदा साकोङ्छ़ङ कामु झारा म़नाचिओ अ़चुसुन्तुम लिसा। मोचिआ अ़मुवाओ साकोङ्छ़ङ्ओ अ़तुक्वाआ निनाम्हाङ्आ मोचि साम्योक्मि म़काइसुचि। 12खोन्कि आन्पा अब्राहाम मो सिप्मायाम्बुन म़मुवाओचिओछाङ अ़चुपा ओ, सिप्मायाम्बुन मुमा ओन्ङा माआङ, मेन अब्राहाम्आ सिप्मायाम्बुन मुमा बुया देत्नि निनाम्हाङ्एदा साकोङ्छ़ङ मुवा, मोवाको साकोङ्छ़ङ कामुचिओ अ़चुपा लिसा।
निनाम्हाङ्ओ अ़चुहिप्माय़ङ साकोङ्छ़ङ्लाम्पा लोउम
13हेन्खामादाओ पाङ्यि लिमाओ निम्पाङ अब्राहाम खोन्कि खोसोओ अ़भुङ्चि म़प़चिओ हिप्माय़ङ, य़ङ्हुप्लाम्पा ताओ माआङ, मेन साकोङ्छ़ङ्लाम्पा साम्योक्मि अ़काइसाओसा ताओ। 14य़ङ्हुप्वात्नि काच़चि ओन्ङा पाङ्यि कातोक म़लिनालो साकोङ्छ़ङ्ओ अ़लुङ अ़मेत्तुन, खोन्कि निनाम्हाङ्ओ अ़चुहिप्माय़ङ सोज्जे लि। 15देकिनालो म़ना य़ङ्हुप्वा च़मा अ़ऱनिन खोन्ओसा निनाम्हाङ्ओ अ़चुमाइसुङ ता। मेन य़ङ्हुप्ङा मात्द़ङ्नालो ना य़ङ्हुप फियाङ्सा हेवा मुमा काचिछाङ मान्लिओ।
16खोन्ओसा हिप्माय़ङ साकोङ्छ़ङ्लाप्मा ता। ओ निनाम्हाङ्ओ अ़चुसोमातुक्मादा मोहा प़माय़ङ आसिखा ओ। ओसाआ अब्राहाम्ओ झारा अ़भुङ्चिओ निकि अ़छ़ङ मु। ओ हिप्माय़ङ य़ङ्हुप्वात्नि काच़चिओ निम्पाङ ओन्ङा माआङ, मेन अब्राहाम्वात्नि साकोङ्छ़ङ कामुचिओ निम्पाङ्छाङ ओ, देकिनालो अब्राहाम झारासोओ आन्लावामि आन्पा ओ। 17साम्कालिन्दा ओवात्नि छाप्तायुङ्सा, “अ़ङ्का खाना ब़द्धे रावाचिओ अ़चुसुन्तुम मुनायुङ्ना।”#पुङ्चिपुक १७:४-५ निनाम्हाङ्ओ अ़चुखाङ्मादा अब्राहाम आन्पा ओ, देकिनालो म़सुवादाओचि काखोन्लोन खोन्कि म़चेप्हिदाङा मात्द़ङ्ओदाङ्का सामाचि कामुन्एदा अब्राहाम साकोङ्छ़ङ मुवा।
18“आम्छाचिछाङ ओवात्निङा ब़द्धे म़लि”निम्पाङ निनाम्हाङ म़य़ङावात्नि, अ़क्छेप्छाङ सोम्कुवा मात्द़ङ्याङ्ओ ग़रि अब्राहाम साकोङ्छ़ङ मुवा खोन्कि खो ब़द्धे रावाचिओ अ़चुसुन्तुम लिसा।#पुङ्चिपुक १५:५ 19खोन्कि आप्फात अ़क सयेकादोङ बात्तुचिउओ अब्राहाम स़मादामा मुवाङाओ अ़पोक लिसाओ माङ्लो सारा छातोक्मा मान्ऱकादा लिसाओ सिन्तुकिछाङ अब्राहाम्आ साकोङ्छ़ङ मुमा छित्माइ मान्छित्दो। 20निनाम्हाङ्ओ अ़चुहिप्माय़ङ्ओ अ़तुक्वादा मान्केङ्आ खो देत्छाङ मुमा मान्ऱदो, मेन अ़साकोङ्छ़ङ्दा च़लोक पोन्याङ्सा खारा, मोवात्नि खोसाआ निनाम्हाङ साया मेत्तु। 21खो अ़हिप्ताओ य़ङ निनाम्हाङ्आ झारा तामालामा अ़ऱ निकिना अब्राहाम अ़नुछ्या साकोङ्छ़ङ मुवाङा। 22खोन्ओसा खोसोओ अ़साकोङ्छ़ङ्आ निनाम्हाङ्आ खो साम्योक्मि अ़काइसा। 23खो साम्योक्मि काइसानिओ ओ य़ङ खोसोओ निम्पाङ ओन्ङा छाप्ताओ माआङ, 24मेन आन्को निम्पाङ्छाङ ओ। आन्कान येसु आन्हाङ्पा म़सुदाओदाङ्का काखोन्लोन्एदा साकोङ्छ़ङ मुन्लो निनाम्हाङ्आ आन्कान्छाङ साम्योक्मि म़कान। 25येसु आन्हेवाचिओ निम्पाङ म़सुवा खोन्कि आन्कान साम्योक्मि कान्माओ निम्पाङ म़सुवादाओदाङ्का निनाम्हाङ्आ अ़लासाखोन्तालोइसा।
Currently Selected:
रोमि 4: bap
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
