Suu 17
17
1Buuru lɛ koro gere
ka giã kiĩ ta soɛ
kion mɛn bɛ́ piɛ̃ nɛ ka zia nɛ
a màn-bii n kɔɔ̃nɛ.
2Nɛgiĩ mɛn bɛ́ sìi diɛ,
dí-nyali sonbore á re a bǎã siɛ.
Á re kíɛ̃ gii kɔn ka ǹ dɔɔ̃nɔn nɛ.
3Maǹ sana laanka wɔrɔ á
sonborebaa doɛ̃ ka tɛ nɛ.
Sɛnɛ, Dɛnaa Lawa n kiri we
minbuiin nɛ foo a siĩnbaa ganaa.
4Min mɛn bɛ́ sii baraa zɛnɛɛ,
a n boe a din ni,
á n too koe boo baraan li.
Min mɛn bɛ́ soɛ boe,
a nə n too koe soɛ boon li.
5Min mɛn bɛ́ yaa we
doobaa ganaa,
a n sɔ koe ǹ zɛnaali ganaa.
Min mɛn bɛ́ n nyɛnyɛɛ
ka ǹ miãn koe ne,
dɔlɔ á re n boe ǹ dɛnaa ganaa.
6Nɔ̀ɔnɔn man
díigolen kii bafolo lɛa,
nɛnyaanan manə ǹ díin tɔ boe.
7Baãnaa kɔnbɔ ka boo sonbore-n wa.
Kiã dɔ kɔnbɔ ka soɛ-n wa.
8Min tɛn a taasiɛ nɛ mà lɛ pii ǹ
màn nə mìi kɔɔ̃nbaa lɛa asɛ ganaa.
A n taasɛ mà á boe la
a kiɛnlɛ tumaa bũ asɛ nɛ.
9Min mɛn bɛ́ giɛ giaárabaa li,
a toa a yiri bɔ ka sãn nɛ.
Yiri kɔ sãn li n giaáran niɛ̃ kɔn.
10Yiridɛnaa a sɛ̀ pɛ ma-a
á busi a ganaa
á la baãnaa a bàlà yii
paabiɛ kɔmala nɛ.
11Min baraa n zoɛ̃ piã li,
sɛnɛ, dia dí-a wole
baraa á re die a gialaa.
12Ǹ don màn babaraa
mɛn a nɛn dɛ,
bɛa dɔmalɛ á soɛ baãnaa
a dɔmalɛ nɛ a gàãn pinaa.
13Min mɛn bɛ́ sii bǐɛ̃ sarɛɛ
ka sii baraa nɛ,
koe á re goɛ̃ a kion duduu.
14Bɛ̀ n zia giala kɔ,
ma nə n mu tii lɛ bũ.
Zia lɛ laan bɛ̀ a n yui, n basã.
15Min mɛn bɛ́ sonbore koe
min baraa la,
ka min mɛn bɛ́ min pepere
yii tì-a kuĩ koe,
ǹ dinin paanan tìĩ n boe ne
Dɛnaa Lawa nɛ.
16Wɔrɔ n wàa bǐɛ̃ koe
baãnaa gɔn?
A yiri woorobaa yɛ nɛ?
Bɛ boo bie wa.
Á gaãnaa lɛa bɛ ganaa.
17Giaáran man kɔɔ̃n kɔn
biikoo tumaa li.
Dɔɔ̃n wɔ n ka biikoo kaka nɛ.
18Yiriwɛɛnaa dinsɔɔ̃ n lɛ koe
a n miã a giɔ̀mɔ a siére baa.
19Min mɛn bɛ́ zia narɛ,
a n sii baraa dɔ narɛ.
Min mɛn bɛ́ n din gole koe,
a n bɔ̀n diɛ a din ganaa.
20Min mɛn yiri bɛ́ kɔkɔrɔ,
bɛa là nyantoro yii wa.
Min mɛn a lɛn su bɛ́ baraa,
á re koe yii.
21Bɛ̀ n baãnaa yɛ ń da kanaa,
n wɔ n ka foo busii ni.
Nɛnyaan yiriwɛɛnaa n di
a boe la a nyɛnyɛɛ wa.
22Foo kɔɔ̃n tá boe la a busu nya,
sɛnɛ foo ziziɛ̃ n pǎã wɛɛ diɛ.
23Min baraan lɛ pii ǹ màn sii
ka durii ni
màn mɛn bɛ́ toɛ a kiri kɔkɔrɔ wɔ.
24Sii-doɛ̃ mɛn bɛ́ kunu
yiridɛnaa ganaa,
a n giɛ bɛ li.
Sɛnɛ, yiriwɛɛnaa sɛ n giɛ
tán lɛ dan ganaa.
25Nɛgiĩ yiriwɛɛnaa n foo
busii lɛa ǹ di ganaa.
Min mɛn yɛ á da kanaa,
a n foo ziziɛ̃ lɛa bɛ ganaa.
26Dɔlɔ bɔ min pepere ganaa
a siĩn duduu wa.
Min yii guguru-a
kɔnbɔ ka dɛ-n wa.
27Min mɛn bɛ́ boe a din la
boo diɛ gɔ́ɔ̃ nɛ,
a na a doɛ̃ nyɛɛ.
Min mɛn bɛ́ boe n foo kũ la,
yiridɛnaa nɛ.
28Min tá boe la n baãnaan
dinin taasɛ sii-dɔ̃lin lɛa,
bɛ̀ ǹ nə n lɛ tã.
Bɛ̀ ǹ boo da wa,
ma n taasɛ mà yiridɛnan manɛ.
Currently Selected:
Suu 17: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
