युहन्ना 2
2
काना सहरादाओ सायाकाम्मा
1सुम्कालेन ओ लेन गालिल्दाओ काना सहरादा अ़क्छा सायाकाम्साङा। येसुओ अ़मा मोदा म़युङाङा। 2येसु खोन्कि खोक्कोसोओ अ़चुकाखेङ्पाचिछाङ सायाकाम्खादा म़बुत्तुयुङ्सुचि। 3अङ्गुरा माङ्वा चिआकिना येसुओ अ़चुमाआ खोक्को अ़लोवा, “मोचिएदा अङ्गुरा माङ्वा मात्द़ङ।”
4खोन्कि येसुआ मो अ़लोवा, “आमो, अ़ङ्का दे मुमादोत अ़ङ्का मान्लोदानि। अ़ङ्ग़रि हान्छाङ मान्तालायुक।”
5खोक्कोसोओ अ़चुमाआ काफाचि लोचि, “खोक्कोसाआ खानानिन देत्नि ऩलोन, खोवात्नि चुवानिन।”
6हान यहुदिचिओ सेङ्मा अ़चुच़माथाङ्माओ निम्पाङ मोदा आप्फात, अ़क सये लितरा वाङाङाओ लुङ्ओ छकातात ल़ङ्भ़चि म़युङ्सायुङ्सा। 7येसुआ काफाचि म़लोचि, “ल़ङ्भ़चि चाक्वाआ भेम्सानुम्च़म।” मोचिआ ल़ङ्भ़चिओ अ़चुदोदुतारि चाक्वाआ म़भेम्सुचि। 8खोन्किना खोक्कोसाआ मोचि म़लोचि, “अ़चिलोक अ़आनुम्कि खाबाचा काखाङ्एदा खात्तानुम।”
खोन्किना मोचिआ मो अ़खात्ता। 9खाबाचादाओ काखाङ्पाआ मो चाक्वा छेम्सु, मो हान अङ्गुरा माङ्वादा फान्तायुङ्सा। मो खादाङ्का तात्माय़ङ्ओ मो खोसाआ मान्सिन्दोङु, मेन चाक्वा काभेम काफाचिआ अ़सिन्ताङा। खोन्कि मो चानुचाओ अ़धुवाआ सायाकाकाम्पा बुत्तुकि लो, 10“झारा म़नाचिआ बुया चानुओ अङ्गुरा माङ्वा म़प़चि, खोन्किना म़नाचिआ ब़द्धे अ़दुङ्चिन्कि ओन्ङा चाअ़त्ओ अङ्गुरा माङ्वा म़प़चि। खाना ना चानुयाङ्ओ अङ्गुरा माङ्वा ओन्ग़रितारि त़युङ्सुङु।”
11येसुआ ओ बुयाओदुओ बुन गालिल्ओ कानादा खाङ्अ़मुसाओ। ओवात्नि खोक्कोसाआ अ़चुसावा खाङ्अ़मुसा, खोन्कि खोक्कोसोओ अ़चुकाखेङ्पाचिआ खोक्कोएदा साकोङ्छ़ङ म़मुवा।
येसुआ निनाम्हाङ ब़क्खाखिम अ़सेङ्साओ
मत्ति २१:१२-१३; मर्कुस ११:१५-१७; लुका १९:४५-४६
12खोन्किना येसु अ़चुओमा, अ़चुनिछाचि खोन्कि अ़चुकाखेङ्पाचिएनान कफर्नहुम म़खारा, खोन्कि अ़चित लेन खोचि मोदा म़युङा। 13हान यहुदिचिओ काक्माखात्मा चानुचा नेक्ताताङा, खोन्ओसा येसु यरुसलेम म़खारा। 14खोक्कोसाआ निनाम्हाङ ब़क्खाखिम बुक्लुङ्दा म़नाचि बोयोङ्चि, भेराचि, साप्दुकुत्वाचि म़इनाङाओ खोन्कि अ़चुतेबलाचिदा फेक्वा म़बाराङाओ म़धिरुचि।#२:१४ निनाम्हाङ ब़क्खाखिम्दा रोमि तोक्पो हाङ्ओ माङ्लो रोमि लावाछाप याआङाओ फेक्वा दाम्दु छोन्मा मान्प़याङ्ओसाआ, मोदा रोमि फेक्वादाङ्का यहुदि फेक्वा काबात्चि म़युङ्ङा। 15खोन्कि खोक्कोसाआ माक्य़ओ अ़क्तात य़हुप अ़मुवाकि झारा मोचिओ अ़चुभेराचि खोन्कि अ़चुबोयोङ्चि निनाम्हाङ ब़क्खाखिम्दाङ्का बुङ्खाया म़ऱसुलोइसुचि। खोन्कि फेक्वा काबात्चिओ अ़चुफेक्वाचि म़रिसुखाइसुप़चि खोन्कि अ़चुतेबलाचि म़लिम्सुखाइसुप़चि। 16खोक्कोसाआ साप्दुकुत्वा काइन्चि म़लोचि, “ओदाङ्का ओचि झारा खात्तानुम्च़म। अ़ङ्पापाओ अ़चुखिम खित्खाइन्खा खिम मान्मुदानुम।”
17खोक्कोसोओ अ़चुकाखेङ्पाचिआ साम्कालिन्दा छाप्तायुङ्साओ य़ङ अ़मित्तातोक्ता, “आम्नुओ खिम्ओ निम्पाङ अ़ङ्राक्आ मिआवात्नि अ़ङ्का अ़ह़त्ङा।”#साम्ऱङ्भुङ ६९:९
18यहुदिचिओ अ़चुबुसुवाचिआ खोक्को अ़सेना, “खाना ओ काचिचि त़मुचि, ओ काचि मुमाओ पाङ खानाएदा युङ्याङ्ओनालो आन्कान्का बुन खाङ्मेत्नि।”
19येसुआ मोचि म़लासुलोचि, “ओ निनाम्हाङ ब़क्खाखिम भुङ्साखाइसानुम, खोन्कि अ़ङ्का सुम्कालेन्दा ओ मुङ्चिउङ।”
20खोन्कि यहुदिचिआ अ़लोवा, “ओ निनाम्हाङ ब़क्खाखिम मुमाओ निम्पाङ छयालिस्कादोङ वाङा, खोन्कि दि खानानिन ओ सुम्कालेन्दा मुमाचिन्मा त़ऱम कि?” 21मेन येसु म़य़ङाओ निनाम्हाङ ब़क्खाखिम, खोक्कोसोओ आप्पिओ अ़चुपोक्ओ अ़तुक्वादा ओ। 22खोक्को म़सुवादाओदाङ्का म़खोन्तालोन्ताकिना येसुआ म़य़ङाओ मो य़ङ अ़चुकाखेङ्पाचिआ अ़मित्तातोक्ताकि मोचिआ साम्कालिन्दा खोक्कोसोओ अ़चुतुक्वादा छाप्ताओ य़ङ्चि खोन्कि येसु म़चेवायुङ्साओ य़ङ्दा साकोङ्छ़ङ म़मुवा।
23खोन्कि खोक्को काक्माखात्मा चानुचाओ ग़रि यरुसलेम्दा म़युङाङाहिदा खोक्कोसाआ अ़मुवाओ म़दोम्दाओ काचिचि म़खाचिकि ब़द्धेसाआ खोक्कोएदा साकोङ्छ़ङ म़मुवा, 24मेन येसुआ मोचिओ अ़चुय़ङ्दा सोम्कुवा मान्मुम़दोचि, देकिनालो झारा म़नाचिओ अ़चुसाकोङ्वाचि खोक्कोसाआ अ़सिन्ताङा। 25म़नाओ अ़तुक्वादा साङ्आछाङ खोक्को चिन्मा मान्दोत्याङ, देकिनालो म़नाओ अ़साकोङ्वादा दि याक, मो खोक्कोसाआ अ़सिन्ताङा।
Currently Selected:
युहन्ना 2: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.