Suu 19
19
1Bɛ̀ ń doobaa baa,
n giã ǹ gɔn nə́ pepere,
á soɛ soɛ-bɔle laanka baãnaa nɛ.
2Taasiɛ wɛɛ a siĩn wa.
Wo fufuu a la yii-n ni
die ka siɛ̃ nɛ.
3Minbuiin nɛn sii kooro
zɛnaan man toɛ ǹ tá siɛ̃.
Bɛ kio, ǹ foo n yoo-n
Dɛnaa Lawa li.
4Pàãma a giaáran man mɔnɛɛ,
sɛnɛ, maǹ doobaa niɛ̃ kɔn
ka a giaára nɛ.
5Dɔlɔ á re n boe
siére baraa-pɛli ganaa ǹ kɔn pinaa.
Sɛnɛ, soɛ-bɔli dɔ bɛ á kɔnbɔ
ka màn mɛn nɛ,
á re bɛ yii.
6Min dadaran
laakalaalin man gigiã.
Min tumaa n bǐɛ̃-baali
a giaára lɛa.
7Doobaa tìĩ n boe ne
ǹ dɔɔ̃nɔn nyin ni.
A giaáran manə n nyɛnɛɛ nɛ
a la a lɛlɛ ǹ nɛ.
Bɛ̀ á zoɛ̃ mà a boo da ǹ nɛ,
a ba ǹ yii wa.
8Min mɛn bɛ́ n darɛɛ
taasiɛ we ganaa,
a n sii sonbore zɛnɛɛ a din ni.
Min mɛn bɛ́ n doɛ
mà asɛ sii giala ma,
sii n yɔrɔ yii bɛ gɔn.
9Dɔlɔ á re n boe
siére baraa-pɛli ganaa ǹ kɔn pinaa.
Soɛ-bɔli sɛ́ wɔ n ka bɔ̀n nɛ.
10Yiriwɛɛnaa kɔnbɔ
ka màndɛnaabaa-n wa,
sanparɛ ka bɛ̀rɛ a goã
kiin mìi la nɛ.
11Yiridɛnaa foo á yui naanaa wa.
Ǹ bɛ́ baraa mɛn zɛnɛɛ nɛ,
bɛ toa walan nə
gugurubaa koe la.
12Kii a foo-yoo na á kɔnbɔ
ka yàra a lɛbaa nɛ,
sɛnɛ, a sonborebaa n ka
pele bɛ́ lɔn buu ganaa.
13Nɛnyaan yiriwɛɛnaa n bɔ̀n lɛa
ǹ di ganaa.
Lɔ zia-dali n ka
tɔlɔ foɛ̃ wole bɛ́ lɔn,
a mu boe ná a ba n lɛ kuĩ wa.
14N tá boe la n kion laanka
díin gɔn màn yɛ kíɛ̃ lɛa
sɛnɛ, lɔ yiridɛnaa n
Dɛnaa Lawa a bǐɛ̃ lɛa.
15Yoobaa n min gù dii,
bòo n dí-nyali baãnaa sɛ kuĩ.
16Min mɛnɛn bɛ́ koe dí-pɛn lɛ,
manə n dinin nyin tamɛɛ.
Min mɛnɛn bɛ́ ǹ ba yiri boe
ǹ dinin giã ǹ gɔn li wa,
ǹ tá re giɛ̃.
17Min mɛn bɛ́ doobaa goe,
a n giɔ̀mɔ diɛ Dɛnaa Lawa ganaa.
Dɛnaa Lawa á re sarɛɛ.
18N nɛnyaan doroo a kɔnpɛ
ka a doroo biikoo ne.
Sɛnɛ n foo yoo gɔ́ɔ̃ nɛ,
n nyan nə ǹ dɛ n nə ǹ koa gɛ̀ li wa.
19Foo-yoo gole doamaa-n ka
dɔlɔ màn saraa nɛ.
Bɛ̀ ká n dɛnaa toa walan,
ka n tɔn sɔsɔmɛ diɛ
a zɛnaa ganaa.
20N too kɔ doroo li,
n lɛ kɔ daraa ganaa.
Ka bɛ nɛ, n tá re sii-doɛ̃ yii.
21Minbuiinin man sii gigiã
taasɛ ǹ yiri ni,
sɛnɛ, Dɛnaa Lawa
foo sii nə n zɛnɛɛ.
22N bɛ́ zoɛ̃ li
mà n min goã ka yɔrɔ mɛn nɛ,
bɛ n ka sonborebaa nɛ.
Doobaa á soɛ soɛ-bɔli ni.
23Dɛnaa Lawa guguru kɔ n yii toɛ koo.
Min mɛnɛn bɛ́ a guguru koe,
ǹ ba foɛ̃ màn kɔn li wa,
koe dɔ a boe ǹ ganaa wa.
24Yoonaa nə n gɔn we tasa nɛ,
sɛnɛ a woe ne a lɛ-a wa.
25Bɛ̀ n yaa wɔ minin ganaa
wole dɛ,
bɛ á re doroo koe baãnaa la.
Boo da yiridɛnaa nɛ,
n bɛ́ li n daraa sii mɛn ganaa,
á re bɛ giala miɛ.
26Nɛnyaan mɛn a giã ǹ gɔn bɛ́
sìi diɛ,
a nə ǹ di gɔn màn tumaa koɛ̃,
a ǹ dan da baa si ganaa.
27Maa nɛ,
bɛ̀ n nə n too kɔ
gɔn waa ǹ boon li wa,
n ba re màn kɔn doɛ̃ wa.
28Siere-pɛli mɛn laadoo bɛ́
a bie ka dí-pɛn nɛ wa,
bɛa màn kɔn lɛa wa.
Sii baraa n kɔɔ̃n
min baraan ganaa.
29Yaa wɔ minin ganaa
wole nə n yiri koa a dɔlɔ li.
Yiriwɛɛnaa dɔ nə n yɔrɔ bɔ
mandɛ a lɛa.
Currently Selected:
Suu 19: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
