Loe 78
78
Lawa laanka a minin lɛlɛ boo
1 #
Loe 50.1
Asaafu a minin doroo ǹ loe n ke.
Ma tɔrɔn lɛn, ka n too kɔ maa doroo ǹ boo li,
ka n too naa ma lɛ gɔ́ɔ̃ ǹ boo li.
2 #
Mat 13.35
Man die n lɛ buĩ ma boo giməə da,
man die lɛlɛ siin pii ka nɛ.
3Wɔ bɛ́ wɔ́ màn mɛn ma, wɔ́ dɔ̃ dɔn,
wɔ digolon nə màn mɛn pɛ wɔ nɛ,
4wɔ a re bɛ duri wɔ tɔrɔn la wa.
Siin mɛnɛn bɛ́ Dɛnaa Lawa tɔ boe,
a Pàãyiidɛnaabaa gɔ́ɔ̃ nɛ, a kaãbaa ǹ siin mɛnɛn zɛnaa,
wɔ á re bɛn pii kiodɛnan manɛ.
5A na á sii zɛnaa ǹ gɔn koa a minin wɔ lɛa,
á landa siin koa Izirayeli.
Á pɛ wɔ digolon manɛ,
mà ǹ nə ǹ nɛnyaanan daraa bɛa siin lɛn ganaa,
6ń giɛ min mɛnɛn bɛ́ re die ǹ kio, bɛn nə n daraa ǹ ganaa.
Nɛnyaanan mɛnɛn bɛ́ re yii,
bɛn dɔn nə yoo, ǹ na a laakalaa ǹ dinin nɛnyaanan manɛ.
7Ǹ pɛ ǹ nɛ mà ǹ nə n foo doa Lawa ganaa,
ǹ yiri nyan bɔ ka a nya ǹ dí dadaran kɛn nɛ wa,
ǹ na a dí-pɛn dɔn tamaa.
8Ǹ baran n baa ka ǹ digolon kɛn bɛ́ lɔn wa.
Tɔrɔ too kaka-a, piã-wɔlen manɛ.
Ǹ yiri n paa, ǹ ba n foo doɛ Lawa ganaa wa.
9Efrayimu minin kɛn, a laanɛ ǹsɛn nə́ goã zia biɛ ka kiɛ nɛ,
ǹ nə́ n gòã da baa nɛ ziabaa pinaa.
10A giala, manə ǹ Lawa a lɛ kɔ kɔn la lɛ tamaa wa,
ǹ nə́ n piã ǹ kɔ a landa lɛ wa.
11Ǹ yiri bɔ ka a nya ǹ dí dadaran kɛn nɛ,
a kaãbaa ǹ siin mɛnɛn nyaa ǹ nɛ, ǹ yiri bɔ ka bɛn nɛ.
12 #
BBN 7.8–12.32
Lɛlɛ, Lawa na á kaãbaa ǹ siin kɛn zɛnaa wɔ digolon yii ni,
Ezipti gána nɛ, Soan#78.12 Ezipti gána a kiwi goon ne. Izirayeli nɛnyaanan nə kɔ zii mɛn lɛ ǹ soo Ezipti biikoo li, a n bɛ lɛ la. bǎã kɛ li.
13 #
BBN 14.21-22
Á kɔ̀ mu yu kɔn màn paa, á toa ǹ nə́ kiɛ̃.
Á mu lɛ sɔkɔn wɔlɔ paa ka tà-zuĩ ni.
14 #
BBN 13.21-22
Bɛ̀ lɛ̀ waa, a nə ǹ nyɛɛnaan boe ka labara nɛ,
bɛ̀ wɔlɔ tii lɔn, a nə ǹ nyɛɛnaan boe ka tɛ fúlu ni.
15 #
BBN 17.1-7; MNS 20.2-13 Á gɛ̀fun yu kɔn don sa bii,
á ǹ gɔ mu ni, ka mu mɛn bɛ́ boe mu yala gole ne.
16Á mu bɔ gɛ̀fu ni, bɛ pɛrɛn baa,
á toa mu gigiã bɔ a nɛ ka tà nɛ.
17Bɛ tumaa kio, maǹ wusii bɛ̀ ǹ sii la Lawa la.
Maǹ wusii bɛ̀ ǹ nə n gòãn dii Lon a Lawa Gole ganaa,
bɛa diə gole kɛ lɛ nɛ.
18 #
BBN 16.2-15; MNS 11.4-23,31-35 Ǹ nə́ n da Lawa gɔ́ɔ̃ li woone,
mà yǎa a ǹsɛn foo dùũ màn-bii koe ǹsɛn la.
19Ǹ nə́ boo baraa da Lawa ganaa, ǹ nə́ pɛ:
Lawa á boe la a màn-bii kɔ wɔ la diə gole kɛ nɛ?
20Sonbore ne, á gɛ̀fu dɛ, mu gigiã bɔ a nɛ.
Sɛnɛ, á boe la a màn-bii dɔ kɔ wɔ la,
a siĩ dɔ kɔ wɔ la?
21Dɛnaa Lawa bɛ́ a ná a minin lɛn lɛ ma boo diɛ miɛ̃,
a foo yoo ǹ li, a foo yoo Izirayeli li ka tɛ nɛ.
22A giala, ǹ nə n foo doa Lawa ganaa wa,
ǹ waa la mà á re ǹsɛn kirisibiɛ wa.
23Bɛ tumaa kio, á boo da ka lon a labaran nɛ,
á lon lɛ bũ,
24 #
Zaã 6.31
á *maánə gisĩ ǹ la, á ǹ too ne,
á lon a màn-bii lɛ kɔ ǹ la.
25Didie lon a dia dí-a wolen màn bii.
Lawa màn-bii kɔ ǹ la, ǹ nə́ bii ǹ nə́ kã.
26Bɛ kio, á toa lɛ̀giala piɛ̃ kɛ bɔ lon,
ka a din pàã nɛ, á daa ka gusin a lɛ̀ gùrù piɛ̃ kɛ nɛ.
27Á siĩ gisĩ ǹ la, gigiã ka tán tii bɛ́ lɔn.
Á bàanan gisĩ ǹ la, gigiã ka kɔ̀ mu li ǹ nyɔɔsɔ̃ bɛ́ lɔn.
28A na á goã ǹ zuĩ ǹ giã ǹ bǎã lɛ nɛ,
á ǹ kionən lɛnpɛnɛ nɛ.
29Ǹ nə́ màn bii ǹ nə́ kã,
màn mɛn lɛ sii bɛ́ ǹ ganaa, ǹ nə́ bɛ yɛ.
30Sɛnɛ, ǹ tɔn bii ǹ nə́ kã bɔrɔ dinin wa,
ǹ lɛ bɛ́ tɔn piɛ̃ nɛ ka màn-bii ni ǹ mɛn waáraa,
31Lawa a foo-busii yoo ǹ gialaa,
á ǹ min kakan dɛ á ǹ bɔ ǹ bii,
á Izirayeli a tɔntɔraan dɛ á ǹ kaa.
32Haalɛ ka bɛ nɛ, maǹ nə́ goã tɔn sii baraa zɛnɛɛ,
ǹ goã wɛɛ a kaãbaa sii zɛnaan kɛn la wa.
33Bɛ lɛ nɛ, á ǹ tá kanaa a lɛawaan baa ka piɛ̃ nɛ,
á ǹ tá kanaa a lɛ̀n ziziɛ̃ ka foo biɛ na ǹ siin ni.
34Bɛ̀ Lawa nə́ ǹ goon nyin bɔ ǹ mɛn pinaa,
gialakunun kɛn man doe ǹ dinin ganaa, ǹ wusoo ǹ wo Lawa li.
35Ǹ yiri n gisĩ a nɛ mà Lawa nə ǹsɛn tamaali lɛa,
mà Lon a Lawa Gole nə ǹsɛn zia gii dali lɛa.
36Sɛnɛ, ǹ lɛ na á goã Lawa bebele,
ǹ lɛwɔn na á goã soɛ boe ne.
37Ǹ foo goã kun ka Lawa-n taãn wa,
ǹ goã n foo doɛ a lɛ kɔ kɔn la ǹ boo kɛ ganaa wa.
38Sɛnɛ, Lawa n makara doɛ̃ wole lɛa,
a ǹ dɛ wa, a na á goã ǹ sãn toɛ ǹ nɛ.
Biikoo gigiã, a n kirii a din foo la,
a toa a foo yoo á la yii-n wa.
39Lawa á doɛ̃ mà maǹ minbuiin nɛn lɛa,
piɛ̃ kooro lɛa kiɛ̃, a na a wusii á die doo wa.
40Ǹ nə́ n gòãn dii Dɛnaa Lawa ganaa gunyin gigiã,
ǹ nə́ wɔ a lon don sa bii gunyin damata.
41Maǹ nə́ goã n diɛ Lawa gɔ́ɔ̃ li miɛ̃,
ǹ nə́ goã Izirayeli a Lawa sonbore kɛ foo ziziɛ̃ ǹ sii zɛnɛɛ.
42Ǹ yiri bɔ ka Lawa a boo sii la nɛ,
a bɛ́ á ǹ si ǹ zɔ́ɔn la ǹ mɛn pinaa,
ǹ yiri bɔ ka bɛ nɛ.
43 #
BBN 7.3–11.10
Á sii a kɔnbɔn nyaa Ezipti minin manɛ,
á kaãbaa ǹ sii kakan nyaa Soan minin manɛ.
44 #
BBN 7.17-21
Á ǹ kɔ̀ mu bɔyaa á baa mà lɛa,
á ǹ tà mu baa a lɛa, ń giɛ ǹ baran boo la ǹ mi wa.
45 #
BBN 8.1-6,20-24 Á nyuunun dia ǹ la, bɛn nə́ sɔn dɔ ǹ ganaa.
Á sɔmɔnɔn dia ǹ la, bɛn nə́ bɔ̀n da ǹ tán ganaa.
46 #
BBN 10.12-15
Ǹ mànan mɛnɛn dù dɛ, á bɛn kɔ bisinin la,
ǹ màn mɛn a dí nya, á bɛ kɔ bisinin la.
47 #
BBN 9.22-25
Á ǹ too dan ziziɛ̃ ka la gii ni,
á ǹ gɔ́rɔ dan ziziɛ̃ ka nyɛn nɛ.
48Á toa la gii nə́ ǹ tɔɔ dadaran dɛ,
la a paraa nə́ n tɔɔ bisinin dɛ.
49A foo busu Ezipti minin kɛn li á la yii ni.
A foo bɛ́ á yoo a là n kakaɛ̃,
á daa bɔ̀n da ǹ ganaa#78.49 Min tɛnɛn nə́ boo kɛ lɛ giala ma kɛnɛn: Á lon a dia dí-a wolen dia ǹ nə́ daa bɔ̀n da ǹ ganaa..
50A bɛ́ á zii kɔ a foo-busii la,
a ǹ kanbaa gɛ̀ ganaa doo wa,
á ǹ toa busu baraa gɔn.
51 #
BBN 12.29
Á Ezipti minin nɛgiĩ bibinaan tumaa dɛ,
á ǹ gɔn binaa nɛgiĩn dɛ ǹ kionən tumaa nɛ.
52 #
BBN 13.17-22
Á ná a minin lɛn waa á ǹ bɔ Ezipti,
á soo ǹ ne ka tɔɔ kuru bɛ́ lɔn,
á mɛ ǹ nyɛɛnɛ ka sèren-lɛduə̃li bɛ́ lɔn,
á woo ǹ ne don sa bii.
53 #
BBN 14.26-28
Lawa nə́ ǹ nyɛɛnaan bɔ ka là nyantoro ne,
sii kɔn ná a nyɛ́ɛ diɛ ǹ ganaa wa.
Sɛnɛ, kɔ̀ mu nə́ n kɔ ǹ zɔ́ɔn lɛ.
54 #
BBN 15.17; Zoz 3.14-17 Á woo ǹ ne a din a bǎã sonbore kɛ nɛ,
kele kɛ la, a din màn mɛn si ka a din pàã nɛ.
55 #
Zoz 11.16-23
Á tɔrɔ kɔsɔn loo á ǹ bɔ ǹ nyɛɛnɛ.
Á bɛn bǎãn gii ǹ ni ǹ kíɛ̃ lɛa,
á Izirayeli tɔrɔn kaa bɛn mɔnaa kionən ne.
56 #
SYB 2.11-15
Bɛ tumaa kio, Izirayeli tɔrɔn nə́ n gòãn dii Lawa ganaa,
ǹ nə́ n da Lon a Lawa Gole kɛ gɔ́ɔ̃ li,
ǹ kɔ a da ǹ boon lɛ wa.
57Ka ǹ digolon bɛ́ lɔn, ǹ nə́ n boɛ̃ ǹ nə n bɔ Lawa li,
ǹ nə́ wusoo ka ǹ kio ne,
min ba n foo doɛ ǹ ganaa wa.
Maǹ ka sa biɛ bubunii bɛ́ lɔn.
58Ǹ nə́ Lawa foo busu ka ǹ wúlu bɔ ǹ bǎãn kɛn nɛ,
ǹ ná a foo yoo ka ǹ dìn kɛn nɛ.
59Lawa bɛ́ á bɛ yɛ, a foo busu parsiini,
á nɔmaa á n gɔn bɔ Izirayeli ganaa kəni ka lenlen.
60 #
Zoz 18.1; Sam1 4.3; Zer 7.12-14; 26.6 A giã ǹ bǎã ke Siiloo#78.60 Siiloo na á goã Izirayelin Lawa guguru kɔ ǹ bǎã gole lɛa. Kio ne, kii Davida tɔn Zeruzalɛmu baa Lawa guguru kɔ ǹ bǎã lɛa. kiwi, á bɛ toa walan,
wɔ mɔnaa kion mɛn lɛ dɔ, a giã ǹ bǎã lɛa minin bii,
á bɛ dɔ toa walan.
61 #
Sam1 4.4-22
Goo sonbore ke, Lawa guguru kɔ ǹ bǎã nɛ,
a din pàã kɛ laanka a gugurubaa kɛa sii a kɔnbɔ lɛa,
á toa zɔ́ɔn nə́ daa bɛ saa, ǹ nə́ woo ne bɛ̀rɛbaa ǹ bǎã nɛ.
62A foo yoo a minin lɛn li,
á toa ǹ nə́ ǹ dɛ ka gɔya sa nɛ.
63Zia nə́ ǹ tɔntɔraan bii,
ǹ nɛlɔn kɛn, giĩn nə yɛ bɛn wɔ lɛa doo wa.
64Ǹ Lawa a wúlu-bɔlen nə́ gɛ̀ kakaarɛ wɔ,
ǹ lɔ giɔɔrɔn nə ǹ gɛ̀ wuu pɛ wa.
65Bɛa biikoo li, ka min din bɛ́ yui nyuù-n lɔn,
ka yɔ bɛ́ we min kaka yii-n lɔn, Dɛnaa yoo.
66Á kɔ zɔ́ɔn kɛn kio lɛ á ǹ dɛ,
á sìi da ǹ ganaa, sìi mɛn bɛ́ a nyɛɛ duduu wa.
67Á n piã ka Zozɛfu tɔrɔn nɛ,
a Zozɛfu a nɛ Efrayimu tɔrɔn bɔ wa.
68Sɛnɛ, a na á Zudaa tɔrɔn bɔ.
*Siɔn kele kɛ lɛ na á kɔɔ̃n kɔ a ganaa.
69Á ná a Kion sonbore kɛ dɔ walan,
sasa ka lon ne, a giala n doa-n ka tán nɛ,
a na a tan yǎa duduu.
70 #
Sam1 16.11-12; Sam2 7.8; KZS1 17.7 A ná a bɛ̀rɛgiĩ Davida bɔ,
a na á woo kũ sèren kion,
71á bɔ sèren kio á daa nɛ.
Á baa a din a minin kɛn lɛduə̃li lɛa,
á baa Izirayeli-lɛduə̃li lɛa.
72Davida nə́ ǹ lɛduə̃ ka gɔ́ɔ̃ fubaa nɛ,
á ǹ nyɛɛnaan bɔ ka gɔn sonbore ne.
San Bible Protestant Edition © Bible Society of Burkina Faso, 2011.