१ तिमोथि 1
1
1आन्कालेन्पा निनाम्हाङ खोन्कि आन्सोम्कुवा येसु ख्रिस्तओ अ़चुलोमाआ येसु ख्रिस्तओ अ़चुछाम्माय़ङ अ़ङ्का पावल्आ, 2ओ छाप्लावा साकोङ्छ़ङ्दा अ़नुछ्याओ अ़ङ्छा तिमोथिओ निम्पाङ ओ छाप्लावा छाप्तुङ्योङ। निनाम्हाङ पापा खोन्कि आन्ख्रिस्त येसुआ खाना नुलोक ऩमुने, सोमाऩतुक्ने खोन्कि सेवाङ्नि ऩमुने।
सोज्जेओ चिन्माय़ङ्चिदाङ्का चाप्चेत्तानिन्चिन
3अ़ङ्का माकेदोनिया खाराङ्याङ्हिदा खाना यायोक प़नादानाओ वात्नि, खाना एफिसस्दा युङा, खोन्कि सोज्जे काचिन्चि देत्निकिछाङ मोदा मान्चिन्दानुम्च़म्नि लोचि। 4खाना मोचि सोज्जेओ दोय़ङ्ला खोन्कि अ़चुसुन्तुम्चिओ अ़लुक्निन्ओ अ़चुसुन्तुम य़ङ्चिदा वान्मान्चिन मान्प़दोचि। ओसाआ निनाम्हाङ्ओ अ़चुकाचि माआङ दुम्तुमा य़ङ्चि ओन्ङा लोइसुचि, मोसाआ म़नाचि साकोङ्छ़ङ्दा निनाम्हाङ्ओ अ़चुमित्चिऩङ्वाको ह़ङ्म़ङ ह़ङ्मा अ़प़न्चिन। 5अ़ङ्को ओ लोमाय़ङ्ओ मित्चिऩङ ओवाको ओ: सेङ्याङ्ओ साकोङ्वा, अ़नुवाक छेन्खाताया खोन्कि अ़नुछ्याओ साकोङ्छ़ङ्लाम्पा ताओ सोमातुक्माआ म़भेप्तुचिने। 6मेन खा-खाक्को म़नाचि ओ झारा य़ङ्चिदाङ्का म़थेमायुङ्सा खोन्कि अ़काचिमाद़ङ्ओ दुम्छ़न्मादा म़लासायुङ्सा। 7मोचि मोसाओ अ़य़ङ्हुप काचिन्पाचि लिमा म़लाम, मेन आप्पि म़चेप्ओ य़ङ मोचिआ ऩतुप्तुन माङ्लो राक्एनान अ़छ़ङ अ़मुओ अ़तुक्वादाछाङ मोचिआ ऩतुप्तुन।
8आन्कान सिन्तुम्योम, साङ्आ य़ङ्हुप नुलोक याङुनालो मो अ़नुवाक ओ। 9आन्कान ओछाङ सिन्तुम्योम, य़ङ्हुप साम्योक्मिचिओ निम्पाङ मुवाओ माआङ, मेन य़ङ्हुप काकाक्चि, लोमावा मान्च़कादाचिओ निम्पाङ, निनाम्हाङ साया मान्मेत्कादा खोन्कि हेवामि, ऩसेङ्निनिन्ओ, मान्साम्योक्मि खोन्कि अ़चुपाचि माङ्लो अ़चुमाचि कासेत्चि, म़नाकासेत्चिओ निम्पाङ, 10ताङ्लान कामुचिओ निम्पाङ, दुवाछा-दुवाछा अ़त्लोकाच़चिओ निम्पाङ, हारुक काइन्चिओ निम्पाङ, म़ना काम़प्चिओ निम्पाङ, सोज्जे सालुम्स़ङ काप़चि खोन्कि अ़छ़ङ चिन्माय़ङ्ओ अ़देङ्सालाप्पादा दियाकोछाङ काचि कामुचिओ निम्पाङ मुवा ओ। 11ओ अ़ङ्का ऩपुवाङ्ओ चिन्माय़ङ साम्स़रिओ नुय़ङ्खान चोन्मा खान्तुओ निनाम्हाङ्ओवात्निओ मुयाङ।
निनाम्हाङ्ओ अ़चुसोम्तुक्माओ निम्पाङ पावल्ओ अ़आलाङ
12अ़ङ्का सावा काप़ आन्हाङ्पा येसु ख्रिस्त आलाङ प़ङ। देकिनालो खोक्कोसाआ अ़ङ्का सोम्कुवा ऩमुवाङ्कि अ़चुकाचिदा ऩपाआङ्युङ्साङ। 13बुया अ़ङ्का ख्रिस्त रुकाफोक, काल़क खोन्कि खोक्को कासुङ मुवाङ्याङ्नुछाङ अ़ङ्का ओ मान्सिन्ङाङा खोन्कि साकोङ्छ़ङ मान्मुयुक्तुङ्हिदा मुङ्ओसा अ़ङ्का निनाम्हाङ्आ सोमाऩतुक्ताङ। 14खोन्कि येसु ख्रिस्तएदाओ अ़ङ्साकोङ्छ़ङ खोन्कि अ़ङ्सोमातुक्माआ अ़ङ्को निम्पाङ आन्हाङ्पा येसुओ अ़चुसोम्तुक्मा च़लोक खाङ्ऩमेत्ताङ्युङ्साङ। 15ओ य़ङ अ़छ़ङ खोन्कि लोक्माखान्तुओ मुयाङ, हेवामिचि लेइसि येसु ख्रिस्त हेन्खामादा म़ता। खोन्कि मो हेवामिचिदाङ्का अ़ङ्का मुलो ओ। 16मेन अ़ङ्का निनाम्हाङ्आ सोमाऩतुक्ताङ, देकिनालो हेवामिचिदाङ्का मुलो लिसाङ्किछाङ येसु ख्रिस्तओ अ़धिवाङ अ़चुहुङ्माआ अ़ङ्का अ़मात्ऩङ्वात्नि खाङ्मुमा अ़ऱङाने। खोन्ओसा निचिआ अ़सिन्कि खोक्कोएदा मोचिछाङ साकोङ्छ़ङ म़मुने खोन्कि अ़धुन्ओ ह़ङ्म़ङ अ़तोक्ने। 17हान दुङ-दुङ्तारिओ हाङ, अ़लुक्निन्ओ खोन्कि अ़खान्मिन्ओ अ़क्छा ओन्ङा निनाम्हाङ्ओ अ़धुन-अ़धुन्तारि साया खोन्कि अ़चुऩङ लोङ्ने। मोवात्निङा लिने।
18अ़ङ्छा तिमोथि, आम्को निम्पाङ अ़ङ्लोमाय़ङ्चि ओदा म़याक्याङ, आम्तुक्वादा बुया निनाम्हाङ्य़ङ खालुमाय़ङ्वात्नि साकोङ्छ़ङ खोन्कि अ़नुवाक छेन्खाताया युङ्याङ्सा खाना अ़नुवाक ङेन मुमा रुवा। 19साकोङ्छ़ङ खोन्कि अ़नुवाक छेन्खाताया मान्लेत्दो। खा-खाक्को म़नाचिआ छेन्खाताया ऩङाअ़छिराकि अ़चुसाकोङ्छ़ङ अ़लुक्तायुङ्सा। 20मोचिएदाओ हुमेनियस खोन्कि अलेक्जेन्दर ओ। मोचिआ निनाम्हाङ रुमान्फोक्दामा चिन्चिचिन्ने निम्पाङ अ़ङ्का मोचि सैतानाओ अ़छुक्दा पाक्तुङ्प़ङ्युङ्सुङ्च़ङ।
Currently Selected:
१ तिमोथि 1: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.