कलस्सि 1
1
1निनाम्हाङ्ओ अ़चुमिन्मालाम्पा ख्रिस्त येसुओ अ़चुछाम्माय़ङ लिसाङ्ओ अ़ङ्का पावल खोन्कि आन्निछा तिमोथिआ, 2कलस्सेदा कायुङ निनाम्हाङ्ओ अ़चुम़नाचि खोन्कि ख्रिस्त मान्छित्माङ कात़ङ्युङ्चिएदा ओ छाप्लावा छाप्चुङ्चुवा। आन्पापा निनाम्हाङ्आ खानानिन सोम्तुक्मा खोन्कि सेवाङ्नि ऩमुन्ने।
आलाङ्ओ यामात्मा
3आम्नुओ निम्पाङ आन्काच्या यामात्च्याहिदा आन्हाङ्पा येसु ख्रिस्तओ अ़चुपापा निनाम्हाङ अ़धुन आलाङ प़चुवा। 4देकिनालो ख्रिस्त येसुएदाओ आम्नुओ साकोङ्छ़ङ खोन्कि झारा निनाम्हाङ्ओ अ़चुम़नाचिएदाओ आम्नुओ सोमातुक्माओ अ़तुक्वादा आन्काच्या एनायुङ्साचुवा। 5निनाम्हाङ्आ आम्नुओ निम्पाङ निनाम्मादु अ़युङ्साओ आसिखा अ़नुछ्याङा त़तोक्तुम निकिना त़मित्तुम्युङ्सुम्योम्ओसा खानानिन्आ मोवात्नि सोमात़तुक्तुम्युङ्सुम्योम्ओ। मो आसिखाओ अ़तुक्वादा खानानिन बुयाङा अ़छ़ङ्य़ङ माङ्लो नुय़ङ्खान्दा त़एनुम्युङ्सुम। 6निनाम्हाङ्ओ अ़नुछ्याओ अ़चुसोम्तुक्मा खानानिन्आ त़एनुम्कि त़तुप्तुम्ओ लेन्दाङ्का नुय़ङ्खान्आ आम्नुओ रादा अ़सिवा सिसुङु। मोवात्निङा ओ नुय़ङ्खान्आ झारा हेन्खामादा फेयाङ्सा काचि मुङु। 7मो नुय़ङ्खान आन्कान्का सोमातुक्तुम्योम्काओ काफापा यावा इपाफ्रास्आ खानानिन त़चिन्तिन। मो आन्काओ लिप्पादा ख्रिस्तओ अ़क्छा सोम्कुवा मुमा खान्तुओ काब़त्पा ओ। 8सेङ्लावाआ खानानिन ऩप़न्ओ सोमातुक्माओ अ़तुक्वादा खोसाआ आन्कान्का खाअ़एत्तिन्युङ्सिन्का।
9खोन्ओसा आम्नुओ तुक्वादा आन्कान्का एनुम्काओ लेन्दाङ्का झारा लावामि खारु खोन्कि तुप्माआ निनाम्हाङ्ओ अ़चुमिन्मा नुलोक तुप्मा त़ऱम्ने निकिना आम्नुओ निम्पाङ आन्कान्का यामात्मा मान्छित्युक्तुम्का। 10खोन्किना खानानिन हाङ्पाओ अ़चुमिन्मावाको ह़ङ्म़ङ त़ह़ङिन्कि अ़धुन खोक्कोसोओ अ़चुऩङानुमा त़ऱम। मोवात्नि त़ह़ङिन्नालो आम्नुओ ह़ङ्म़ङ्आ झाराकापाराओ अ़नुवाक सिवा सिसु, खोन्कि खानानिन निनाम्हाङ्ओ अ़चुतायादा पोइसा त़खारिन। 11खोन्कि खोक्कोसोओ अ़चुसाम्स़रिओ सावावात्नि खानानिन दियाकोछाङ दुखादा ऩङानुमाआ हुङ्याङ्सा आङ्मा सावा ऩप़न। 12खोन्कि साम्ओ हाङ्होन्दा आन्कान निनाम्हाङ्ओ अ़चुम़नाचि लिमा काऱ कामु निनाम्हाङ पापा आलाङ पुवानुम। 13खोक्कोसाआ आन्कान कुन्यामाओ अ़सावादाङ्का म़फोङ्सा, खोन्कि सोमाअ़तुक्ताङाओ अ़चुओछाओ अ़चुहाङ्होन्दा म़खाइसायुङ्सा। 14खोक्कोसाआ म़फोङ्सा खोन्कि आन्हेवाचि म़लेत्ता।
ख्रिस्तओ अ़चुतोक्पो
15ख्रिस्त अ़दात्निन्ओ निनाम्हाङ्ओ दात्ओ अ़चुकात्मा खोन्कि झारा मुन्माय़ङ्चिओदाङ्का बुयाङा म़युङाङा। खोन्कि खोक्को झारादाङ्का तोक्पो म़मुवाङा 16देकिनालो निनाम्मादुओ खोन्कि हेन्खामादाओ, म़दात्याङ्ओ खोन्कि ऩदात्निनिन्ओ झारा सामाचि खोक्कोलाम्पाङा म़मुयाओ। लावामि सावाचि, हाङ्युङ्मिताङ्चि, हाङ्काचि कामुचि, खोन्कि पाङ्चि, ओ झारा य़ङ्चि खोक्कोलाम्पा खोन्कि खोसोओ निम्पाङ अ़मुयाओ। 17झारा य़ङ्चिदाङ्का बुया खोक्को म़युङाङा खोन्कि झारा य़ङ्चि खोक्कोसाआ म़तोङ्सुयुङ्सुचि। 18खोक्को साम्भुङ्ओ अ़छोङ म़मुयाङ, खोन्कि मो साम्भुङ खोक्कोसोओ अ़चुपोक ओ। खोक्को अ़पुङ्चिपुक ओ, म़सुवादाओचिदाङ्का काखोन्लोन खोक्को बुयाओ म़मुयाङ। खोन्ओसा झारा य़ङ्चिदाङ्का खोक्को अ़छोङ्दुओ म़लिने। 19देकिनालो निनाम्हाङ्ओ झारा अ़चुयाक्मा ख्रिस्तदा याक्याङ, खोन्कि मो निनाम्हाङ्ओ अ़चुमिन्मावा मुयाङ। 20खोन्कि निनाम्हाङ्आ अ़चुछालाम्पा क्रुस्दाओ हेन्खोक्वाआ सेवाङ्नि अ़मुवाकि हेन्खामादाओने कि निनाम्मादुओङाने, खोक्कोलाम्पाङा झारा य़ङ्चि खोक्कोएदा तोङ्सि म़तारुचि।
21खाराओ ग़रिदा खानानिन निनाम्हाङ्एदाङ्का अ़थाया त़मुन्येन। खानानिन अ़त्लो त़मिनिन, खोन्कि अ़त्लो काचि त़मुन्ओसा खोक्कोसोओ अ़चुङेङ त़लिसिन। 22मेन खोक्कोसोओ अ़चुछाओ अ़चुपोक्ओ हेन्खोक्वालाम्पा निनाम्हाङ्ओ अ़चुयावा ऩमुन्युङ्सिन। खोन्ओसा ख्रिस्तआ खानानिन निनाम्हाङ्ओ अ़चुबुदा ऩतारिन्हिदा सेङ्लो, थुपि मात्द़ङ्ओ खोन्कि मान्फिकादा त़लिसिन्ने। 23मोवात्नि लिमाओ निम्पाङ खानानिन आम्नुओ साकोङ्छ़ङ्दा ओह्यात्नि-मोह्यात्नि मान्लिमाङ युङ्मादोत, खोन्कि खानानिन्आ नुय़ङ्खान त़एनुम्हिदा निनाम्हाङ्आ ऩहिप्तिन्ओ य़ङ खोसाआ ऩप़न्निओ य़ङ्दा अ़छ़ङ लिमाकि युङ्मायुङ्मादोत। मो नुय़ङ्खान हेन्खामादाओ झारा म़नाचि खाम़एत्तायुङ्सा। अ़ङ्का पावल मो नुय़ङ्खान खाकालु हारुक लिसाङ्युङ्साङ।
साम्भुङ्ओ निप्माङ पावल्ओ अ़काचि
24हान आम्नुओ निम्पाङ अ़ङ्का दुखा आङ्मादा अ़ङ्ऩङानुङान्च़ङ। खोन्कि ख्रिस्तओ अ़चुलिप्पादा म़युङ्याङ्ओ चाअ़त्माचि खोक्कोसोओ अ़चुपोक माङ्लो साम्भुङ्ओ निम्पाङ अ़ङ्का अ़ङ्पोक्दा तासुङ्लाङ। 25निनाम्हाङ्आ आम्नुओ निम्पाङ अ़ङ्का ऩपुवाङ्ओ पाङ्खुन्एनान खान्तुलो काचि मुङाकि निनाम्हाङ्ओ झारा अ़चुय़ङ खालुमा निम्पाङ अ़ङ्का साम्भुङ्ओ अ़हारुक लिसाङ। 26निनाम्हाङ्ओ मो य़ङ जुगा-जुगा खोन्कि दुङ-दुङ बुयादाङ्का अ़कोङ्दुम्वा म़कुम्सायुङ्साओ, हान खोक्कोसोओ अ़चुम़नाचि खाङ्म़मेत्तुयुङ्सुचि। 27झारा रावाचिओ निम्पाङ खोक्कोसोओ ओ ब़द्धे तोक्पो अ़चुकोङ्दुम खोसोओ अ़चुम़नाचिआ अ़तुप्नेनि निनाम्हाङ म़मिन। अ़कोङ्दुम ओक्कोङा ओ, ख्रिस्त खानानिन्एदा म़याक्याङ। ओ य़ङ्आ खानानिन्छाङ निनाम्हाङ्ओ अ़चुसाम त़तोक्तुम्नि मिन्मा ऩप़न। 28ख्रिस्त कात़ङ झारा म़नाचि आन्कान्का निनाम्हाङ्ओ अ़चुबुदा खात्तुम्योम्च़म्काहिदा खोचि म़पोन्चिन्ने निकिना आन्कान्का झारा म़नाचि चाप्चेत्याङ्सा खोन्कि झारा खारुदा चिन्याङ्सा ख्रिस्तओ अ़तुक्वादा खालुसुम्का। 29मो काचिओ निम्पाङ अ़ङ्कोङ्दा काचि म़मुयाङ्ओ ख्रिस्तओ तोक्पो अ़चुसावाआ अ़ङ्का अ़न्नुनु चात्लो काचि मुङा।
Currently Selected:
कलस्सि 1: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.