Mat 3
3
Zaã Boo Tii Kɔɔ̃n mɛn pɛ
(Mar 1.1-8; Luk 3.1-18; Zaã 1.19-28)
1Bɛa biikoo li, Zaã, *batɛmu diɛ wole daa Zudee don bii, a ná a giala kɔ á Boo Tii Kɔɔ̃n pɛ. 2#Mat 4.17; Mar 1.15A na á goã pii: «Ka n taasɛ ka wusoo kaa sii baraan kio, a giala, Lawa n die a kiibaa ǹ dí lɛ nyɛɛ wɔ bii sisia.»
3 #
Iza 40.3
Lawa a boo gii-dali Izayii boo da min mɛn wɔ gɔn la, Zaã din ni. A na á pɛ:
«Min a lɛ-dia bɔ diə gɔ́ɔ̃ nɛ á pɛ:
Ka Dɛnaa a zii zɛnaa.
Ka zii telee sonboren zɛnaa nɛ!»
4 #
Kiin2 1.8
Zaã na á goã nyɔɔmaa ka dɔnkɛ we, a bii yii ǹ maabɛlɛ na á goã ki lɛa, a màn-bii na á goã ka bisin laanka zoo nyɔɔ nɛ. 5Zeruzalɛmu kiwi minin laanka Zudee gána minin tumaa woo a li, kun ka Zurdɛ̃ tà lɛ-a gána minin tumaa nɛ. 6Ǹ nə́ goã golee ǹ sii baraan li min tumaa yɔrɔ-a, bɛ̀ Zaã tá batɛmu diɛ ǹ ganaa Zurdɛ̃ tà mu li.
7 #
Mat 12.34; 23.33 Zaã bɛ́ á yɛ ǹ mɛn waáraa, mà *Fariziɛ̃ gigiã laanka *Sadusɛɛ̃ gigiã á die asɛ li, mà asɛ batɛmu da ǹ ganaa, a na á pɛ ǹ nɛ: «Ka kɔrɔka tɔrɔn kɛn! Die na á pɛ ka nɛ, mà Lawa a foo busu ǹ kiri gole mɛn bɛ́ die, mà ka á boe la ka baa si ka la bɛ la? 8Ka a zɛnaa ǹ siin zɛnaa, màn mɛnɛn bɛ́ nyɛɛ mà ka kaa giã ǹ gɔn bɔyaa. 9#Zaã 8.33 Ka n taasɛ mà Abrahamu bɛ́ ka digolo lɛa, mà sii kɔ́n ba boe la a kasɛn yɛ wa. Ka baran n dinin bebele wa dɛ! Masɛ n pii ka nɛ, Lawa á boe la a kɔlɔn kɛn bɔyaa a ǹ baa Abrahamu tɔrɔn lɛa!
10 #
Mat 7.19
Lawa a kiri-kurii lɛ a biikoo dɔ á nya, a n die n biɛ ka sɛ̀miɛ̃ dɔ da giala-n bɛ́ lɔn. Da mɛn din tumaa bɛ́ a nɛ sonbore koe wa, maǹ die bɛ kuri ǹ zũ tɛ-n. 11Masɛ n má batɛmu da ka ganaa mu li, man nyɛɛ máa ka n taasɛ ka wusoo kaa sii baraan kio. Sɛnɛ min mɛn bɛ́ die masɛ kio, bɛ á die ka kiɛ Lawa a zii ni ka Yiri Fu pàã nɛ, a dɔlɔ bɔ ka tɛ nɛ. A pàã á gole á la masɛ wɔ nɛ. Haalɛ masɛ nə n zuməə ma a kɔsɔ biɛn fore, ma mìi á kiɛɛrɛ bɛ ganaa. 12A n die min sonboren laanka min baraan niɛ̃ a ǹ bɔ kɔn, ka buu-kɔsɔli bɛ́ màn nàn laanka a kaása niɛ̃ á boe kɔn lɔn, màn mɛn bɛ́ toɛ, a na a màn nàn bɔ a kaa dɔǹ nɛ. Sɛnɛ, á die màn kaása kɛ sɛ tiɛ̃ tɛ-n, tɛ mɛn bɛ́ a ba nimi duduu wa.»
Yezu a batɛmu yɛ
(Mar 1.9-11; Luk 3.21-22)
13Bɛa biikoo li, Yezu nə́ n toa Galilee gána nɛ, á daa Zaã li Zurdɛ̃ tà lɛ-a, mà a batɛmu da asɛ ganaa. 14Zaã nə́ n piã bɔrɔ, á pɛ nɛ: «Masɛ Zaã doamaa nɛ ma da n li, n bɛa batɛmu kɛ lɛ da masɛ ganaa, sɛnɛ n dɔ nə ń yoo ń daa masɛ li?»
15Yezu tɔ́n pɛ nɛ: «A giala, wɔ doamaa nɛ wɔ Lawa foo sii zɛnaa miɛ̃.»
Zaã nɔmaa á lɛ kɔ. 16A bɛ́ á batɛmu da a ganaa, Yezu soo á n bɔ mu li. A din bǎã-n gɔrɔ, lon nə́ n lɛ bũ, Yezu Lawa a Yiri Fu yɛ ka zɛrɛkantoan bɛ́ lɔn gisĩ die a din la. 17#SGK 22.2; Loe 2.7; Iza 42.1; Mat 12.18; 17.5; Mar 1.11; Luk 9.35 Boo-diɛ lɛn bɔ lon á pɛ: «Kɛ n maa Nɛgiĩ lɛa, ma á narɛ parsiini, ma din ni má bɔ.»
Currently Selected:
Mat 3: SBPE2011
Highlight
Share
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.