Uru 3
3
Uruti a giĩ yɛ boo
1Bɛ kio, ǹ zuũ dan Naomii pɛ nɛ: «Maa nɛlɔ, man giɛ mìi susu ǹ bǎã li n wɔ lɛa, n dɔ boo la n goã yii-nyɛɛ la. 2Ka ma pɛ n nɛ lɔn, n wo dí nya kun ka Boazi mɛn a nɛlɔ dí-nyalin ni ke lɛn, wɔsɛn dinin min ni. Á ke, á re woe a *ɔrzi duwəə ǹ bǎã nɛ pelo tèlò kɛ lɛ din ni. 3Yoo n nə n zoo, n nyɔɔ gìĩ kɔɔ̃n lɔ, n nə n mɔnaa sonboren wɔ, n wo ɔrzi duwəə ǹ bǎã lɛ nɛ. Sɛnɛ, n baran n din nyaa wa, yǎa Boazi lɛ màn bii a nyɛɛ, a mu mii. 4Bɛ̀ á woe wɛɛ tán, n ga a waa ǹ bǎã ganaa. Bɛ kio, n zɔ̃ n dɔ, n pìi bɔ a gòãn lɛ#3.4 pii bɔ a gòãn lɛ: Izirayeli gána nɛ, bɛ n nyɛɛ, mà ǹ dɛnaa n giɛ li ǹ na asɛ tamaa., n dɔ waa tán. N doamaa bɛ́ nɛ n sii mɛn zɛnaa a din tá re bɛ pii n ni.» 5Uruti ná a lɛ si: «N màn mɛn tumaa pɛ ma nɛ, ma á re bɛ zɛnɛɛ.»
6Á woo ɔrzi duwəə ǹ bǎã lɛ nɛ, ǹ zuũ dan lɛ màn mɛn pɛ nɛ, a ná a tumaa zɛnaa miɛ̃ ka te! 7Boazi màn bii, á màn mi, a foo goã kɔɔ̃nɛ. Bɛ kio, á woo waa tán, a ɔrzi toa lɛ li. Uruti daa sɛlɛlɛ nɛ, á pìi bɔ a gòãn lɛ, á n zɔ̃ á waa tán.
8Làan bɛ́ á kɔ gɔ̀nɔn bìn diɛ giĩ lɛ kũ. A bɛ́ á n bɔyaa, bɛ̀ lɔ kɔn bɛ́ waa-n tán a gòãn wɔlɔ li. 9Á nɔ̀n da la: «Die n ka nsɛ nɛ?» Uruti ná a lɛ si: «Masɛ nɛ, n bɛ̀rɛlɔ Uruti ni. Ma kũ n ma tamaa, a giala, maa sii n doe n din ganaa.» 10Boazi tɔ́n pɛ nɛ: «Maa nɛlɔ, Dɛnaa Lawa die a barka da n ganaa. N bɔlɔgoondɛnaabaa ǹ sii mɛn zɛnaa sisia, bɛ á gole á la bibinaa wɔ kɛ nɛ. A giala, n baa si tɔntɔraa doobaan hinlaa a pàãman kio wa. 11Maa nɛlɔ, kanna kəni, n baran nyɛ́ɛ baa wa. N bɛ́ re màn mɛn tumaa pii masɛ nɛ, man die bɛ zɛnɛɛ n nɛ. A giala, wɔa minin tumaa á doɛ̃ taãn-taãnɛ mà ma n lɔ sonbore lɛa. 12#Uru 2.20 Taãn nɛ, n sii n doe masɛ ganaa, sɛnɛ min kɔsɔ tan, n sii n doe bɛ ganaa á la masɛ nɛ. 13Waa kànaa, baayɛlɛ, bɛ̀ n tá li a n mìi koa n sii li, á siĩni, á boe la a n zɛnaa. Sɛnɛ, bɛ̀ n ba li a n mìi koa n sii li wa, masɛ tá n lɛ koe ka Dɛnaa Lawa Yiikoonaa kɛ tɔ nɛ, man mìi koa n sii li. Waa tán yǎa lɛ̀ wɛɛ.»
14Á waa tán Boazi gòãn wɔlɔ li yǎa lɛ̀ waa. Sɛnɛ, á yoo baayɛlɛ yiisoone bɛ̀ yii ba min doɛ̃ wa. A giala, Boazi na á goã pii, mà a siĩni, min dɔ̃ mà lɔ kɛ daa ɔrzi duwəə ǹ bǎã lɛ-n wa. 15Boazi pɛ nɛ: «Dɔnkɛ gole ke n ganaa, bɛ bɔ n kɔ. N na a lɛ bɔ sɔnbɔraanɛ.» Á ná a lɛ bɔ, Boazi ɔrzi gongo yii goon zɔɔ̃ á kaa a nɛ, á yu ni. Bɛ kio, Boazi woo piɛ#3.15 Boazi woo piɛ: Lawa a Boo sɛ́wɔn tɛnɛn man pii, mà Uruti woo piɛ..
16Uruti dɔ kiɛ̃ á woo ǹ zuũ dan li. Ǹ zuũ dan nɔ̀n da la á pɛ: «Maa nɛlɔ, a na á n baa lɔn kəni?» Giĩ lɛ sii mɛn zɛnaa nɛ, á ná a tumaa laakalaa Naomii ni. 17Á pɛ nɛ: – Ɔrzi gongo yii goon ke, á din na á kɔ ma la. Á pɛ ma-n kɛnɛn: «A siĩni n wusoo n wo n zuũ dan lɛ li, ka n gɔn kooro-n wa.» 18Naomii pɛ: «Maa nɛlɔ, sii lɛ bɛ́ re n giala nyɔmiɛ̃ lɔn, n yii da, yǎa n bɛ doɛ̃. A giala, giĩ kɛ lɛ a re giã ǹ bǎã yii, bɛ̀ a ná a sii kɛ lɛ yɔrɔ bɔ pelo kɛ lɛ din ni wa.»
Currently Selected:
Uru 3: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.