Loe 2
2
Lawa a kii koa ǹ loe
1 #
NDS 4.25-26
Gánan bɛ́ n gagasa diɛ, bɛ giala mà wàa?
Tɔrɔn bɛ́ n yiri koɛ sii mɛn ganaa, kooro ne.
2Kanaa lɛ a kiin nə́ n lɛ kaa kun,
a min dadaran lɛn nə́ yoo Dɛnaa Lawa gialaa,
kun ka a kii kɛ nɛ, á bɔ á koa.
3Kiin lɛn nə́ pɛ:
Ka daa wɔ n bɔlɔ bɔ ǹ biɛ nɛ.
Ka daa wɔ n si ǹ la.
4Sɛnɛ, Dɛnaa Lawa mɛn bɛ́ kiibaa la lon,
bɛ́ yaa wɔ ǹ ganaa, á ǹ da yaa lɛa.
5Bɛ kio a foo yoo ǹ li, á boo da.
Bɛa foo boo kɛ lɛ nə́ ǹ foo biɛ na.
6A na á pɛ: Ma kii mɛn bɔ,
man má bɛ koa maa *Siɔn kele sonbore kɛ la.
7Dɛnaa Lawa golee boo mɛn la, man die bɛ lɛ pii.
Dɛnaa Lawa pɛ ma-n kɛnɛn:
Ma n maa nɛgiĩ#2.7 Maa nɛgiĩ: Bɛ̀ min mɛn Izirayelin kii baa, maǹ nə́ goã pii mà Lawa na á lɛ kɔ bɛa dɛnaa ganaa a nɛgiĩ lɛa. lɛa,
a kũ pelo ganaa, masɛ din ni n Díi lɛa.
8Ma nyankɔ, ma á re gánan tumaa koe n la, ǹ nə n wɔ baa.
Ma á re kanaa lɛ doa ǹ bǎãn koe n la, ǹ nə n wɔ baa.
9 #
SNS 2.26-27; 12.5; 19.15 #Sam2 7.14; NDS 13.33; Ebr 1.5; 5.5 Pàã mɛn bɛ́ kaka ka fɔlɔ nɛ, n tá re bɛ nyɛɛ ǹ nɛ,
n tá re ǹ yɔyɔrɛ ka gì donkolon bɛ́ lɔn.
10Haya! Kiin lɛn, ka yiri yɛ kanna kəni.
Kanaa a pàãdɛnan lɛn, ka toa ka doroo ma.
11Ka dí nya Dɛnaa Lawa nɛ, bɛ̀ ka n nyɛ́ɛ biɛ nɛ.
Ka a pàãdɛnaabaa dɔ̃ ka n nyɛnyɛɛ.
12Ka a nɛgiĩ lɛ guguru kɔ.
Bɛ bie wa, bɛ̀ a foo yoo, ka laan bɛ̀ ka dɔ̃, bɛ̀ bɔ̀n ka yɛ.
A giala, a foo á re yui fufuu.
Min mɛnɛn bɛ́ kiɛ Dɛnaa yele,
bɛn foo á re kɔɔ̃n koe.
San Bible Protestant Edition © Bible Society of Burkina Faso, 2011.