Zoz 20

Kiwin mɛnɛn nə n koa baa si a wo mìi duru ǹ bǎã lɛa

1 # MNS 35.9-34; TDP 4.41-43; 19.1-13 Bɛ kio, Dɛnaa Lawa tɔ́n pɛ Zozoe ne: 2Boo da Izirayeli minin lɛn nɛ n pɛ ǹ nɛ: «Má goã máa ka mìi duru ǹ kiwin mɛnɛn koa, má a boo da Muizu ni, má a pɛ ka nɛ. 3Bɛ̀ min gɔn sã á ǹ miã dɛ, a na a bie zɛnaa woon lɛa wa, á boe la a baa si a wo n mìi duru bɛa kiwin lɛn goon ne. Ka tá re baa sii ka wo n mìi duru bɛa kiwin lɛn kɔn nɛ, màn mɛn bɛ́ toɛ, ka kanbaa gere lɛ a gɛ̀ dòo-bɔle ganaa. 4Min mɛn lɛ gɔn sã á ǹ miã dɛ, a die a baa si a wo bɛa kiwin lɛn goon ne. Bɛ̀ á dɔ, a golee kiwi lɛ a kiɛnlɛ-a, a na a sii lɛ yɔrɔ pɛ bɛa kiwi lɛ a min golen manɛ. Bɛn tá re kuĩ ǹ koa ǹ li kiwi lɛ nɛ, ǹ bǎã kɔ la a boo la a giã kunun ǹ ni. 5Bɛ̀ gere lɛ a gɛ̀ dòo-bɔle gɛ̀-dɛle lɛ loo yǎa walan, min golen lɛn doamaa bie ǹ bɔ ǹ kɔ la wa. A giala, a bie á ǹ miã lɛ dɛ woon wa, a foo dɔ bie á yoo li lɛlɛ wa. 6A giã bɛa kiwi lɛ nɛ, yǎa zaman nə kiri we a ganaa. Min mɛn dɔ bɛ́ wúlu-bɔlen kiã lɛa a biikoo li, yǎa bɛ giɛ̃. Bɛ kio, gɛ̀-dɛle lɛ á boe la a n bɔyaa a da piɛ, a wɔ a din a kiwi, a goã á baa si á n bɔ kiwi mɛn lɛ nɛ.»

7Izirayeli minin lɛn nə́ Kedɛsi kiwi bɔ ǹ nə́ koa Galilee gána nɛ, Nɛfutalii a kele yii bǎã kɛ nɛ. Ǹ nə́ Sisɛmu bɔ ǹ nə́ koa Efrayimu a kele yii bǎã kɛ nɛ. Kiriyati-Arabaa mɛn bɛ́ ǹ tá bíi Ebrɔn, ǹ nə́ bɛ bɔ ǹ nə́ koa Zudaa tɔrɔn kele yii bǎã kɛ nɛ. 8Zurdɛ̃ tà kio, Zerikoo a lɛ̀giala gɔn la, Urubɛn tɔrɔn tenten bǎã kɛ nɛ don, ǹ nə́ Bɛtsɛɛrɛ kiwi bɔ walan ǹ nə́ koa. Ramɔti mɛn bɛ́ Gaadi tɔrɔn bǎã lɛa, Galaati gána nɛ, ǹ nə́ bɛ bɔ ǹ nə́ koa, ka Golan kiwi kɛ nɛ Basan gána nɛ, Manaasee tɔrɔn bǎã nɛ.

9Ǹ kiwi mɛnɛn bɔ ǹ nə́ ǹ koa Izirayeli minin tumaa wɔ lɛa, ka min mɛn dɔ á ke gùli lɛa giã nɛ ǹ bii, ǹ dinin lɛn man ka bɛn nɛ. Maǹ nə́ ǹ koa, màn mɛn bɛ́ toɛ, bɛ̀ min woo min sã á gɛ̀ dɛ, a na a bie zɛnaa woon lɛa wa, ǹ dɛnaa boo la a baa si a wo n mìi duru walan. Ka bɛa yɔrɔ lɛ nɛ, a min mɛn dɛ, á re boe la a kanbaa bɛa gɛ̀ dòo-bɔle ganaa, bɛ̀ a sii lɛ baa n yɔrɔ boe zaman yɔrɔ-a.

Currently Selected:

Zoz 20: SBPE2011

Highlight

Copy

Compare